ފާއިތުވެދިޔަ 2 މަސްދުވަހުގެ ތެރޭގައި މާލެ،ހުޅުމާލެ ބްރިޖް މަތީގައި ހިނގި 57 އެކްސިޑެންޓެއް ރިޕޯޓުކޮށްފައިވާކަމަށް ފުލުހުން ބުނެފިއެވެ.

ހޮނިހިރު ދުވަހު ރާއްޖެޓީވީގެ 'ފަސްކާފު' ޕްރޮގްރާމްގައި ވާހަކަފުޅުދައްކަވަމުން ޗީފް އިންސްޕެކްޓަރ މުހައްމަދު ލުޠުފީ ވިދާޅުވީ، އާންމު ގޮތެއްގައި ބްރިޖް އަދި ހައިވޭގެ އެކްސިޑެންޓްތައްވުމަށް ދިމާވާ މައިގަނޑު ސަބަބުތަކަކީ، އުޅަނދުތަކުގެ ސްޕީޑް ބާރުވުމާއި، އޮވަރޓޭކް ކުރުމާއި މިންގަނޑުތަކާއި ޚިލާފަށް ދުއްވުމެވެ.

މީގެއިތުރުން ސަބް އިންސްޕެކްޓަރ ހުސެއިން މައުރޫފް ވިދާޅުވީ، އެކްސިޑެންޓްތައް ހިނގަން މެދުވެރިވާ މައިގަނޑު ސަބަބުތަކަކީ، މަގުމަތީގައި ދުވުމަށް ހެދިފަހުރި ގަވާއިދުތަކާއި އުސޫލުތަކަށް ތަބާނުވުމާއި، މަގުގައި ކުރަހާފައި ހުންނަ ނިޝާންތަކަށް ސަމާލުނުވުމާއި، ދުއްވަން ކަނޑައަޅާފައި ހުންނަ މިންގަނޑުތަކަށް ތަބާނުވެ، ދުއްވުމުގައި މީހާ މަގަށް ދޭންޖެހޭ ސަމާލުކަން ނުދިނުންކަމަށެވެ.

އާންމުކޮށް އެކްސިޑެންޓްތައް ހިނގާ ސަރަހައްދުތަކުގެ ގޮތުގައި ފާހަގަކުރެވެނީ، ކުއްލިއަކަށް މަޑުކުރާ ސަރަހައްދުތައްކަމަށްވާ، ބްރިޖް ގެ ލައިޓް ހިމެނޭ ސަރަހައްދުތަކާއި ބްރިޖް ހައިވޭގެ 4 ލޭން އޭރިޔާކަމަށް ސަބް އިންސްޕެކްޓަރ ހުސެއިން މައުރޫފް ފާހަގަކުރެއްވިއެވެ.

މީގެއިތުރުން ޗީފް އިންސްޕެކްޓަރ މުހައްމަދު ލުޠުފީ ވިދާޅުވީ، އެކްސިޑެންޓްތައް ހިނގާކަމަށް ބޮޑަށް ފާހަގަކުރެވޭ ގަޑިތަކަކީ، ޕީކް އަވާރޒް، ބަންދު ދުވަސްތަކުގެ ހަވީރު ގަޑީގެ އިތުރުން އޮފީސް ނިމޭ ގަޑިތައްކަމަށެވެ.

ސަބް އިންސްޕެކްޓަރ ހުސެއިން މައުރޫފް އިތުރަށް ވިދާޅުވީ ފާއިތުވެދިޔަ 2 މަސް ދުވަހުގެ ރެކޯޑަށް ބަލާއިރު، ބްރިޖް އަދި ހައިވޭގެ 57 އެކްސިޑެންޓެއް ރިޕޯޓުކޮށްފައިވާކަމަށެވެ. އަދި އޭގެ ތެރޭގައި 4 ފުރޮޅުލީ އުޅަނދު އަދި 2 ފުރޮޅުލީ އުޅަނދު ޖެހިގެން ގިނަ އެކްސިޑެންޓްތައް ހިނގާފައިވާކަމަށް އޭނާ ފާހަގަކުރެއްވިއެވެ.

ބްރިޖް އަދި ހައިވޭ އެކްސިޑެންޓްތަކުގައި ގިނަ ބައެއްގެ ފުރާނައަށް ނުރައްކާވާކަމަށާއި، އަދި ބައެއް މީހުންނަށް އެކި ވަރުގެ އަނިޔާތައް ލިބޭކަމަށް ފުލުހުން މައުލޫމާތުދެއެވެ.