ވެރިކަމަށް އައުމަށްފަހުގައި، މަސްވެރިންނަށްޓަކައި ބޮޑެތި ބަދަލުތަކެއް ގެންނަން ފަށާފައިވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙު ވިދާޅުވެއްޖެއެވެ.

ފ. ފީއަލީގައި އަލަށް އިމާރާތް ކުރެވުނު އިންޖީނުގެއާއި، އޮފީސް އިމާރާތް އަދި އައިސް ޕްލާންޓް ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސް ވިދާޅުވީ ވެރިކަމަށް އައުމަށްފަހުގައި، މަސްވެރިންނަށްޓަކައި ބޮޑެތި ބަދަލުތަކެއް ގެންނަން ފަށާފައިވާ ކަމަށާއި، އެތައް ދުވަހެއް ވެގެންދިޔައިރުގައި ވެސް މިފްކޯ ތަރައްޤީ ކުރުމަށްޓަކައި މާބޮޑު މަސައްކަތެއް ކުރެވިފައި އޮތް ތަނެއް ފެނިވަޑައިނުގަންނަވާ ކަމަށެވެ.

ހަމައެކަނި މިފްކޯގެ އުޅަނދުތަކުގައި ހުރި މަސް ރައްކާކުރެވޭ ކެޕޭސިޓީއަށް އެކަނި ބަލައިލިނަމަވެސް، އެކަން ފާހަގަވިކަމަށް ރައީސް ވިދާޅުވިއެވެ. ރައީސް ވިދާޅުވީ ވެރިކަމާއި ހަވާލުވެވަޑައިގެންނެވި އިރު، އެ ކެޕޭސިޓީއަކީ 1727 މެޓްރިކް ޓަން ކަމަށާއި، މިއީ މުޅި ރާއްޖޭގައި ހުރި މިފްކޯގެ އުޅަނދުފަހަރަށް ކިރޭވަރު ކަމަށެވެ.

އެހެން ނަމަވެސް، މިހާރު އެ ޢަދަދު ވަނީ 5027 މެޓްރިކް ޓަނަށް ބަދަލުކުރެވިފައި ކަމަށާއި، މަސް ފިނިކޮށް ގަނޑުކުރުމުގެ ކެޕޭސިޓީއަށް ބަލާއިރުގައިވެސް، އޭރު ހުރީ އެންމެ 80 މެޓްރިކް ޓަނުގެ ކެޕޭސިޓީ ކަމަށެވެ. ޖަޒީރާ 103، މަސައްކަތަށް ނެރުމާ އެކީގައި މި ކެޕޭސިޓީ 500 މެޓްރިކް ޓަނަށް ބަދަލުކުރެވިއްޖެ ކަމަށް ރައީސް ވިދާޅުވިއެވެ. އަދި މުސްތަޤްބަލުގައި ތިން ބޯޓު ގެންނަކަން ފާހަގަކުރައްވާ ރައީސް ވިދާޅުވީ އެއާއެކީގައި، މި ކެޕޭސިޓީ ވެސް ބޮޑުތަނުން އިތުރުވެގެންދާނެ ކަމަށެވެ.

ރައީސް ވިދާޅުވީ ރާއްޖެއިން މަސް އެކްސްޕޯޓް ކުރާ ދެ މާކެޓަކީ، އިނގިރޭސިވިލާތާއި، ޔޫރަޕިއަން ޔޫނިއަން ކަމަށެވެ. އަދި އެ ދެފަރާތާ އެކީގައި މަޝްވަރާތަކެއް ކުރެވެމުންދާ ކަމަށާއި، ލަސްތަކެއްނުވެ އިރާދަކުރެއްވިއްޔާ، އެ މަޝްވަރާތަކުގެ ނަތީޖާ ލިބި، ރާއްޖެއިން ޔޫރަޕަށް ބޭރުކުރެވޭ މަހުގެ އަގަށް ރަނގަޅު އަގުލިބި، މިހާރު ނަގަމުންއެދާ ޑިއުޓީ ކަނޑާލުމުން، މަސްވެރިންނަށް ސަރުކާރުން ދޭ އަގު ބޮޑުތަނުން އިރާދަކުރެއްވިއްޔާ ރަނގަޅު ކުރެވިގެންދާނެ ކަމަށެވެ.