މިހާރު ކުރިއަށްދާ ކ. ގުރައިދޫ ބައި އިލެކްޝަނުގައި ވޯޓުލުމުގެ ވަގުތު އިތުރުކޮށްފިއެވެ.

އިލެކްޝަންސް ކޮމިޝަނުން ބުނީ ވޯޓު ނެގުމަށްފަހު ހަމަޖެހިފައިވާ ވަގުތުގައި މޫސުން ގޯސްވުމުގެ ސަބަބުން ވޯޓުލާން ދިއުމަށް ދަތިވެފައިވާތީ ވަގުތު އިތުރު ކުރަން ނިންމީ ކަމަށެވެ. އެގޮތުން މިއަދު ހަވީރު 5:00 އާ ހަމައަށް ވަގުތު އިތުރު ކޮށްފައިވާ ކަމަށް އެ އިދާރާއިން ބުންޏެވެ.

އީސީން އާއްމުކޮށްފައިވާ ތަފާސްހިސާބުތައް ދައްކާގޮތުގައި މިއަދު މެންދުރު 2:00 އާ ހަމައަށް ވޯޓު ލާފައިވަނީ 1766 މީހުންނެވެ. އެއީ 910 ފިރިހެނުންނާއި 856 އަންހެނުންނެވެ.

ގުރައިދޫ ދާއިރާގެ ބައި އިލެކްޝަންގައި 3423 މީހުންނަށް ވޯޓު ލުމުގެ ޙައްގު ލިބިގެންވެއެވެ.