ކުރާ މަސައްކަތްތަކުގެ އަގު، ހައްގުގޮތުގައި ވަޒަންކުރުމަށް ބާރުއެޅުމަކީ އެމީހަކު ނުކުރި ވަރަކުން އެހެން މީހަކު ކުރާނެ ކަމެއް ނޫނެވެ. އިންތިހާއަށް ހަލުވި ދުވެލީގައި ކުރިއަރަމުންދާ ޓެކްނޮލޮޖީގެ ރޭހުގައި ލާމެހިފައިވާ އަދުގެ ދުނިޔޭގައި، ލޯބޯފިއްސައިގެން އިންސާނުން ކުރަމުންދާ މަސައްކަތްތަކުގެ މައްޗަށް، މަސްނޫއީ ތޫނިފިލިކަން ނުވަތަ އޭއައި ޓެކްނޮލޮޖީ އަތްގަދަ ލކުރަމުން ދާ ދިއުމަކީ، ކުރިން މިދެންނެވި އަގު ވަޒަން ކުރުމުގެ ރޫހަށް އެޅޭ ހިޔަންޏެއްކަމަށް މިއަދު ގިނަ ބަޔަކު އިއްތިފާގުވެއެވެ.
މި ރޫހުގައި އެންމެ ބާރަށް މިއަދު އަޑު އުފުލަމުންދާ އެއް ބަޔަކީ ރައިޓަރޒް ގިލްޑް އޮފް އެމެރިކާ (ޑަބްލިއުޖީއޭ)ގެ ލިޔުންތެރިންނެވެ. ހޮލީވުޑްގެ ބޮޑެތި މަޝްރޫއުތަކެއްގައި މަސައްކަތްކޮށްފައިވާ ގިނަ އަދަދެއްގެ ލިޔުންތެރިން ޝާމިލުވާ ޑަބްލިއުޖީއޭއިން ލޮސް އެންޖަލީސްގައި ހުއްޓާނުލައި ހަޅުތާލުކުރާތާ ހޯމަ ދުވަހަށް ވަނީ 8 ހަފުތާ ވެފައެވެ. އެތައް ސަތޭކަ ލިޔުންތެރިންނެއްގެ އިތުރުން، އިއްތިހާދީ ބައިވެރިންނާއި އާންމުންގެ ތެރެއިން މިކަމަށް ތާއީދުކުރާ މީހުން ދަނީ މި ހަރަކާތުގައި ބައިވެރިވަމުންނެވެ. ލިޔުންތެރިންނަށް އެއްބާރުލުން ދެމުންނެވެ.
އެމެރިކާގެ އެންމެ ކާރޫބާރޫ ބޮޑު ސަރަހައްދުތަކުގެ ތެރޭގައި ގުނާލެވޭ ލޮސްއެންޖަލީސްގައި ކުރިއަށްދާ ހަޅުތާލުގައި ޚާއްސަ ހިނގާލުމެއް ކުރިއަށް ގެންގޮސްފައިވާއިރު، ކާރުތަކުގައި ތިބި މީހުން ވަނީ، ލިޔުންތެރިންނާ ބައިވެރިވުމުގެ ގޮތުން، އެމީހުންގެ ކާރުތަކުން ބާރުގޮނުއަޅާހަދާފައެވެ.
އަހަންނަށް ވިސްނިފަ މިއޮތީ ރަނގަޅަށް ކަމަށް ވަންޏާ، މިތާ މި ތިބީ މިވަގުތު އެއްވެސް ވަޒީފާއެއް ނެތިފަ ތިބި މީހުންހެން ހީވަނީ. މީ ވަރަށް މާޔޫސީ މަންޒަރެއް. މީ މިކަން އޮންނަންޖެހޭ ގޮތް ނޫންނަމަވެސް ވަރަށް މާޔޫސްވޭ. މި ހުރިހާ އެންމެންނަކީވެސް ވަރަށް ފަންނުވެރި ބައެއް. އެއީ ލިޔުންތެރިންގެ ކޮޓަރިތަކުގަ ތިބުން ހައްގު ބައެއް. ޝޮޓްތައް ނަގަމުން ދާއިރު، އެކްޓަރުން ކުރަންޖެހޭ ކަންކަން ކިޔައިދޭންވެސް ލިޔުންތެރިންގެ އެހީ ހޯދުން، އެމީހުންނަށް ހައްގު.ޖެސިކާ ބްރައުން؛ ލިޔުންތެރިއެއް
ލިޔުންތެރިން ކުރިއަށް ގެންދާ ހަޅުތާލުގެ މައިގަނޑު ޑިމާންޑްތައް އަމާޒުވެފައި އޮތީ މުސާރަ ބޮޑުކުރުމާއި، ސްޓްރީމްކުރާ މަސައްކަތްތަކުން ލިބޭ އާމްދަނީ ކަށަވަރުކުރުމާއި، މަސައްކަތްތައް ކުރިއަށްގެންދިއުމަށްޓަކައި މަސްނޫއީ ތޫނިފިލިކަން ބޭނުން ކުރުން މަނާކުރުމުގެ މައްޗަށެވެ.
މީހުންގެ ފަރާތުން ލިބެމުންދާ ފުރިހަމަ އެއްބާރުލުން އިހުސާސްކުރެވޭ. ޑީޖީއޭންވެސް އަދި އެސްއޭޖީ-އަފްޓްރާއިންވެސް އަހަރެމެންނަށް ވަރަށް އެއްބާރުލުން ދޭހެން ހީވަނީ. އެމީހުން މިހާރުވެސް އެ ދަނީ މަޝްވަރާ ކުރަމުން. ރަނގަޅު ޑީލެއް އެމީހުންނަށް ހެދޭނެ. އަހަރެމެންނަށް ރަނގަޅު ޑީލެއް ލިބޭނެކަމަށް އުއްމީދުކުރަނީ. ކުދިކުދި ފަރަގު ހުރިނަމަވެސް، އަހަރެމެން އެންމެ މި ވަކާލާތުކުރަނީ އެއްކަމަކަށްކަން އެންމެންނަށްވެސް އެނގޭނެހެން ހީވަނީ. ސްޓޫޑިއޯތަކުން ދަނީ އަހަރެމެން ފެލަމުން. އަހަރެމެން މަސައްކަތް މިކުރަނީ އަހަރެމެން އެކަމެއް ކުރަން ލޯބިކުރާ މަސައްކަތް، އުފެއްދުންތެރި މަސައްކަތެއްގެ ތެރެއިން އަބުރުވެރި ދިރިއުޅުމެއް އުޅުމަށް.ރަފައޭލް ބޮބް-ވެކްސްބަރގް؛ ލިޔުންތެރިއެއް
ޑަބްލިއުޖީއޭގެ މެންބަރެއް ކަމަށްވާ ޕެރީ ލަޕީދޫސް ބުނީ، ވީ އެންމެ އަވަހަކަށް މަސައްކަތަށް އެނބުރި ދިއުމަށް މަސައްކަތް ކުރަމުން ދާކަމަށާއި، ނަމަވެސް ލިޔުންތެރިންނަށް ހައްގު މިންވަރު ނުލިބެނީސް އެކަން ނުކުރާނެ ކަމަށެވެ.
އަހަރެމެން ބޭނުންވާ ހުރިހާ އެއްޗެއް ލިބެންދެން އަހަރެން މިކަން ކުރިއަށް ގެންދާނަން. އެންމެ ފުރަތަމަ ހަފުތާއިން ފެށިގެން އަހަރެން އެބައުޅެން މިކަމުގަ. ކޮންމެ ހަފުތާއަކުވެސް އެންމެ މަދުވެގެން 3 ހަޅުތާލެއްގަ އެބަ ބައިވެރިވަން. ރަނގަޅު ކޮންޓްރެކްޓެއްގަ ސޮއިކުރެވެންދެން އަހަރެން އުޅޭނީ މިގޮތަށް. ހުއްޓައެއް ނުލާނަން.ޕެރީ ލަޕީދޫސް؛ ލިޔުންތެރިއެއް
އެކްޓަރުންގެ ގިލްޑް ނުވަތަ އެސްއޭޖީ-އަފްޓްރާއިން ވަނީ އެލަޔަންސް އޮފް މޯޝަން ޕިކްޗަރ އެންޑް ޓެލެވިޜަން ޕްރޮޑިއުސަރޒް (އޭއެމްޕީޓީޕީ)އާއެކު މަޝްވަރާތަކެއް ކުރިއަށްގެންގޮސްފައެވެ. އެމްޕީޓީޕީއާއި ޑައިރެކްޓަރޒް ގިލްޑް އޮފް އެމެރިކާއިން ވަނީ، 2 އިއްތިހާދުގެ މެދުގައި އަމަލުކުރާނެ އުސޫލު ބަޔާންކުރާ، 3 އަހަރު ދުވަހުގެ ވަގުތީ އެއްބަސްވުމެއް އެކުލަވާލާފައިވާކަމަށް ބުނެފައެވެ. ޑަބްލިއުޖީއޭގެ މެންބަރުން އުއްމީދުކޮށްގެން ތިބީ، އިންސާފުވެރި ގޮތެއްގައި މައްސަލަ ހައްލުކުރެވި، ވީ އެންމެ އަވަހަކަށް މަސައްކަތަށް ނުކުމެވޭނެކަމުގެ އުއްމީދުގައެވެ.
