ދިގުރަށު ގޮނޑުދޮށް ހިމާޔަތް ކުރުމަށް އެމްޓީސީސީއާ ޙަވާލުކޮށްފިއެވެ.
ބުރާސްފަތި ދުވަހު މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ ގައި ބޭއްވި ރަސްމިއްޔާތެއްގައި މި މަޝްރޫއު ޙަވާލުކޮށްފައިވަނީ 12 މިލިއަން ރުފިޔާގެ އަގަކަށެވެ.
މި މަޝްރޫއުގައި މިނިސްޓްރީގެ ފަރާތުން ސޮއިކުރެއްވީ މިނިސްޓްރީގެ ޑިރެކްޓަރ ޖެނެރަލް ފާތިމަތު ޝާނާ ފާރޫޤެވެ. އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ޗީފް އެގްޒެކެޓިވް އޮފިސަރު އާދަމް އާޒިމްއެވެ.
މި މަސައްކަތް ނިންމުމަށް ދީފައިވަނީ 150 ދުވަހުގެ މުއްދަތެކެވެ.
މި މަސައްކަތުގެ ސްކޯޕްގެ ތެރޭގައި ހިމެނެނީ ރަށުގެ އުތުރުފަރާތުގައި 127 މީޓަރު ބޮޑު ހިލައިގެ ރިވެޓްމަންޓް ޤާއިމު ކުރުމާއި، ބެކްފިލް ކުރުމާއި، 15 މީޓަރުގެ ބޮޑު ހިލައިގެ ގްރޮއިން ޤާއިމު ކުރުމެވެ.
އަދި ރަށުގެ އިރުމަތީ ފަރާތުގައި 420 މީޓަރުގެ ސަރަޙައްދެއްގައި ޖިއޯޓިއުބް ޖައްސައި، އެ ސަރަޙައްދުގެ ގޮނޑުދޮށް ވެލިން މުއްސަނދިކުރުންވެސް ހިމެނެއެވެ.
މި މަޝްރޫއުގެ ދަށުން އެރަށުގައި ފާހަގަކުރެވިފައިވާ ރަށް ގިރުމުގެ މައްސަލަ ޙައްލު ކުރުމަށްޓަކައި ރަށުގެ ގޮނޑުދޮށް ހިމާޔަތް ކުރުމުގެ މަސައްކަތް ކުރިއަށްދާނެކަމަށް ޕްލޭނިންގ މިނިސްޓްރީން މައުލޫމާތު ދެއެވެ.
