"ދިވެހި ބޭސް ކްލިނިކް" ގެ ނަމުގައި ހިންގާ ތަނެއްގެ ތެރޭގައި ހަށިވިއްކާ ކަމުގެ މައުލޫމާތު ފުލުހުންގެ އިންޓެލިޖެންސަށް ލިބުމުން ހިންގި އޮޕަރޭޝަނެއްގައި ހައްޔަރުކުރި ތިން މީހުނަށް ބަންދުގެ މުއްދަތު ޖަހައިފިއެވެ.
މި މައްސަލާގައި ހައްޔަރުކޮށްފައިވަނީ ތިން ދިވެހިންނެވެ. އަދި މި ތިން މީހުންނަށްވެސް ކްރިމިނަލް ކޯޓުން ވަނީ ބަންދުގެ މުއްދަތު ޖަހާފައެވެ.
ކްރިމިނަލް ކޯޓުން 35 އަހަރުގެ އަންހެން މީހާ އަށާއި 41 އަހަރުގެ ފިރިހެން މީހާގެ ބަންދަށް 10 ދުވަސް ދީފައިވާއިރު، 44 އަހަރުގެ އަންހެން މީހާގެ ބަންދަށް ކޯޓުން ދީފައިވަނީ ފަސް ދުވަހެވެ.
44 އަހަރުގެ އަންހެން މީހާގެ ބަންދަށް ކުރު މުއްދަތެއް ދީފައިވަނީ އޭނާ ހައްޔަރު ކުރި އިރު ފުލުހުން އަމަލު ކުރި ގޮތާއި ގުޅިގެން ވަކީލުންގެ ފަރާތުން މަޝްވަރާކުރުމަށް ބޭނުންވާ ކަމަށް ބުނުމުން ކަމަށް ކޯޓު އަމުރުގައި ވަނީ ބުނެފައެވެ. އަދި 35 އަހަރުގެ އަންހެން މީހާ އަކީ ކުށުގެ ރެކޯޑް އޮންނަ މީހެއް ކަމަށްވެސް ކޯޓު އަމުރުގައިވަނީ ބުނެފައެވެ.
