އަންހެނުންގެ ތަރައްޤީއަށް ޚާއްސަ ލޯނުތަކެއް އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީ) އިން ތަޢާރަފުކޮށްފިއެވެ.

ބުރާސްފަތި ދުވަހު އޮތް ޚާއްސަ ރަސްމިއްޔާތެއްގައި މި ލޯނުތައް ތައާރަފްކޮށްދެއްވީ އިގްތިސާދާ މާލީ ކަންތައްތަކާ ބެހޭ ވަޒީރު، މުހައްމަދު ސައީދުއެވެ.

މި ރަސްމިއްޔާތުގައި ވަނީ ދެ ބާވަތެއްގެ ލޯނު ތަޢާރަފުކޮށްފައެވެ. އެއީ ފަށާ މަދަދު ލޯނާއި ފަށާ މަދަދު ސްކީމެވެ.

އޭގެ ތެރެއިން ފަށާ މަދަދު ލޯނަކީ އަންހެން ވިޔަފާރިވެރިންގެ ތެރެއިން އާމްދަނީ ކަށަވަރު ނުވުމުގެ ސަބަބުން ކޮންވެންޝަނަލް ބޭންކުތަކުން ޚިދުމަތް ލިބުމުގައި ދަތިތައް ދިމާވާ ފަރާތްތަކަށް ޚާއްސަކޮށް ދެވޭ ލޯނެކެވެ.

އަހަރަކު 6 އިންސައްތައިގެ އިންޓްރެސްޓެއްގައި ދެވޭ މި ލޯނު، އަލަށް ވިޔަފާރިފަށާ ފަރާތްތަކަށް 500،000 ރުފިޔާއާ ހަމައަށް ލޯން ލިބޭނެއެވެ. އަދި މިހާރު ވިޔަފާރިކުރާ ފަރާތްތަކަށް ވެސް 700،000 ރުފިޔާއާ ހަމައަށް ލޯނު ލިބޭނެއެވެ.

މި ލޯނަށް ގްރޭސް ޕީރިއަޑް ނުވަތަ ލޯނު ނުދައްކައި ލިބޭނީ 12 މަސްދުވަހުގެ މުއްދަތެކެވެ. އަދި ލޯނު އަނބުރާ ދެއްކުމަށް ހަތް އަހަރު ލިބޭނެއެވެ.

މީގެ އިތުރުން ފަށާ މަދަދު ސްކީމަކީ ދިވެހި ކަނބަލުންގެ ތެރެއިން އަމިއްލަ މަސައްކަތްކުރާ ފަރާތްތަކުގެ ތެރެއިން ފްރީލާންސްކޮށް އަދި ގޭގައި މަސައްކަތްކުރާ ފަރާތްތަކަށް ޚާއްސަކޮށްގެން ތައަރާފްކުރެވުނު ސްކީމެކެވެ.

މި ސްކީމުގެ ދަށުން އެފަރާތްތަކުގެ ވިޔަފާރި ކުރިއެރުވުމަށް ބޭނުންވާ ހަރުމުދާ ގަތުމަށް ފަސޭހަ އިންތިޒާމުތަކެއް ހަމަޖެހޭއިރު މި ސްކީމުގެ ދަށުން އަހަރަކު 8 އިންސައްތައިގެ އިންޓްރެސްޓް ރޭޓެއްގައި އަދި ލީސިން ފައިނޭންސްގެ ގޮތުގައި 10،000 ރުފިޔާ އިން ފެށިގެން 100،000 ރުފިޔާ އާ ހަމައަށް ލިބޭނެއެވެ.

މި ސްކީމުގެ ދަށުން ފޯރުކޮށްދެވޭ މުދަލަށް އަނބުރާ ފައިސާ ދެއްކުމަށް މައާފްދެވޭ މުއްދަތު ނުވަތަ ގްރޭސް ޕީރިއަޑްގެ ގޮތުގައި 6 މަސް ލިބޭއިރު ލޯނު އަނބުރާ ދެއްކުމަށް 5 އަހަރު ގެ މުއްދަތެއް ލިބޭނެއެވެ.

ހަމައެއާއެކު މި ސްކީމުގެ ދަށުން ވަކި ފަރުދަކަށް ފައިނޭންސް ކުރެވޭ އަދަދު ކަނޑައެޅޭނީ އެ ފަރާތެއްގެ ބޭންކު އެކައުންޓުން ކަށަވަރުކުރެވޭ އާމްދަނީއަށް ބެލުމަށްފަހުގައެވެ. އަދި މި ސްކީމަށް ހުށަހަޅާ ފަރާތަކީ ވިޔަފާރީގެ ގޮތުގައި މަސައްކަތްކުރާތާ މަދުވެގެން 6 މަސް ވެފައިވާ މީހަކަށް ވާންޖެހެއެވެ.

މިއީ އަންހެނުންގެ ކުރިއެރުމަށް ދޫކުރެވޭ ލޯންތަކެއް ކަމުން، މި ލޯންތަކުން ކުރެވޭ މަސައްކަތްތައް އެސްޑީއެފްސީން މޮނިޓާ ކުރާނެ. އަދި އެހީތެރިކަން ބޭނުންވާ ފަރާތްތަކަށް އެހީ ފޯރުކޮށްދޭނެއެވެ.

މި ލޯނުތަކުގެ މައުލޫމާތު އެ ބޭންކުގެ ހޮޓްލައިން 1613 ނުވަތަ ވެބްސައިޓުން ލިބޭނެއެވެ.