ކްރިމިނަލް ކޯޓާއި ސިވިލް ކޯޓުގެ އިސްގާޒީން ޖުޑީޝަލް ސަރވިސް ކޮމިޝަން (ޖޭއެސްސީން) އައްޔަނުކޮށްފިއެވެ.
ސިވިލް ކޯޓާއި ކްރިމިނަލް ކޯޓުގެ އިސްގާޒީ ކަމަށް ކުރިމަތިލުމަށް ކޮމިޝަނުން ކޮށްފައިވާ 02 އިޢުލާންގެ ދަށުން މި ދެ މަޤާމަށް ކުރިމަތިލީ ފަރާތްތަކާ "ފަނޑިޔާރުން ޢައްޔަންކުރުމުގައި ކޮމިޝަނަށް ލަފާދޭ ކޮމިޓީ"އިން ވަނީ އިންޓަރވިއު ކޮށްފައެވެ.
ކޮމިޓީން އިންޓަރވިއު ކުރުމަށްފަހު ކްރިމިނަލް ކޯޓުގެ އިސްޤާޒީ ކަމަށް ހަމަޖެއްސުމަށް ކޮމިޝަނަށް ލަފާ އަރުވާފައިވަނީ ޅ.ހިންނަވަރު، މާތިލަ، އަލްއުސްތާޛު އާދަމް މުޙައްމަދުއެވެ.
އަދި ސިވިލް ކޯޓުގެ އިސްޤާޒީ ކަމަށް ހަމަޖެއްސުމަށް ކޮމިޝަނަށް ލަފާއަރުވާފައިވަނީ ގއ.މާމެންދޫ، ފެހިގެ، އަލްއުސްތާޛު އަޙްމަދު ނިމާލް ޖުނައިދުއެވެ.
އެ ދެބޭފުޅުން އިސްގާޒީކަމަށް ހަމަޖެއްސުމަށް 2023 މޭ 03 ވަނަ ދުވަހު ބޭއްވުނު އެ ކޮމިޝަންގެ ބައްދަލުވުމުގައި ނިންމައި، 2023 މޭ 09 ވަނަ ދުވަހު ވަނީ ފަތްކޮޅު އަރުވާފައެވެ.
