މި ސަރުކާރުން ވަނީ މަރުގެ އަދަބު ތަންފީޒުކުރަން ނިންމާފައިކަމަށާއި، އެކަމަށްޓަކާ ބަލަން ޖެހޭ ކަންކަން ބަލަމުންދާކަމަށް ދާޚިލީ ސަލާމަތާއި ފަންނިއްޔަތާބެހޭ ވަޒީރު ޢަލީ އިޙުސާން ވިދާޅުވެއްޖެއެވެ.

ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި މި ސަރުކާރުން މަރުގެ އަދަބު ތަންފީޒްކުރުމާއި މެދު ދެކެނީ ކޮން ގޮތަކަށްތޯ ނޫސްވެރިއަކު ވަނީ ސުވާލުކޮށްފައެވެ. އެ ސުވާލަށް ޖަވާބުދެއްވަމުން މިނިސްޓަރ އިހުސާން ވިދާޅުވީ އެކަމާއި ގުޅިގެން ބަލަންޖެހޭ ގިނަ ކަންތައްތަކެއް އަދިވެސް އެބަހުރި ކަަމަށެވެ. އެހެންނަމަވެސް މަރުގެ އަދަބު ތަންފީޒްކުރުމުގެ ކަންކަން ސަރުކާރުން ކުރައްވާނެކަމަށް ވަޒީރު ވަނީ ވިދާޅުވެފައެވެ. އިހުސާން އިތުރަށް ވިދާޅުވީ މަރުގެ އަދަބު ތަންފީޒުކުރުމުގެ ކަންކަން ކުރާނީ ޤާނޫނާއި ޤަވާއިދުގެ ތެރެއިންކަމަށެވެ.

އިހުސާން އެހެން ވިދާޅުވި ނަމަވެސް މަރުގެ އަދަބު ތަންފީޒްކުރަން ފަށާނެ ތާރީހެއް އަދި އެކަން ކުރާނެ ގޮތުގެ މާބޮޑު ތަފްސީލެއް ނުދެއްވައެވެ. އިހުސާން އެހެން ވިދާޅުވެފައިވާތީ ރާއްޖޭގެ އިސް މަޤާމުތައް ފުރުއްވި ބައެއް ބޭފުޅުން ވަނީ މަރުގެ ޙުކުމް ތަންފީޒްކުރަން ވާނީ ވަރަށް ގިނަ ކަންކަން ބެލުމަށް ފަހުގައި ކަމަށް ވިދާޅުވެފައެވެ. އަދި އެއީ ޤައުމީ ބޮޑު މަޝްރޫޢު އެއް ކަަމަށް ދައްކާތީ ކަންބޮޑުވުން ފާޅުކޮށްފައިވެއެވެ. އެގޮތުން ކުރީގެ ރައީސް މައުމޫން އަބްދުލްޤައްޔޫމްވެސް ވަނީ އެކަމުގެ ކަންބޮޑުވުން ފާޅުކުރައްވާފައެވެ.

އެންމެ ފަހުން ރާއްޖޭގައި މަރުގެ އަދަބެއް ތަންފީޒު ކޮށްފައި ވަނީ، 953 ވަނަ އަހަރެވެ. އެއީ ސުމުއްވުލް އަމީރު މުޙައްމަދު އަމީންގެ ވެރިކަމުގައެވެ. ޕީޕީއެމްގެ ކުރީގެ ވެރިކަމުގައި ކުރީގެ ރައީސް އަބްދުﷲ ޔާމީންގެ ވެރިކަމުގައި މަރުގެ އަދަބު ތަންފީޒުކުރަން ގަވާއިދެއް އެކުލަވާލިއެވެ. އަދި ދަންޖައްސައިގެން ނުވަތަ ލީތަލް އިންޖެކްޝަން ޖަހައިގެން މަރުގެ އަދަބު ދޭން ނިންމިނަމަވެސް އެކަން ތަންފީޒްކޮށްފައެއް ނުވެއެވެ.