ކެންސަރު ބަލި ތަހައްމަލު ކުރަމުންދާ ބަލި މީހުންނަށް ކީމޯތެރަޕީ ދިނުމަށް ޑރ.އަބްދުއްސަމަދު މެމޯރިއަލް ހޮސްޕިޓަލުގައި ކީމޯތެރަޕީގެ ޚިދުމަތް ދޭން ފަށައިފިއެވެ.
ހޮސްޕިޓަލުގައި ކީމޯތެރަޕީގެ ޚިދުމަތް އިފްތިތާހުކޮށްދެއްވީ ހޯމަ ދުވަހު އެ ހޮސްޕިޓަލުގައި ބޭއްވި ޚާއްސަ ރަސްމިއްޔާތެއްގައި ހޮސްޕިޓަލުގެ ޑެޕިއުޓީ ސީއީއޯ އަބްދުލްއަޒީޒް ރިފާއުއެވެ.
އެކަމާ ގުޅޭގޮތުން ހޮސްޕިޓަލުން ބުނީ، ރާއްޖޭގައި ކެންސަރު ބަލި ޖެހޭ މީހުންގެ އަދަދު ދުވަހަކަށް ވުރެ ދުވަހެއް އިތުރު ވަމުން އަންނަ އިރު، ހުވަދު އަތޮޅުގައި މި ފަރުވާ ހޯދުމަށް އާއިލާތަކުން ކުރާ ހޭދަ އަދި ވަގުތުގެ އިތުރުން އުފުލަން ޖެހޭ ތަކުލީފުތަކަށް ވަރަށް ބޮޑު ލުޔެއް ލިބިގެން ދާނެ ކަމަށެވެ.
އޭގެ އިތުރުން، ހުޅުމާލޭ ހޮސްޕިޓަލުގެ އެހީތެރިކަމާއެކު އެ ހޮސްޕޓަލްގެ ޑޮކްޓަރުންނާއި ނަރުހުން ކެންސަރު ބައްޔަށް ފަރުވާދިނުމަށް ތަމްރީނު ކުރުމުގެ މަސައްކަތް މިހާރު ކުރިއަށްދާކަމަށްވެސް ބުނެފައިވެއެވެ.
އަދި ދެމެހެއްޓެނިވި ގޮތެއްގައި މި ޚިދުމަތް ފޯރުކޮށްދިނުމުގައި އެސްޓީއޯގެ ދައުރު ފުޅާކޮށް، ޚިދުމަތް މެދުނުކެނޑޭނެ މަގަކުން މަސައްކަތްތަކެއް ކުރުމަށް އެސްޓީއޯއާއެކުވެސް ވަނީ މަޝްވަރާ ކުރެވިފައެވެ. މިއީ ހޮސްޕިޓަލުގެ ހިދުމަތްތައް އިތުރަށް ތަރައްގީ ކޮށް ހަރުދަނާ ކުރުމަށް ކުރެވޭ މަސައްކަތްތަކުގެ ތެރެއަށް އިތުރު ކުރެވުނު ބޮޅެއްގެ ގޮތުގައި އެ ހޮސްޕިޓަލުން ސިފަ ކުރެއެވެ.
މިދިޔަ ހަފްތާގައި އެ ހޮސްޕޓަލުން ވަނީ ލެޕްރޯސްކޮޕިކް ސާޖަރީގެ ހިދުމަތުގެ އިތުރުން، އެޑްވާންސްޑް ވޫންޑް ކެއާރގެ ޚިދުމަތްވެސް ފަށާފައެވެ.
