މުސްލިމުންގެ ބިންތަކެއް ނުހައްގުން ފޭރިގަނެ، އެވަރުންވެސް ހިތް ނުފުދިގެން ދިރިހުރުމުގެ ހައްގުންވެސް އެތައް ބަޔަކު މަހުރޫމުކުރަމުންދާ ޔަހޫދީ އިޒްރޭލުގެ ޝިކާރައަކަށް ހަދާފައިވާ ޣައްޒާގައި މިއަދު އެންމެ ބޮޑު ވޭނެއް އުފުލަމުންދާ އެއްބަޔަކީ ކުށެއް ނެތް، މައުސޫމް ތުއްތުކުދިންނެވެ. މިއީ ދެބަސްވެވެން ނެތް ހަގީގަތެކެވެ. ސަބަބެއް ނެތިއެއް ނޫނެވެ. 2007 ވަނަ އަހަރު ފަލަސްތީނުގައި އުފެދުނު ދާޚިލީ ހަމަނުޖެހުންގަނޑުގެ ތެރެއިން ޣައްޒާގެ ކޮންޓްރޯލް ނެގި ހަމާސް ޖަމާއަތަކީ އިޒްރޭލާއި، އިޒްރޭލަށްޓަކައި ދިފާއީ އަށްޑަނަ ހިއްލާލައިގެން އޮތް އެމެރިކާއާއި ހުޅަނގުގެ ގައުމުތަކުން ސިފަކުރާގޮތުގައި ޓެރަރިސްޓު ހަނގުރާމަވެރި ޖަމާއަތެކެވެ.
ޣައްޒާއަށް ދެމުންދާ ހަމަލާތަކަކީ ހަމާސްގެ ވަސް ފޮހެލުމަށް ދެމުންދާ ހަމަލާތަކެއްކަމަށް އިޒްރޭލުން ސިފަކުރެއެވެ. ނަމަވެސް، ހަގީގީ މަންޒަރު ބުނަނީ އެހެން ވާހަކައެކެވެ. އޮކްޓޯބަރު މަހުގެ 7 ވަނަ ދުވަހު ޣައްޒާއަށް ދޭން ފެށި ހަމަލާތަކަށް 2 ހަފުތާ ވީއިރުވެސް މަޑުޖެހުމެއް އައިސްފައި ނުވާއިރު، މަރުވި މީހުންގެ އަދަދު އުޅެނީ 4000ށްވުރެ މަތީގައެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ. އެތައް ހާސް ބަޔަކު ޒަޚަމްވެ، އެތައް ލައްކަ ބައެއްގެ ގެދޮރު ގެއްލިފައިވާއިރު، އޭގެ ތެރޭގައިވެސް ތުއްތުކުދިން ހިމެނޭ މިންވަރު މަދެއްނޫނެވެ. ބޯމައްޗަށް ބޮންތައް އަޅަމުން ދަނީ އެޔެއް މިޔެއް ބެލުމެއް ނެތިއެވެ. ހައްތަހާވެސް ހަމަ ހަމާސްގެ ހަނގުރާމަވެރިންތޯއެވެ؟
ޖިސްމާނީ އަނިޔާގެ އިތުރުން ޣައްޒާގެ ކުޑަކުދިން ތަހައްމަލު ކުރަމުންދާ ނަފުސާނީ ވޭނަކީ، ދުނިޔޭގެ އެހެން އެއްވެސް ހިސާބެއްގައި ހުރި މީހަކަށް ބަޔާންކޮށްދެވޭނެ ވޭނެއް ނޫނެވެ. އެ ދަރިން އުފުލަމުންދާ ވޭނަކީ، މައިލަގޮނޑިއަކަށް ކެތްވާވަރުގެ ކަމެއް ނޫންކަން، ޣައްޒާގެ މަންމައިން ކިޔައިދޭ ވާހަކަތަކުން ކިތަންމެހާ ސާފުކޮށްވެސް އެނގެން އެބައޮތެވެ.
ތަހްރީރް ތަބާޝްއަކީވެސް ހަމަ މިދެންނެވި ފަދަ މަންމައެކެވެ. ތަބާޝް ކިޔައިދިންގޮތުގައި، މިއަދު މީހަކު ގޮނޑިއެއް ދަމާލިއަސް އޭނާގެ ދަރިންކޮޅު އެ އަޑަށް ސިހެއެވެ. ބިރުގަނެއެވެ. އިޒްރޭލުގެ އުދުވާނީ ހަމަލާގެ އަޑުފަށްގަނޑު، އެކުދިންގެ ޅަ ސިކުނޑިތަކުގައި ބިންވަޅުނެގިފައިވާ މިންވަރުގެ ބޮޑުކަމުންނެވެ.
އަހަރެމެންގެ ދަރިން ރޭގަނޑު އުޅެނީ ވަރަށް ހާލުގަ. މުޅި ރޭ ހަތަރުދަން ދާނީ ރޮއި ގިސްލުމުގަ. ބޭއިޚްތިޔާރުގަ ގަޔަށް ކުޑަކަމުވެސް ދެވޭ. ދަރިއަކަށްފަހު ދަރިއެއް... ހުރިހާ ކުދިން ސާފުކުރާނެ ވަގުތެއްވެސް އަހަންނަކަށް ނުލިބޭ. މުޅިތަން މި އޮންނަނީ ފުރިފަ. ދަރިންނަކަށް އަޅައެއް ނުލެވޭ. ގައިން ތާހިރުކޮށެއް ނުދެވޭ. ހެޔޮ ހާލުގަ، ރަނގަޅު ސިއްހަތެއްގަ، ރައްކާތެރިކަމާއެކު ދިރިއުޅޭވޭނެ އެންމެ ޕަސެންޓެއްގެ މިންވަރުވެސް މިތާކު ނެތް. އެއްވެސް ކަހަލަ ރައްކާތެރި ކަމެއް ނެތް. ހަނގުރާމައިގެ ހަމަލާއެއްގަ މަރުނުވިއްޔާ، ބޮޑު ބަލިމަޑުކަމެއްގަ މަރުވެދިއުން އޮތީ.ތަހްރީރު ތަބާޝް؛ ޣައްޒާގައި ގެދޮރު ގެއްލިފައިވާ މައެއް
ތަބާޝްއާއި އޭނާގެ 6 ދަރިންނަކީ ގެދޮރު ގެއްލި، ވަގުތީ ހިޔާވަހިކަން ހޯދަމުންދާ، ޣައްޒާގެ އެތައް ސަތޭކަ އާއިލާއެއްގެ ތެރެއިން އެއް އާއިލާއެވެ. ތަބާޝްގެ އާއިލާ ދިރިއުޅެމުންދަނީ ޚާން ޔޫނިސްގައި އދ.ން ހިންގާ ސްކޫލެއްގައެވެ. ތަބާޝްގެ އާއިލާ އެތަނަށް ބަދަލުވީ، ޣައްޒާގެ އުތުރުގެ ސަރަހައްދު ދޫކޮށް ދިއުމަށް އިޒްރޭލުން ދިން އިންޒާރާ ގުޅިގެންނެވެ. ވަގުތީ ހިޔަލުގެގޮތުގައި ބޭނުންކުރަމުންދާ ސްކޫލް އިމާރާތަށް ބަދަލުވީ، އެއީ ރައްކާތެރި މަންޒިލަކަށް ވާނެކަމަށް ހީކޮށެވެ. ނަމަވެސް، ކައިރި ހިސާބުތަކަށް އިޒްރޭލުން ދެމުންދާ ހަމަލާތައް ތަބާޝްގެ ދަރިންނަށް ސާފުކޮށް ފެނެއެވެ.
އެއްވެސް ވަރެއްގެ ހަމަޖެހުމެއް ނެތް. ކޮންމެ މިނެޓަކުވެސް އެ ކުދިން އެ ތިބެނީ ބިރުން ސިހިސިހި. ހަމަލާއެއްގެ އަޑު ކީއްކުރަން، ގޮނޑިއެއް ދަމާލާ އަޑު އިވުނަސް، އެ ކުދިން ބިރު ސިހޭ އެބަ. އަހަރެމެންގެ ވަށައިގެން ހަމަލާތައް ދެމުން އެދަނީ. އެކަމާ އެކުދިން ވަރަށް ބިރުގަނޭ. ކައިރި ތަންތަނުން ދުންގަނޑު އަރަމުންދާ މަންޒަރު އެކުދިންނަށް ފެނޭ. އަހަރެމެންނާ ވަރަށް ގާތުންވެސް ތަންތަން ގޮއްވާ މަންޒަރު އެބަފެނޭ އެކުދިންނަށް. އަހަރެން ކީކޭ ބުނާނީ؟ތަހްރީރު ތަބާޝް؛ ޣައްޒާގައި ގެދޮރު ގެއްލިފައިވާ މައެއް
2.3 މިލިއަން މީހުންގެ އާބާދީއެއް އޮންނަ ޣައްޒާއަށް އަމާޒުކޮށްގެން އިޒްރޭލުން އުދުވާނީ ހަމަލާތައް ދެމުންދާތާ 2 ހަފުތާ ފާއިތުވެގެން ދިޔައިރު، ގެދޮރު ގެއްލުނު މީހުންގެ އަދަދު މިލިއަނަކަށްވުރެ މައްޗަށް އަރާފައި ވާކަމަށް އދ.ން ބުނެއެވެ.
އެމީހުން ހަމަލާ ދޭން ފެށީމަ އަހަރެންގެ 6 ދަރިން ގޮވައިގެން ސްކޫލަށް އައީ... އެކޮޅާ ބަލާފަ މިކޮޅު ރައްކާތެރިވީމަ. އެއީ، އެމީހުން ބުނި، ހިމާޔަތް ހޯދަން، ޚާން ޔޫނިސްގެ މެދަށް ދަތުރުކުރާށޭ. އަހަރެމެން އައީ މި ސްކޫލަށް. ކޮންމެ ކުލާހެއްގަ އެބަތިބި 100އެއްހާ މީހުން. ގިނައީ ކުޑަކުދިން.ތަހްރީރު ތަބާޝް؛ ޣައްޒާގައި ގެދޮރު ގެއްލިފައިވާ މައެއް
އިޒްރޭލުގެ ހަމަލާތައް ޣައްޒާއަށް އަމާޒުކުރަނީ ދުރާލައި އިންޒާރުދިނުމަކާ ނުލައެވެ. ދުރާލައި އިންޒާރު ދިނެއްކަމަކު، ވަންނާނެ ރައްކާތެރި ހިޔާވެއްސެއްވެސް ޣައްޒާގައި ނެތެވެ. އާބާދީގެ 80 އިންސައްތައަށްވުރެ ގިނަ މީހުންނަކީ އިންތިހާ ފަގީރު ހާލުގައި ދިރިއުޅޭ ބަޔަކަށް ވާއިރު، ބޮމުގެ ހަމަލާއަކުން ދިފާއުވުމަށް ވަންނާނެ 'ބޮމް-ޝެލްޓަރ'އެއް ވެސް ޣައްޒާގައި ނެތެވެ. އިޒްރޭލުން ދިފާއަށް ފަތުރާލައިގެން އުޅޭ މިސައިލުން ދިފާއުވާނެ 'އަޔަން ޑޯމް'އެއް ވެސް ނެތެވެ.
