އިޓާލިއަން ލީގުގައި ޕާމާއާ ދެކޮޅަށް ކުޅުނު މެޗުން ފަހު ވަގުތު ނަޕޯލީ މޮޅުވެއްޖެ އެވެ.
ނަޕޯލީގެ އަމިއްލަ ދަނޑުގައި ކުޅުނު މެޗުން އެ ޓީމު މޮޅުވީ، ޕާމާ އިން ލަނޑު ޖަހައި ލީޑު ނަގާފައި ވަނިކޮށް ފަހަތުން އަރައި ދެ ލަނޑު ޖަހައިގެންނެވެ. ނަޕޯލީން އެ ޓީމުގެ ދެ ލަނޑު ވެސް ޖެހީ މެޗުގެ ފަހު ވަގުތުގަ އެވެ.
މެޗު ފަށައިގެން 19 ވަނަ މިނެޓުގައި ޕާމާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލީޑު ނަގައިދިނީ އަންގޭ ބޮނީ އެވެ. އޭނާ އެ ލަނޑު ޖެހީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ. މެޗުގެ ނަތީޖާ ހަމަހަމަ ކުރުމަށް ނަޕޯލީން ކުރި މަސައްކަތް ކާމިޔާބުވީ މެޗުގެ ފުރިހަމަ ވަގުތު ހަަމަވެ އިތުރަށް ދެއްކި ވަގުތުގަ އެވެ. ނަޕޯލީ އަށް ނަތީޖާ ހަމަހަމަ ކޮށްދިނީ ދާދި ފަހުން އެ ޓީމަށް ބަދަލުވި ބެލްޖިއަމްގެ ރޮމެލޫ ލުކާކޫ އެވެ. އޭގެ އިރުކޮޅެއް ފަހުން، މެޗުން ނަޕޯލީ މޮޅުވި ލަނޑު ޖެހީ އަންދްރޭ ފްރޭންކް ޒަމްބޯ އަންގިސާ އެވެ. މިއީ ނަޕޯލީ އަށް ބަދަލުވީ ފަހުން އެ ޓީމުގައި ލުކާކޫ ކުޅެދިން ފުރަތަމަ މެޗެވެ.
އައު ސީޒަންގެ އިޓާލިއަން ލީގުގައި މިހާތަނަށް ނަޕޯލީން ތިން މެޗު ވަނީ ކުޅެފަ އެެވެ. ދެ މެޗުން މޮޅުވެފައިވާއިރު، އެއް މެޗުން ވަނީ ބަލިވެފަ އެވެ. ހަ ޕޮއިންޓާއެކު ނަޕޯލީ އޮތީ ހަތަރު ވަނައިގަ އެވެ.
