މާލޭސިޓީ މޭޔަރު އަދި ކައުންސިލްގެ މެންބަރުން ހޮވުމަށް ބާއްވާ ބައި-އިލެކްޝަންގައި ވާދަކުރައްވާ ކެންޑިޑޭޓުންގެ ނަންތައް ތަރުތީބުކޮށް ގުރުއަތު ނަގައިފިއެވެ.

ހޮނިހިރު ދުވަހު އިންތިޚާބީ މަރުކަޒުގައި ބޭއްވި ޚާއްސަ ރަސްމިއްޔާތެއްގައި ވަނީ ގުރުއަތު ނަގާފައެވެ.

މާލެސިޓީ ކައުންސިލްގެ މޭޔަރު އިންތިޚާބު ކުރުމަށް ބާއްވާ ބައި-އިލެކްޝަންގެ ކެންޑިޑޭޓުންގެ ނަންތައް ތަރުތީބު ކުރެވިފައިވާ ގޮތަށް ބަލާއިރު، ކެންޑިޑޭޓް ނަމްބަރު 1: އަމިއްލަ ގޮތުން ވާދަކުރައްވާ ޝުއައިބް އަލީ، ކެންޑިޑޭޓް ނަމްބަރު 2: އަމިއްލަ ގޮތުން ވާދަކުރައްވާ ކުރީގެ ޕޮލިސް ކޮމިޝަނަރ ހުސައިން ވަހީދު، ކެންޑިޑޭޓް ނަމްބަރު 3: ޕީއެންސީގެ ޓިކެޓުގައި ވާދަކުރައްވާ ކުރީގެ އެޓާނީ ޖެނެރަލް އާޒިމާ ޝަކޫރު އަދި ކެންޑިޑޭޓް ނަމްބަރު 4: އެމްޑީޕީގެ ޓިކެޓުގައިވާދަކުރައްވާ އެމްޓީސީސީގެ ކުރީގެ ސީއީއޯ އާދަމް އާޒިމް، އަދި ކެންޑިޑޭޓް ނަމްބަރު 5: ދަ ޑިމޮކްރެޓްސްގެ ޓިކެޓުގައި ވާދަކުރައްވާ ސައިފް ފާތިހް އެވެ.

މީގެ އިތުރުން މާލެސިޓީ ކައުންސިލުން ހުސްވެފައިވާ 3 ގޮނޑިއަށް ވާދަކުރައްވާ ކެންޑިޑޭޓުންގެ ނަންތައް ވެސް އިއުލާންކޮށް، ކެންޑިޑޭޓުންގެ ނަންބަރުތައް ކަނޑައަޅާފައެވެ.

މާލެ ސިޓީ ކައުންސިލުން ގޮނޑި ހުސްވެފައިވާ 3 ދާއިރާއަކީ ހެންވޭރު ދެކުނާއި، މާފަންނު ދެކުނުގެ އިތުރުން މެދު ހެންވޭރެވެ.

މާލެ ސިޓީ މޭޔަރު ކަމަށާއި، މާލެ ސިޓީ ކައުންސިލުން ހުސްވެފައިވާ 3 ގޮނޑިއަށް ކުރިމަތިލުމަށް ހުޅުވާލީ 28 ނޮވެންބަރު 2023 އިން 13 ޑިސެންބަރު 2023 އަށެވެ.

މާލޭ ސިޓީގެ ހުސްވެފައިވާ މޭޔަރުގެ މަގާމާއި، މެންބަރުން ހޮވުމަށް ބާއްވާ ބައި-އިލެކްޝަން އަންނަ އަހަރުގެ ޖެނުއަރީ މަހުގެ 13 ވަނަ ދުވަހު ބޭއްވުމަށް ވަނީ ނިންމާފައެވެ. މި އިންތިޚާބުގެ ރަސްމީ ނަތީޖާ އިއުލާނު ކުރާނީ ޖެނުއަރީ މަހުގެ 15 ދުވަހުއެވެ.