ރާއްޖޭގައި އިޒްރޭލުން ފަލަސްތީނުގައި ހިންގާ އުދުވާންތަކާ ދެކޮޅަށް އަޑު އުފުލުމުން ހައްޔަރުކުރި ދެ އަންހެނުންގެ ބަންދުގެ މުއްދަތު ޖަހައިފިއެވެ.
މިމައްސަލާގައި ހައްޔަރުކޮށްފައިވަނީ ކ.މާލެ، މ.ބަޑިކުޅިމާގެ، 47 އަހަރުގެ އާއިޝަތު ޝާދިޔާ، އަދި ގދ.ރަތަފަންދޫ، ލިލީގެ 36 އަހަރުގެ ޝަޒުރާ އިބްރާހިމް ކަމަށެވެ. މި ދެމީހުން ހައްޔަރުކޮށްފައިވަނީ 28 އޯގަސްޓް 2024 ވަނަ ދުވަހުގެ މެންދުރު 1:00 ހާއިރު ކަމަށް ފުލުހުން ބުނެއެވެ.
އާދިއްތަ ދުވަހު ފުލުހުން ބުނީ މިމައްސަލައާ ގުޅިގެން ހައްޔަރުކުރި ދެމީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން 5 ދުވަހަށް ބަންދު ކުރުމަށް އަމުރުކޮށްފައިވާ ކަމަށެވެ.
މިމައްސަލައާ ގުޅިގެން މީގެ ކުރިން ފުލުހުން ބުނީ ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ގާނޫނާ ހިލާފަށް ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވެ، އަޑުގަދަކުރާ ބޭނުންކޮށްގެން ހަޅޭއްލެވުމާއި، ބޭއަދަބީ ބަހުރުވައިން މުއާމަލާތްކޮށް އަދި ޑިޕްލޮމެޓިކް މިޝަންތަކުގެ މަސައްކަތަށް ހުރަސްއެޅޭ ގޮތަށް އަމަލުކުރުމުގެ އިތުރުން ވަކި ސަފީރަކަށް އުދަނގޫ ކުރުމުގެ އަމަލުތަކެއް ހިންގަމުން ގެންދިއުމާ ގުޅިގެން ސުލްހަވެރިކަމާއެކު އެ ސަރަހައްދުން ދިއުމަށް ފުލުހުން އެންގި ކަމަށެވެ. ނަމަވެސް އެކަމަށް އިންކާރުކޮށް ފުލުހުންގެ ވާޖިބު އަދާކުރުމަށް ހުރަސްއަޅާފައިވާ ކަމަށް ފުލުހުން ބުނެއެވެ.
ފުލުހުން ބުނީ މި އަމަލުތަކާ ގުޅިގެން ޝާދިޔާ އަދި ޑރ. ޝަޒްރާ އެގޮތަށް އަމަލުނުކުރުމަށް އެކި ފަހަރުމަތިން ނަސޭހަތްދީފައިވާ ކަމަށެވެ.
ގާނޫނު އަސާސީން ކަށަވަރުކޮށްދީފައިވާ އެއްވެއުޅުމުގެ މިނިވަންކަމުގެ ހައްގު ބޭނުން ކުރުމުގައި ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނަށް ހުރުމަތްތެރިކޮށް ހިތުމަށާއި، އިރުޝާދުތަކަށް ތަބާވުމަށް ފުލުހުން ވަނީ އިލްތިމާސްކޮށްފައެވެ.
މި ދެ އަންހެނުން ހައްޔަރުކޮށްފައިވާތީ ގިނަ ބައެއްގެ ފާޑު ކިޔުން ސަރުކާރަށް ވަނީ އަމާޒުވެފައެވެ. މީގެ އިތުރުން ކުރީގެ ހޯމް މިނިސްޓަރު ޝެއިޚް އިމްރާން އަބްދުﷲ ވިދާޅުވީ މަސްޖިދުލް އަޤްޞާ އާއި ފަލަސްޠީންގެ އަންހެނުންނާއި ކުޑަކުދިންގެ ހައްގުގައި މެދުކެނޑުމެއްނެތި އަޑު އުފުލަމުން ގެންދިޔަ ޝާދިޔާއާއި ޑރ. ޝަޒްރާ ދިވެހި ފުލުހުން ހައްޔަރު ކުރުމީ ނާތަހުޒީބު ފިނޑި އަމަލެއް ކަމަށެވެ. އަދި ރާއްޖޭގެ އެކިއެކި ސިޔާސީ ޕާޓީތަކުން ވެސް މިކަން ކުށްވެރިކޮށްފައިވެއެވެ.
މިސަރުކާރުން އިޒްރޭލު ޕާސްޕޯޓު މަނާ ކުރާނެކަމަށް ބުނި ނަމަވެސް 70 ށްވުރެ ގިނަ ދުވަސްވީއިރު އެމަސައްކަތް ރައްޔިތުންގެ މަޖިލީހުން ކޮށްފައިނުވެއެވެ. އެހެންކަމުން މި މަސައްކަތް ކުރުމުގައި ސަރުކާރުގެ ހެޔޮ ނިޔަތެއް އޮތްކަމާމެދު ވެސް ބައެއް މީހުން ދަނީ ސުވާލު އުފައްދަމުންނެވެ.
