މަސައްކަތުގެ މާޙައުލުގެ ރައްކާތެރިކަމާއި ޞިއްޙީ ކަންކަން ކަށަވަރުކުރުމަށް މިނިސްޓަރ އޮފް ލޭބަރ އެންޑް ސްކިލްސް ޑިވަލޮޕްމަންޓް ޑރ. މަރިޔަމް މާރިޔާ ގޮވާލައްވައިފިއެވެ.

ރާއްޖޭގައި ބައިނަލްއަޤްވާމީ މަސައްކަތްތެރިންގެ ދުވަހާއި ގުޅޭގޮތުން ދެއްވި ހިތާބުގައި މިނިސްޓަރު މަރިޔަމް މާރިޔާ ވިދާޅުވީ ވޭތުވެދިޔަ 15 އަހަރު ދުވަހު، މަސައްކަތްތެރިކަމަށް ނަޒަރު ހިންގާލާއިރު، މަސައްކަތުގެ މާޙައުލުގެ ރައްކާތެރިކަމާއި ސިއްހަތު ކަށަވަރުކުރުމަށް މިވަނީ ކުރިއެރުންތަކެއް ލިބިފައިވާ ކަމަށެވެ. އެގޮތުން، ޤާނޫނީ އޮނިގަނޑުގެ ތެރެއިން މަސައްކަތުގެ މާހައުލުގެ ރައްކާތެރިކަމާއި ޞިއްޙަތު ކަށަވަރުކުރުމުގެ ޙައްޤު މިހާރު ލިބިފައިވާތީ އެކަން ފާހަގަކުރެއްވިއެވެ.

އަދި މާތްﷲގެ ވާގިފުޅާއެކު، މި ޤާނޫނުގެ ފޮނިމީރުކަން ދިވެހި މަސައްކަތްތެރިންނަށް ވަރަށް އަވަހަށް ލިބިގެންދާނެކަމާމެދު، ޝައްކު ނުކުރައްވާ ކަމަށް އޭނާ ވިދާޅުވިއެވެ. އަދި އަބުރުވެރި މަސައްކަތުގެ މުހިންމު ކަމާއި އޭގެ ސަބަބުން ފަރުދުންގެ ދިރިއުޅުމަށާއި، ޤައުމުގެ ތަނަވަސްކަމަށް ކުރާނެ އަސަރުތަކާމެދު ވިސްނާލަންޖެހޭ ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ މަސައްކަތްތެރިންގެ ދުވަހު، ހަނދާނަށް ގެންނަން ޖެހޭނީ އިންސާފުވެރި އުޖޫރަ ކަމަށެވެ. އަދި ރައްކާތެރި މަސައްކަތުގެ މާޙައުލާ ދޭތެރޭ ވިސްނަންޖެހޭ ކަމަށާއި، އަބުރުވެރި ވަޒީފާއެއް ހޯދުމުގެ ފުރުސަތު ހިމެނޭ ގޮތަށް، މަސައްކަތްތެރިންގެ އަސާސީ ހައްގުތައް ޙިމާޔަތް ކުރުމާ މެދުވެސް ވިސްނަން ޖެހޭ ކަމަށެވެ. މިނިސްޓަރ ވިދާޅުވީ ދިވެހިރާއްޖޭގައި، މަސައްކަތުގެ އިޖްތިމާޢީ ޢަދުލުވެރިކަމާއި، އިޤްތިޞާދީ ކުރިއެރުމާއި، ދެމެހެއްޓެނިވި ތަރައްޤީ އާލާކުރުމުގައި، އަބުރުވެރި މަސައްކަތްތައް އަދާކުރާ ވަރަށް މުހިންމު ދައުރެއްވާކަމަށް ޤަބޫލުކޮށް، ދެނެގަންނަން ޖެހޭ ކަމަށެވެ.

މީގެ އިތުރުން ދިވެހިރާއްޖޭގެ ކޮންމެ މަސައްކަތްތެރިއަކަށް ވެސް، އެމީހަކަށް ހައްޤުވާ ކަރާމާތާއި އިޙްތިރާމް ލިބިދިނުމަކީ ސަރުކާރުގެ ވަރައްބޮޑު އަމާޒެއް ކަމަށާއި، އެހެންކަމުން، މިއަދުގެ އެންމެ ބޮޑު އިލްތިމާސަކީ މަސައްކަތްތެރިންނަށް ޙައްޤުވާ އިޙްތިރާމް، އޭގެ ފުރިހަމަ މާނާގައި، އެފަރާތްތަކަށް ލިބިދެވޭނެ ގޮތަށް، ސިޔާސަތުތަކާއި އުޞޫލުތައް ބައްޓަންކޮށް، އެކަންކަން، ޢަމަލުން ދެއްކެވުން ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ މަސައްކަތުގެ މާޙައުލާއި އެންމެންނަށް އަބުރުވެރި މަސައްކަތެއް ހޯދުމުގައި ދެމިއޮތް ގޮންޖެހުންތައް، އަދިވެސް ވާކަމަށް، ގަބޫލުކުރަން ޖެހޭ ކަމަށެވެ. އަދި މަސައްކަތުގެ މާހައުލުގައި ހިތްހަމަނުޖެހޭ ކަންކަން އެބަ ހިނގާ ކަމަށާއި، ތަފާތުކުރުމާއި، ގަނާކުރުމާއި ނުތަނަވަސްކަމުގެ ހާދިސާތަކުގެ ވާހަކަތައް އަޑުއިވޭ ކަމަށެވެ. މަސައްކަތްތެރިންގެ ޙައްޤުގައި، މި ފަދަ ތަފާތުކުރުމާއި އަނިޔާވެރިކަމާ ދެކޮޅަށް ކުރިމަތިލައި، އެކަންކަން، މަސައްކަތުގެ މާޙައުލުން ނައްތާލުމަށް މަސައްކަތް ކުރުމަކީ، އެންމެންގެ ވާޖިބެއްކަމަށް ހެއްދެވުމަށް މިނިސްޓަރު އެދިވަޑައިގެންނެވިއެވެ.

މީގެ އިތުރުން އެއްބައިވަންތަކަމާއި އެއްބާރުލުމުގެ ރޫޙެއްގައި، ސަރުކާރުގެ އިދާރާތަކާއި، ވަޒީފާދޭ ފަރާތްތަކާއި، ޓްރޭޑް ޔޫނިއަންތަކާއި، މަދަނީ ޖަމްޢިއްޔާތައް ގުޅިގެން ރާއްޖޭގައި މަސައްކަތުގެ މާޙައުލުގެ ރައްކާތެރިކަމާއި ޞިޢްޙީކަންކަން ކަށަވަރުކޮށް، އަބުރުވެރިކަމުގެ މަސައްކަތުގެ މަޤްޞަދުތައް ކުރިއަށް ގެންދިއުމަށް މިނިސްޓަރު ވަނީ ގޮވާލައްވާފައެވެ. އަދި އެކުގައި ޤައުމު ބިނާކުރެވޭނީ، ކޮންމެ މަސައްކަތްތެރިއަކަށް ވެސް، އެމީހެއްގެ ފުރިހަމަ ގާބިލްކަން ޙަޤީޤަތަކަށް ހަދައި، ކަރާމާތާއި ފުރިހަމަ ދިރިއުޅުމެއް އުޅުމަށް، ބާރުވެރިކުރެވޭ މުޖުތަމައެއް ޤާއިމުކޮށްގެން ކަމަށް މިނިސްޓަރު ވިދާޅުވިއެވެ.

މީގެ އިތުރުން ބައިނަލްއަޤްވާމީ މަސައްކަތްތެރިންގެ ދުވަސް ފާހަގަ ކުރާއިރު، މަސައްކަތުގެ މާޙައުލު ރަގަނޅުކޮށް، އެންމެންނަށް އަބުރުވެރި މަސައްކަތް، ކުރިއެރުވުމަކީ ވައުދެއްކަމަށް ހައްދަވާ، އެއްވެސް މީހަކު ފަހަތަށް ނުޖެހި، ޝާމިލް، އަދި ހަމަހަމަ މަސައްކަތްތެރިންގެ މާރުކޭޓެއް އުފެއްދުމަށް ކުރާ މަސައްކަތްތައް ދެގުނައަށް އިތުރުކުރުމަށް މިނިސްޓަރު ގޮވާލެއްވިއެވެ. އަދި އަޅުގަނޑުމެންގެ ޢަމަލުތަކަކީ، ކުރިއަށް އޮތް ޖީލުތަކަށް ދިވެހިރާއްޖޭގައި މަސައްކަތް ކުރުމުގެ މުސްތަޤްބަލް ބައްޓަންކުރާނެ ކަމެއްކަން އެނގިހުރެ، އަޒުމާއެކު ކުރިއަށް ދާން އަޒުމު ކަނޑައަޅުމަށް ވެސް ލޭބަރ އެންޑް ސްކިލްސް ޑިވަލޮޕްމަންޓް މިނިސްޓަރު އެދިވަޑައިގެންނެވިއެވެ.