މޫސުމީ ނޭދެވޭ ބަދަލުތަކަކީ، އެންމެ ޒަމާނީ ޓެކްނޮލޮޖީއާއެކު ކުރިއަރާފައިވާ އަދުގެ ދުނިޔޭގައިވެސް އެކަށީގެންވާ މިންވަރުގެ ހައްލެއް ހޯދިފައިނުވާ، ސީރިއަސް މައްސަލައެކެވެ. ކުރިއަރާފައިވާ ގައުމުތަކާއި ހަލުވި ދުވެލީގައި ކުރިއަރަމުން އަންނަ ގައުމުތަކާއި ފަގީރު ގައުމުތަކުގައިވެސް މެއެވެ.
މޫސުމީ ނޭދެވޭ ބަދަލުތަކުން ކުރާ ސީދާ އަސަރާއި ނުސީދާ އަސަރުތައް ހުންނައިރު، ގަދަ ހޫނުގެ ކޮޅިގަނޑެއް ކަމުގައި ވިއަސް، ނުވަތަ ގަދަ ވިއްސާރައިގެ ކޮޅިގަނޑެއް ކަމުގައި ވިއަސް ނުބެދޭ މީހަކު މަދެވެ. ނެތޭވެސް ދެންނެވިދާނެއެވެ. މޫސުމީ ނޭދެވޭ ބަދަލުތަކަށް އަހުލުވެރިވުމަށް މަސައްކަތް ކުރަން ޖެހިފައިވަނީ އިންތިހާ ހަލުވި ދުވެލީގައެވެ. ދިރިއުޅުމުގެ ޒަމާންވީ އާދަތަކަށް ބަދަލު ގެންނަން މަޖުބޫރުވަނީ އެކަމަށް ރަނގަޅަށް ތައްޔާރުވެސް ނުވެވި ތިއްބައެވެ.
އަވައްޓެރި އިންޑިއާއަކީވެސް މޫސުމީ ނޭދެވޭ ބަދަލުތަކުގެ އިންތިހާ ގޮންޖެހުންތަކާ ކުރިމަތިލާންޖެހިފައި އޮތް ގައުމެކެވެ. ސީދާ އަސަރު ފޯރާ މީހުންނާއި ނުސީދާގޮތުން އެ ތަކުލީފުތައް އުފުލާ މީހުން ގިނަ ގައުމެކެވެ. ޖުލައި 26 ވަނަ ދުވަހު އިންޑިއާއިން މީޑިއާއާ ވާހަކަދެއްކި އެތައް ބައެއްގެ ފަރާތުން އިވުނު އެއް އަޑަކީ އެމީހުން ޓޮމާޓޯ ކެއުން ހުއްޓާލި ވާހަކައެވެ.
ބާޒާރުގަ ކޮންމެ ދުވަހަކުވެސް ޓޮމާޓޯގެ އަގުތައް ވަނީ ބޮޑު. ޖުލައި 25 ވަނަ ދުވަހު ޓޮމާޓޯ ކިލޯއެއް އުޅުނީ ގާތްގަނޑަކަށް 1.95 ޑޮލަރަށް. އެކަމަކު މިއަދު (ޖުލައި 26)ގަ ކިލޯއެއް މިއުޅެނީ 2.20 ޑޮލަރަށް.ރާމަން ކޫތީ ނަޔާރު؛ އިންޑިއާ ރައްޔިތެއް![]()
ކެއިންބުއިމުގެ ކަންކަމުގައި ތިޔާގި ޖާފަތްތަކާއި ސުފުރާތައް ފަތުރާލާ އިންޑިއާގެ ރެސްޓޯރަންޓުތަކުންވެސް ވަނީ، އެ ތަންތަނުން ތައްޔާރުކުރާ ކޭންތަކުގައި ޓޮމާޓޯ ބޭނުންކުރާ މިންވަރު މަދުކޮށްފައި ވާކަމަށް ބުނެފައެވެ. ވެގެން މިއުޅެނީ ކީއްހެއްޔެވެ؟ މޫސުމީ ނޭދެވޭ ބަދަލާ ޓޮމާޓޯއާ އޮތީ ކޮން ގުޅުމެއްތޯއެވެ؟
އިންޑިއާގެ ގިނަ ބަޔަކު ޓޮމާޓޯއާ ދުރު ނުވާންވީ ސަބަބެއް ނެތެވެ. އިންޑިއާގެ ބާޒާރުތަކުގައި މިއަދު ޓޮމާޓޯގެ އަގުތައް ވަނީ 500 ޕަސެންޓަށްވުރެ މައްޗަށް އުފުލިފައެވެ. އެ ތަރުކާރީއަކާ ނުލަޢި އިންޑިއާ ކޭމެއްގެ ރަހަ އެންމެ ފުރިހަމަނުވާނެ ކަމަށް އެންމެންވެސް އިއްތިފާގުވާނެ އެއް ތަރުކާރީއަކީ ޓޮމާޓޯއެވެ. ނަމަވެސް މިދިޔަ ހަފުތާތަކުގައި، އިންޑިއާގެ ބާޒާރުތަކުގައި ޓޮމާޓޯގެ އަގުތައް ވަނީ ރެކޯޑް މިންވަރަކަށް އުފުލިފައެވެ. ސަބަބު ގޮސް ގުޅެނީ މޫސުމީ ގަދަ ވިއްސާރައިގެ ކޮޅިގަނޑާއެވެ. އުފެއްދުންތެރިކަން އިންތިހާއަށް ދަށް މޫސުމެއްގައި ކުރުމަތިވި މޫސުމީ ކޮޅިގަނޑާއެކު، އިންޑިއާގެ ބާޒާރުތަކުގައި ޓޮމާޓޯގެ ސަޕްލައި ތަދު އެއްޗަކަށް ވިއެވެ. އަގުތައް ކޮންޓްރޯލް ކުރުމަށް، އިންޑިއާ ސަރުކާރުން ސަބްސިޑައިޒްކޮށްފައިވާ ވޭންތައްވެސް ނެރެން މަޖުބޫރުވިއެވެ.
އަހަރެން ޓޮމާޓޯ ކެއުން ހުއްޓާލައިފިން. މިތާ ޓޮމާޓޯ ކިލޯއެއް ވިއްކަނީ 140 ރުޕީޒްއަށް. ކޮލިޓީ ރަނގަޅެއް ނޫން. ހުރިހާ ތަރުކާރީއެއްގެ އަގުތައް އުފުލިއްޖެ. އަހަރެމެންނަށް ވަރަށް ދަތި. ބާޒާރުގަ ތަކެތީގެ އަގުތައް އުފުލިއްޖެ. އާންމުންނަށް ވަރަށް ބޮޑު އަސަރުކުރޭ އެބަ. ވަކިން ޚާއްސަކޮށް އަންހެންވެރިންނަށް މިކަމުން ކުރާ އަސަރު ބޮޑު.ބާބޫ ބާއީ؛ އިންޑިއާ ރައްޔިތެއް![]()
އިންޑިއާގައި އޮޕަރޭޓްކުރާ ބައިނަލްއަގުވާމީ ފެންވަރުގެ ވިޔަފާރިތައް ކަމަށްވާ މެކްޑޮނާލްޑްސްއާއި ސަބްވޭގެ އައުޓްލެޓްތަކުން ވަނީ، ޓޮމާޓޯ އެކުލެވޭ ބާވަތްތައް މެނޫއިންވެސް ނަގާފައެވެ. ޓޮމާޓޯ ބޭނުންކުރާ މިންވަރަށް ބަދަލު ގެނެސްފިނަމަ، އުފެއްދުމުގެ ފެންވަރަށް ނޭދެވޭ ބަދަލެއް އަންނާނެތީއެވެ. ބޭނުންކުރަންޖެހޭ މިންވަރަށް ޓޮމާޓޯ ބޭނުންކުރާނަމަ، ކާބޯތަކެތީގެ އަގުތަކަށް އަންނާނެ ނޭދެވޭ ބަދަލުތަކާ ހެދިއެވެ.
ކުރިން ޓޮމާޓޯ ކިލޯއެއް އުޅޭނީ ގާތްގަނޑަކަށް 60 ރުޕީޒްއާ 70 ރުޕީޒްއާ ދެމެދު އަގުތަކެއްގަ. އެކަމަކު، މިހާރު 130 ރުޕީޒްއަށް ކިލޯއެއް މިއުޅެނީ. އެހެންވީމަ، ކަސްޓަމަރުންނަށް ވަރަށް ދަތިވޭ. ވަކިން ޚާއްސަކޮށް ފަގީރުން، މުޅިން ހުއްޓާލައިފި ޓޮމާޓޯ ގަތުން. ގިނަ ބަޔަކު ޓޮމާޓޯ ކެއުންވެސް ހުއްޓާލައިފި. ދެން ތިބި ބަޔަކު، ޓޮމާޓޯ ބޭނުންކުރާ މިންވަރު މަދުކޮށްފި. ހޮޓާތަކުންވެސް ޓޮމާޓޯ ބޭނުން ނުކޮށް ވޭތޯ ބަލަނީ. އެހެންވެ، އަހަރެމެންނަކަށްވެސް ނޭނގެ އެމީހުންނަށް ޓޮމާޓޯ ވިއްކަންވީ ކޮން އަގެއްގަ ކަމެއްވެސް. މިތާ ކަންތައްތައް މިއޮތީ ވަރަށް ގޯސްކޮށް. ގޯސްވެގެން ގޮސް ވިޔަފާރިވެސް ނުހިނގާ.ސަންޖޭ އަގްނިހޯތުރީ؛ ހޯލްސޭލް ވިޔަފާރިކުރާ މީހެއް![]()
މި ހިނގާ 2022-2023 ވަނަ މާލީ އަހަރު، އިންޑިއާގެ ދައުލަތަށް ލިބޭ އާމްދަނީން މަހެއްގެ މައްޗަށް ބޮލަކަށް ޖެހޭ އެވްރެޖު މިންވަރު ނުވަތަ ޕަރ ކެޕިޓަލް އިންކަމް އުޅެނީ ގާތްގަނޑަކަށް 200 ޑޮލަރުގައެވެ. ކަން މިހެން އޮތްއިރު، ތަރުކާރީއަކީ ސިޔާސީ މައިދާނުގައި ހައްސާސް މައުލޫއެކެވެ. ތަރުކާރީގެ ބާވަތްތަކާއި އިންޑިއާގެ ސިޔާސީ އޮއިވަރާ އޮތް ގުޅުމުގެ މާޒީއަށް ބަލާއިރު، އިންޑިއާގެ ކޭންތަކުގައި އެންމެ ގިނައިން ބޭނުންކުރާ އެއް ބާވަތް ކަމަށްވާ ފިޔާގެ އަގުތައް އުފުލިގެން ދިޔަ ދިއުމުގެ ނަތީޖާއެއްގެ ގޮތުން، ސްޓޭޓް ފެންވަރުގެ ސަރުކާރުތަކެއް ވެއްޓިގެން ދިޔަ މަންޒަރު ވަނީ ފެނިފައެވެ.