ތިބާ ބޭނުން ކަމެއް ކުރުމަށްޓަކައި ކަނޑުފަތާފައި ނަމަވެސް އެކަމެއް ކުރާނަމޭ އާންމުކޮށް ބުނެއުޅެނީ ގަދަ ބަހެއްގެ ގޮތުގައެވެ. ހާލަތު މަޖުބޫރުކުރުވާ ކަމެއްގެ ސަބަބުން، ކަނޑުފެތުންފަދަ ގޮންޖެހުމަކާ ކޮންމެ ދުވަހަކުވެސް ކުރިމަތިލާ ބަޔަކު އުޅޭކަން ދެނަހުރީ ތިޔައިގެތެރެއިން ކިތައް މީހުންބާއެވެ؟ ދައްކަން މިއުޅެނީ އަފްޣާނިސްތާނުގައި މަސައްކަތްކުރާ، ހިތްވަރުގަދަ ޓީޗަރުންތަކެއްގެ ވާހަކައެވެ. ބިއްލީ ހައިސްކޫލްގެ ޓީޗަރުން ކޮންމެ ދުވަހަކުވެސް ސްކޫލަށް ދަނީ ކޯރު ހުރަސްކޮށްފައެވެ. ފަތާފައި ނޫނެއްކަމަކު، ބޯޓެއް ނުވަތަ ފެރީއެއްގައެއްވެސް ނޫނެވެ. އެ ޓީޗަރުންގެ އޮޑިއަކީ ޓަޔަރު ހަމެވެ.
ކޯރު ހުރަސްކުރާކަށް ބުރިޖެއް ނެތް. ބުރިޖެއް އަޅަންޖެހޭ ތަނެއް މީ. ނޫނީ، އެއްފަރާތުން އަނެއް ފަރާތަށް އަހަރުމެން އުފުލާނެ ބޯޓެއް އޮންނަންޖެހޭނެ. މިތަކުލީފަށް ހައްލެއް އެބަ ބޭނުންވޭ ކޮންމެހެންވެސް.ދާރާ ޚާން ޚަކްސަރު؛ ބިއްލީ ހައިސްކޫލްގެ ޓީޗަރެއް
46 މީޓަރު ފުޅާ، އޮއެވަރު ބާރު ކޯރުގެ އެއް ފަރާތުން އަނެއް ފަރާތަށް ހުރަސްކޮށް، ސްކޫލަށް އައިސް ގޮސް ހެދުމަށްޓަކައި ޓަޔަރު ހަން ބޭނުންކުރުން ފިޔަވައި އެހެން ގޮތެއް އޮތްނަމަ، އަމިއްލަ ފުރާނަ އަތްމައްޗަށްލައިގެން އެ ޓީޗަރުންވެސް އެފަދަ ދަތުރެއް ނުކުރީސްކަން ޔަގީނެވެ.
ބިއްލީ ހައިސްކޫލަށް ދާން ކޮންމެ ދުވަހަކުވެސް ޓީޗަރުން މި ކޯރު ހުރަސްކުރޭ. މި ކޯރަކީ، ކުނާރު ޕްރޮވިންސަށް ނިސްބަތްވާ، ބޮޑު ކޯރެއް. ބަހާރު މޫސުން ފެށޭ އިރަށް، ކޯރުގެ ފެންގަނޑު ބޮޑުވޭ. އަހަރުމެން އެންމެންވެސް މި ކޯރު ހުރަސްކުރަނީ ޓަޔަރު ހަމުގަ. ބައިވަރު މައްސަލަތަކާ ގޮންޖެހުންތަކާ ކުރިމަތިވޭ މިގޮތަށް ކޯރު ހުރަސްކުރާއިރު. މީ ނުރައްކާ ބޮޑު، ބުރަ މަސައްކަތެއް.ދާރާ ޚާން ޚަކްސަރު؛ ބިއްލީ ހައިސްކޫލްގެ ޓީޗަރެއް
ކޯރުގެ އެއްފަރާތުން އަނެއް ފަރާތަށް ހުރަސްކުރާނެ ފާލަމެއް ނުވަތަ ބުރިޖެއް ނެތެވެ. ނުވިތާކަށް، ބާ ބޯޓުގަނޑެއްހާ ހިސާބުވެސްނެތެވެ. ޓަޔަރު ހަމުގައި ކޯރު ހުރަސްކުރުމުގެ ބިރުވެރި ދަތުރު ކުރާތާ މިހާރު އެތައް އަހަރެއް ފާއިތުވެއްޖެއެވެ. ގަދަވިއްސާރައާއެކު ބޮޑުވާ ކޯރުގެ ފެންގަނޑާއި އޮޔަށް އަންނަ ބަދަލުތަކަށްވެސް ބެލުމެއްނެތި ދަތުރުކުރަނީއެވެ. ސްކޫލުގައި ތިބި 15 މުވައްޒަފުންގެ ތެރެއިން 12 މީހުންގެ ހާލަކީ އެއީއެވެ.
މި ޓީޗަރުންގެ އެދުރުކަމުގެ ދަށުގައި ބިއްލީ ހައިސްކޫލްގައި 1040 ދަރިވަރަކު ދަނީ ތައުލީމު ހާސިލުކުރަމުންނެވެ. އޭގެ ތެރޭގައި، ޕްރައިމަރީ ގްރޭޑްތަކުގައި ކިޔަވާ އަންހެން ދަރިވަރުންވެސް ހިމެނެއެވެ.
އެކަށީގެންވާ ވަރަށް އަހަރުމެން އަތުގަ ޓެކްސްޓް ފޮތެއް ނެތް. ގުރޭޑް 9، 10، 11 އަދި 12ގެ ދަރިވަރުންނަށް ފޮތެއް ނެތް. އެންމެ ފަހުން އަހަރުމެންގެ ޕްރޮވިންސަށް ފޮތް ބެހިތާ މިހާރު ކިތަންމެ ދުވަހެއް. މި ސްކޫލަކަށް އެއްވެސް ވަރަކަށް ސަމާލުކަމެއް ނުދޭ.ނޫރު ރަހްމާން؛ ބިއްލީ ހައިސްކޫލްގެ ޓީޗަރެއް
ބިއްލީ ހައިސްކޫލް ހުޅުވީ 2004 ވަނަ އަހަރުއެވެ. ނަމަވެސް، ބޭނުންކުރާ ވަރަށް ސްކޫލުގެ އުމްރާނީ ހާލަތު ގޯސްކަމަށް، އަފްޣާނިސްތާނުގެ އޭރުގެ ތައުލީމާބެހޭ ވުޒާރާއިން އަންގަން ނެގީ އެންމެ 3 އަހަރު ދުވަހެވެ. އެ ސްކޫލްގައި މިއަދު ހުރީ އެންމެ 3 ކުލާސްރޫމެވެ. ގިނަ ކުލާސްތައް އޮންނަނީ ހާމަ ބިމުގައެވެ.
ނޫރު ރަހްމާނަކީ ޕަޝްޓޯ ބަސް އުނގަންނައިދިނުމުގެ މަސައްކަތުގައި ބިއްލީ ހައިސްކޫލްގައި 15 އަހަރު ހޭދަކޮށްފައިވާ ޓީޗަރެކެވެ. ނޫރު ވަނީ ސްކޫލު އޮތް ހާލަތު ބަޔާންކޮށްދީފައެވެ.
ކަލޭމެންނަށްވެސް ފެންނަން ތިހުރީ. އަހަރުމެންގެ ދަރިވަރުން އެ ކިޔަވަނީ ހާމަ އުޑުދަށުގަ. ބައެއް ފަހަރު ވާރޭވެހެން ފެށީމަ، ކުދިން ވަންނަނީ ކުލާސްތަކަށް. ދެތިން ކުލާހަށް. ރަނގަޅަށް ބަންދުވާ ތަނެއް ނެތް. ކުލާސް ނިންމާލާފަ، ޓީޗަރުންނަށްވެސް ތިބެން މަޖުބޫރު ވަނީ ބޭރުގަ. މަޑުކޮށްލާނެ އޮފީހެއް ނެތް. ކައިރިން ކާރެއް ދިޔަސް ދަރިވަރުންގެ ސަމާލުކަން ގެއްލޭ. ސްކޫލް އިމާރާތާ، ހުރިހާ ކުޑަދޮރުތަކެއްވެސް ހަލާކުވެފަ ހުރި މަންޒަރު ފެންނަން ތިހުރީ.ނޫރު ރަހްމާން؛ ބިއްލީ ހައިސްކޫލްގެ ޓީޗަރެއް
ނޫރުފަދަ އެހެން ޓީޗަރުންނަށް، ދިރިއުޅުމަށް އާމްދަނީ ހޯދޭނެ އެހެން ގޮތެއް ނެތެވެ. ސްކޫލްގައި ކުރާ މަސައްކަތުން މަހެއްގެ މައްޗަށް ގެއަށް ގެންދަން ލިބެނީ 69 ޑޮލަރާ 92 ޑޮލަރާ ދެމެދު އަދަދަކަށް ވާހާ އަފްޣާން ފައިސާއެވެ. ނޫރު ފާހަގަކުރިގޮތުގައި، ސްކޫލަށް ދިއުމަށް ކުރަންޖެހޭ ދަތުރަށް ޚަރަދެއް ނުހިނގިއެއްކަމަކު، ސްކޫލުން ލިބޭ އާމްދަނީން އާއިލާގެ ކަންކަން ދެކޮޅުޖައްސާލެވެނީ ހަމަ ކިރިޔާއެވެ.
ކޮންމެ ގޮތެއްވިއަސް ދިރިއުޅުން ދާނީ ކުރިއަށް. ޖުމުލަ ގޮތެއްގަ، މިތާ މިއޮތީ އިންތިހާ ފަގީރުކަން. އަހަރުމެންނަށް ކުރިމަތިލާންޖެހޭ ވަރަށް ގިނަ މައްސަލަތައް އެބަހުރި. އާއިލާއެއް ބަލަހައްޓާކަށް، އަހަންނަށް ލިބޭ އާމްދަނީއެއް ނުފުދޭ. އަހަރެންވެސް މިހުންނަނީ ދަރާފަ. ދަރަނީގެ މައްސަލަ، މަހުން މަހަށް ދަނީ އިތުރުވަމުން. ނުދެއްކި ހުރި ބިލުތަކާހެދި ބައެއް ފަހަރު ސޭޓާވެސް އެބަ ޖެހޭ ދެބަސްވާން.ނޫރު ރަހްމާން؛ ބިއްލީ ހައިސްކޫލްގެ ޓީޗަރެއް
އެތައް އަހަރަކަށް ދިގުލައިދިޔަ ހަނގުރާމައިގެ ސަބަބުން، މިއަދު އަފްޣާނިސްތާނަކީ މުޅި ދުނިޔޭގެ ނިސްބަތުންވެސް އެންމެ ފަގީރު ގައުމުތަކުގެތެރޭގައި ގުނާލެވޭ ގައުމެކެވެ. އެންމެ ކުޑަކޮށް ތަރައްގީވެފައިވާ ގައުމުތަކުގެ ލިސްޓުގައި އޮތް ގައުމެކެވެ. އޯގަސްޓް 2021ގައި، ހަތިޔާރު އެޅި ހަނގުރާމަވެރި ތާލިބާން ޖަމާއަތުން އަފްޣާނިސްތާނުގެ ކޮންޓްރޯލް ނެގުމާއެކު، ދަތި ދިރިއުޅުން އިތުރަށް ދަތިވިއެވެ.
ބޭނުންޖެހިފަ ތިބި މީހުންނާ ފަގީރުންނަށް އެހީތެރިކަމާ އެއްބާރުލުން ދޭން، ބައިނަލްއަގުވާމީ މުޖުތަމައަށް އަހަރެން ގޮވާލަން. ސަރުކާރުން އެބަޖެހޭ ރައްޔިތުންނަށް އެކަށީގެންވާ ދިރިއުޅުމެއް ހޯދައިދޭން.ނޫރު ރަހްމާން؛ ބިއްލީ ހައިސްކޫލްގެ ޓީޗަރެއް
އަފްޣާނިސްތާނަށް ކުރިން ލިބެމުން ދިޔަ އެހީގެ ދޮރުތައް ބަންދުވެ، ގައުމުގެ މާލީ ހާލަތު އިންތިހާއަށް ގޯސްވެ، ހީނަރުކަމުގެ ފުން އަނދަވަޅަކަށް ގައުމު ވެއްޓުނު ގޮތަށް އަދި އޮތީ އެކަމުން އަރައިނުގަނެވިއެވެ. އަފްޣާނިސްތާނަށް މިއަދު ކުރިމަތިވެފައިވާ ނުތަނަވަސްކަމުން ސަލާމަތްވެވޭނެ ދުވަހެއް، މަގެއް، އަދި ގޮތެއްވެސް ފެންނާކަށް ނެތެވެ. އަފްޣާނިސްތާނުގެ ކޮންޓްރޯލް ނެގި ތާލިބާނުންގެ ވެރިކަމެއްގައި އިންސާނީ ހައްގުތައް ނިގުޅައިގަންނަ ވާހަކަތައް ހުޅަނގުން ހަރު އަޑުން ފަތުރާއިރު، ބިއްލީ ހައިސްކޫލްގެ ހާލަތު އެދަރަޖައަށް ގޯސްވީ، ހަމައެކަނި ތާލިބާނުންގެ ވެރިކަމުގައި ހޭދަވީ ދޮޅު އަހަރެއްހާ ދުވަހުގެ ތެރޭގައި ކަމަށްވެސް ގަބޫލުކުރެވޭކަށްނެތެވެ.
