އާޓިފިޝަލް ބީޗުގައި އަންހެނަކަށް އަނިޔާކުރި މައްސަލައެއް ތަހުގީގުކުރަމުންދާ ކަމަށް ފުލުހުން ބުނެފިއެވެ.

ފުލުހުން މީޑިޔާތަކަށް ފޮނުވި މެސެޖެއްގައި ބުނީ، ހޮނިހިރު ދުވަހުގެ ރޭގެ ވަގުތެއްގައި އާޓިފިޝަލް ބީޗުގައި އަންހެނަކަށް އަނިޔާކުރި މައްސަލައެއްގެ ރިޕޯޓް އެ އިދާރާއަށް ލިބިފައިވާ ކަމަށެވެ. އަދި މިހާރު އެ މައްސަލަ ފުލުހުން ތަހުގީގު ކުރަމުންދާ ކަމަށް ވެސް އެ މެސެޖުގައި ބުންޏެވެ.

އެހެން ނަމަވެސް އެ މައްސަލައިގެ އިތުރު ތަފްސީލެއް ފުލުހުން ދީފައިނުވެއެވެ.

ފުލުހުން އެފަދަ މައްސަލައެއް ބަލަމުންދަނީ، އެފަދަ ޙާދިސާއެއް ހިނގިކަމަށް ބުނެ، މީސް މީޑިޔާގައި ދައުރުވަމުންދާ ޕޯސްޓަކާ ގުޅިގެންނެވެ. އެގޮތުން އެ ޕޯސްޓު ކުރި މިހާގެ އާއިލާ މީހަކަށް، އޭނާގެ ކުރީގެ ފިރިމީހާ އަނިޔާކުރި ކަމަށް އެ ޕޯސްޓުގައި ބުނެފައިވެއެވެ.