ރޭސިންގ އެންޑް ޑްރިފްޓް އެސޯސިއޭޝަނަށް ހުޅުމާލޭގެ ވަކި ސަރަހައްދެއް ބޭނުންކުރުމަށް ދީފައިވާ ހުއްދަ ހުކުރު ދުވަހު ބާތިލުކުރުމަށްފަހު، އާދިއްތަ ދުވަހު އަލުން އަނބުރާ ދީފިކަމަށް ބުނާ ޚަބަރު ޓްރާންސްޕޯޓް މިނިސްޓަރު ދޮގުކޮށްފިއެވެ.
މި ކަމާއި ގުޅިގެން ރާއްޖެއެމްވީން ޓްރާންސްޕޯޓް މިނިސްޓަރު މުޙައްމަދު އަމީން އަށް ސުވާލުކުރުމުން މިނިސްޓަރ ވިދާޅުވީ، "އެއީ ދޮގު ވާހަކައެއް، އެކަހަލަ މައުލޫމާތެއް އަދި ލިބިފައިނުވާ،" ކަމަށެވެ.
"އަދި އަޅުގަނަޑު ތިޔަކަހަލަ ވާހަކައެއް އަޑެއްވެސް ނާހަން، އަޅުގަނޑަކަށް ވަރަށް ހީނުވޭ، އަޅުގަނޑުމެން ލެވެލް އަށް ނޭގި ދެއްވާނެހެން،" މިނިސްޓަރ ކެބިނެޓް ޖަލްސާއިން ނުކުންނަވާ ރާއްޖެއެމްވީ އަށް ފޯނުން ޖަވާބު ދެއްވަމުން ވިދާޅުވިއެވެ.
ރޭސިންގ އެންޑް ޑްރިފްޓް އެސޯސިއޭޝަން އަށް ހުޅުމާލޭގެ ވަކި ސަރަހައްދެއް ބޭނުންކުރަން ދިން ހުއްދަ ބާތިލްކުރިކަން އަންގާ، އެޗްޑީސީގެ މެނޭޖިންގ ޑިރެކްޓަރު ފަޒުލް ރަޝީދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ރޭސިންގ އެންޑް ޑްރިފްޓް އެސޯސިއޭޝަން އަށް ހުޅުމާލޭގެ ވަކި ސަރަހައްދެއް ބޭނުންކުރުމަށް 19 އޮކްޓޯބަރު 2023 ގައި ދީފައިވާ ހުއްދާ ބާތިލްކޮށް އެފަރާތަށް އެކަން އަންގާފައިވާ ކަމަށެވެ.
ރޭސިންއަށާއި ޑްރިފްޓިންއަށް ހުޅުމާލެއިން ދޫކޮށްފައި އޮންނަ ސަރަހައްދު އަތުލަން ރައީސް ޑރ. މުހައްމަދު މުއިއްޒު ނިންމެވުމާ ގުޅިގެން ރޭސިންގ އެސޯސިއޭޝަނުން ވަނީ ކަންބޮޑުވުން ފާޅުކޮށްފައެވެ.
އިތުބާރުހުރި ފަރާތަކުން ރާއްޖެއެމްވީ އަށް މައުލޫމާތު ދީފައިވާ ގޮތުގައި، ހޮނިހިރު ދުވަހުގެ ހަވީރު ސްޕޯޓްސް މިނިސްޓަރު އަބްދުﷲ ރާފިއު އަދި ޓްރާންސްޕޯޓް މިނިސްޓަރު މުޙައްމަދު އަމީން ވަނީ ރޭސް ޖަހާ ޒުވާނުންނާ ބައްދަލުކޮށްފައި ކަމަށާއި، ބައްދަލުވުމަށްފަހު ހުކުރު ދުވަހު ބާތިލުކުރި ހުއްދަ އަލުން އަނބުރާ ދީފައިވާ ކަމަށެވެ.
ރޭސިންގ އެންޑް ޑްރިފްޓް އެސޯސިއޭޝަނަށް ހުޅުމާލޭގެ ވަކި ސަރަހައްދެއް ބޭނުންކުރުމަށް ހުއްދަ އަލުން ދިން ކަމުގެ ޚަބަރު ފެތުރިފައި މިވަނީ، ގަވައިދާ ޚިލާފަށް ބާރު ސްޕީޑްގައި ދުއްވާ އުޅަނދު ކޮންޓްރޯލް ކުރުމާއި، އުޅަނދަށް ބަދަލުގެނެސްގެން ނުވަތަ އުޅަނދުގެ ބާވަތުން ދުއްވާއިރު އަޑުގަދަ އުޅަނދުތައް ބޭނުންކުރުން ކޮންޓްރޯލްކޮށް ޢާއްމުންރައްޔިތުން ދިރިއުޅޭ ސަރަޙައްދުތައް ރައްކާތެރިކުރުމަށްޓަކައި 8 ފިޔަވަޅެއް އެޅުމަށް ކަމާބެހޭ ފަރާތްތަކަށް 6 ސެޕްޓެމްބަރު 2024 ގައި ރައީސް ޑރ މުއިއްޒު އަންގަވާފައި ވަނިކޮށްނެވެ.
