ފ. މަގޫދޫ އެއާޕޯޓް ހުއްޓާލުމުން މަޖިލީހަށް ހުށަހެޅު ކުއްލި މައްސަލަ ބަލައިގަތުމާއި ދެކޮޅަށް ސަރުކާރު މެންބަރުން ވޯޓު ދެއްވައިފިއެވެ.
މަގޫދޫ އެއާޕޯޓްގެ މަސައްކަތް ހުއްޓާލުމުން ކުއްލި މައްސަލަ އެއް ހުށަހެޅުއްވީ ބިލެތްދޫ ދާއިރާގެ މެންބަރު އަހުމަދު ހަލީމްއެވެ. އެ މައްސަލައިގައި ބުނެފައި ވަނީ ފ.މަގޫދޫ އެއަރޕޯޓް 70 އިންސައްތަ ނިމިފައިވަނިކޮށް އެ މަސައްކަތް ހުއްޓާލުމަކީ ކަންބޮޑުވުމެއް ކަމަށެވެ. އަދި މަގޫދޫ އެއަރޕޯޓް އެޅުމުގެ މަޝްރޫއަކީ ދައުލަތުގެ ޢާންމު މަންފާއަށްޓަކައި ދިވެހިރާއްޖޭގެ އެކި ކަންކޮޅުތަކުގައި އެއަރޕޯޓް ޤާއިމްކުރުމުގެ ސިޔާސަތުގެ ދަށުން ނިމިދިޔަ އެމްޑީޕީގެ ވެރިކަމުގައި ކްރޮސް ސަބްސިޑީގެ ގޮތުގައި 21 މިލިއަން އެމެރިކާ ޑޮލަރުގެ ނަގުދު ފައިސާ ލިބިގެން ފަށާފައިވާ މަޝްރޫއެއް ކަމަށް ފާހަގަކޮށްފައިވެއެވެ.
އެ މައްސަލަ ބަހުސް ކުރުމަށް ފާސްކޮށް ބަހުސްގެ މަރުހަލާ މިވަގުތު ދަނީ ކުރިއަށެވެ. އެ މައްސަލަ ބަލައިގަތުމަށް 22 މެންބަރަކު ވޯޓު ދެއްވިއެވެ. ބަލައިނުގަތުމަށް ވޯޓު ދެއްވީ ހަތަރު މެންބަރެކެވެ. އެ ހަތަރު މެންބަރުންނަކީ ވެސް ސަރުކާރަށް ނިސްބަތްވާ މެންބަރުންނެވެ. ހޯމަ ދުވަހުގެ ޖަލްސާ އަށް ހާޒިރުވެވަޑައިގެންނެވީ ވެސް ސަރުކާރަށް ނިސްބަތްވާ އެންމެ 4 މެންބަރުންނެވެ.
މަގޫދޫ އެއާޕޯޓުގެ މަސައްކަތް ހުއްޓާލުމުން އެ ރަށުގައި ދަނީ މުޒާހަރާ ކުރަމުންނެވެ. ނަމަވެސް ސަރުކާރުން މުޒާހަރާގެ ބައިވެރިންގެ އަޑު އަހަމުން ނުދާކަމުގެ ޝަކުވާ ދަނީ ކުރަމުންނެވެ.
