ޕްރޮސެކިޔުޓަރ ޖެނެރަލް ހުސައިން ޝަމީމަށް ދިން ހަމަލާ އާ ގުޅިގެން ކުރީގެ ރައީސް އަދި އެމްޑީޕީގެ ރައީސް އިބްރާހީމް މުހައްމަދު ޞާލިހު ކުރެއްވި ޓްވީޓްގެ މާނަ ހޯމު މިނިސްޓަރ އަލީ އިހުސާން ވަނީ އޮޅުވާލައްވާފައިވާކަމަށް އެމަނިކުފާނު ވިދާޅުވެއްޖެއެވެ.

20 ވަނަ ރައްޔިތުންގެ މަޖިލީހަށް ކެންޑިޑޭޓުން ހޮވުމަށް އެމްޑީޕީން ހޮނިހިރު ދުވަހު ކުރިއަށްގެންދާ މަޖިލީސް ޕްރައިމަރީގެ ކަންކަން ހިނގާގޮތް ބައްލަވާލެއްވުމަށްފަހު ނޫސްވެރިން ކުރެއްވި ސުވާލަށް ޖަވާބުދެއްވަމުން ޞާލިހު ވިދާޅުވީ އެމަނިކުފާނު އެކްސްގައި ކުރެއްވި ޕޯސްޓްގައި ވިދާޅުވެފައިވަނީ ޕީޖީ ޝަމީމަށް ދިން ހަމަލާއަކީ ކޮންމެހެން ސިޔާސީ މަޤްސަދުގައި ދިން ހަމަލާއެކޭ ނޫންކަމަށެވެ. ނަމަވެސް ސިޔާސީ ވިސްނުމުގައި ހިންގާ މިކަހަލަ ކަންތައްތައް ހުއްޓުވުމަށް ވީހާ ވެސް ބޮޑަށް މަސައްކަތް ކުރުމަށް އެޓްވީޓްގައި ގޮވާލައްވާފައިވާކަމަށް ޞާލިހު ވިދާޅުވިއެވެ.

ރައީސް ޞާލިހު އެކްސްގައި ކުރެއްވި ޕޯސްޓަށް ރައްދުދެއްވަމުން ހޯމް މިނިސްޓަރ ވަނީ މިހަމަލާއަކީ ސިޔާސީ މަގްސަދެއްގައި ދިން ހަމަލާއެއްކަމަށް ޞާލިހު ވިދާޅުވެފައިވާކަމަށާއި އެހެންކަމުން މިހަމަލާ ދިނުމުގެ މަގްސަދާއި ހަމަލާ ދިން މީހުންގެ މުއުތަބަރު، ޞައްހަ މައުލޫމާތު ރައީސް ޞާލިހު އަށް އެނގިވަޑައިގަންނަވާކަމަށެވެ. އެހެންކަމުން އެމައުލޫމާތުތައް ފުލުހުންނާއި ހިއްސާކުރެއްވުމަށް އެދިވަޑައިގަންނަވާކަމަށާއި މިމައްސަލަ ތަހުގީގުކުރަމުން އަންނަ ފުލުހުންގެ ޓީމަށް މިކަމާއި ގުޅިގެން ރައީސް ޞާލިހުގެ ބަޔާނެއް ނެންގެވުމަށް އަންގަވާފައިވާކަމަށެވެ.

އެކަމަށް ރައްދުދެއްވަމުން ރައީސް ޞާލިހު ވިދާޅުވީ ފުލުހުން އެމަނިކުފާނާއި އަދި މިހާތަނަށް ސުވާލުކޮށްފައިނުވާކަމަށެވެ. އަދި މިކަމުގައި ހޯމް މިނިސްޓަރަށް ފުލުހުންނަށް އަމުރުކުރެވިދާނެތޯ އެއީވެސް ގާނޫނީ ގޮތުން ސުވާލު އުފެދޭކަމެއްކަމަށް ޞާލިހު ވިދާޅުވިއެވެ.

ޝަމީމަށް ދިން ހަމަލާއާ ގުޅިގެން ދެ މީހަކު ހައްޔަރުކޮށް ތަހުގީގު ނިމެންދެން އެ ދެ މީހުން ބަންދުކުރުމަށް ކްރިމިނަލް ކޯޓުން ވަނީ އަމުރުކޮށްފައެވެ. ޝަމީމަށް ދިން ހަމަލާއަކީ ކޮން މަގްސަދެއްގައި ދިން ހަމަލާއެއްކަމެއް އަދި ސާފެއް ނޫނެވެ.