ޖަރުމަން ކަޕްގެ ދެވަނަ ބުރުން ބަޔާން މިޔުނިކް ޖާގަ ހޯދައިފި އެވެ.

ބަޔާން މިޔުނިކް ޖަރުމަން ކަޕުގެ ދެވަނަ ބުރުން ޖާގަ ހޯދާފައިވަނީ ޖަރުމަނުގެ ތިންވަނަ ޑިވިޝަނުގެ ކްލަބެއް ކަމަށްވާ، ޗެމްނިޓްޒާގެ މައްޗަށް 0-5 ގެ ނަތީޖާއަކުން ކުރިހޯދައިގެންނެވެ.

ޗެމްނިޓްޒާގެ އަމިއްލަ ދަނޑުގައި ރޭ ކުޅުނު މި މެޗުގައި، ބަޔާންގެ ފަރާތުން މޮޅު ކުޅުމެއް ފެނިގެން ދިޔައިރު، މެޗުގެ ފުރަތަމަ ލަނޑު ޖަހާ ލީޑުނެގީވެސް ބަޔާއިންނެވެ. ބަޔާންއަށް މި ލަނޑު ކާމިޔާބުކޮށްދިނީ މެޗުގެ 20 ވަނަ މިނެޓުގައި އިތުބާރު ފޯވާޑް ރޮބަޓް ލެވެންޑޯސްކީއެވެ.

މި ލަނޑަށް ފަހުވެސް ބަޔާންއިން ރަނގަޅަށް ކުޅެފައިވާއިރު ލަނޑުޖަހާނޭ ރަނގަޅު ގިނަ ފުރުސަތުތަކެއް ވަނީ ލިބިގެންގޮސްފައެވެ. އެހެން ނަމަވެސް މީގެން އެއްވެސް ފުރުސަތެއްގެ ބޭނުން ހިފޭގޮތްވަނީ ނުވެފައެވެ.

ބަޔާންއިން ލީޑުގައި އޮވެ މެޗުގެ ފުރަތަމަ ހާފު ނިމުނުއިރު ބަޔާންއިން ވަނީ މެޗުގެ ފަހު ހާފުގެ ވަރަށް ކުރީކޮޅު ލަނޑުޖަހާ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބު ކޮށްދީފައިވަނީ ރިބެރީގެ އެހީތެރިކަމާއެކު ކިންގްސްލީ ކޯމަންއެވެ.

ކޯމަންގެ މި ލަނޑާއެކު ބަޔާއިން ދެ ލަނޑުގެ ލީޑެއް ނެގިތާ ގިނައިރުތަކެއް ނުވެ ލެވެންޑޯސްކީ ވަނީ އިތުރު ލަނޑެއް ކާމިޔާބުކޮށް ބަޔާންއަށް ލީޑި އިތުރަށް ފުޅާކޮށްދީފައެވެ. ބަޔާންގެ ހަތަރުވަނަ ލަނޑު 79 ވަނަ މިނެޓުގައި ރިބެރީ ކާމިޔާބުކޮށްދިންނއިރު އެޓީމުގެ ފަސްވަނަ ލަނޑު ކާމިޔާބުކޮށްދީފައިވަނީ މެޓްސް ހުމެލްސްއެވެ.

ބަޔާންގެ އިތުރުން މުބާރާތުގެ ދެވަނަ ބުރަށް، ބްރޫޝިއާ ޑޯޓްމަންޑް ވެސް ވަނީ ދަތުރުކޮށްފައެވެ.

ޑޯޓްމަންޑު މުބާރާތުގެ ދެވަނަ ބުރަށް ދަތުރުކުރީ ރެއިލަސިންގެން އާލެންގެ މައްޗަށް 0-4 ގެ ނަތީޖާއަކުން ކުރިހޯދައިގެންނެވެ. މި މެޗުގައި ޑޯޓްމަންޑަށް ލަނޑުތަށް ކާމިޔާބުކޮށްދިނީ ޕިއެރޭ-އެމެރިކް އޮބާމަޔަންއާއި މާކް ބާޓްރާއެވެ.

މި މުބާރާތުގެ އެންމެ ފަހުގެ ޗެމްޕިއަންއަކީވެސް ޑޯޓްމަންޑެވެ. އެޓީމުން މި މުބާރާތް 4 ފަހަރެއްގެ މަތިން ވަނީ ކާމިޔާބުކޮށްފައެވެ. މި މުބާރާތް އެންމެ ގިނަފަހަރު ކާމިޔާބުކޮށްފައިވަނީ ބަޔާއިންނެވެ. އެޓީމު ވަނީ މި މުބާރާތް 18 ފަހަރު ކާމިޔާބުކޮށްފައެވެ.