ހުރިހާ ވަޒީރުންނަށް ވެސް ސަރުކާރުގެ ހިންގާ ޕީޕީއެމް ކޯލިޝަންގެ ޕާލިމެންޓްރީ ގްރޫޕްގެ ފުރިހަމަ ތާއިދު އެބަ އޮތް ކަމަށް ޕީޕީއެމްގެ ޕީޖީ ގުރޫޕްގެ ލީޑަރު އަދި ވިލިމާލެ ދާއިރާގެ މެމްބަރު އަހުމަދު ނިހާން ވިދާޅުވެއްޖެއެވެ.
ފިޝަރީޒް މިނިސްޓަރު ޑރ މުހައްމަދު ޝައިނީ އިސްތިއުފާ ދެއްވަން ޖެހޭ ކަމަށް ވިދާޅުވެ ޕީޕީއެމްގެ ޕީޖީ ގުރޫޕްގެ މަހިބަދޫ ދާއިރާގެ މެމްބަރު އަހުމަދު ތޯރިގް (ޓޮމް) ދައްކަވާފައިވާ ވާހަކަތަކާ ގުޅިގެން ރާއްޖެއެމްވީން ކުރި ސުވާލަކަށް ޖަވާބު ދެއްވަމުން ނިހާން ވިދާޅުވީ ވަކިވަކި މެމްބަރުން އެ މެމްބަރުންނަށް ފެންނަ ގޮތްތައް ހާމަކުރެއްވުމަކީ އެ މެމްބަރުންގެ އަމިއްލަ ކަމެއް ކަމަށެވެ. އެގޮތުން ނިހާން ވިދާޅުވީ ވަކިވަކި މެމްބަރުން އެ މެމްބަރުންގެ އަމިއްލަ ހިޔާލުގެ ތެރޭގައި ފާޅުކުރާ ހިޔާލްތަކަށް އޭނާ ޖަވާބް ދެއްވަން ނުޖެހޭނެ ކަމަށާއި އޭނާއަކީ މެމްބަރުންގެ ތަރުޖަމާނެއް ނޫން ކަމަށެވެ.
ނިހާން ވިދާޅުވީ ކޮންމެ މެމްބަރަކަށް އެ މެމްބަރަކު ބޭނުންވާ ހިޔާލެއް ފާޅުކުރެއްވުމުގެ ފުރިހަމަ މިނިވަންކަން ލިބިގެންވާ ކަމަށާއި އެހެން ކަމުން މެމްބަރުން އަމިއްލަ ހައިސިއްޔަތުން ފާޅުކުރައްވާ ހިޔާލަށް ޕީޕީއެމްގެ ޕީޖީ ލީޑަރުގެ ހައިސީއްޔަތުން ޖަވާބު ދެއްވަން ނުޖެހޭ ކަމަށެވެ.
ނިހާން ވިދާޅުވީ ސަރުކާރުގެ އެއްވެސް ވަޒީރަކާ ގުޅޭ ގޮތުން ތާއިދު ގެއްލޭފަދަ ނުވަތަ ތާއިދު ނެތް ކަމަށް ވިދާޅުވެ ޕީޕީއެމް ކޯލިޝަންގައި އެއްވެސް ވާހަކަ އެއް އަދި މަޝްވަރާ އެއް ވެސް ކުރެވިފައި ނުވާ ކަމަށެވެ. މީގެއިތުރުން ނިހާން ވިދާޅުވީ ސަރުކާރުގެ ވަޒީރެއްގެ އިތުބާރު ނެތް ކަމަށް ބުނެ ނުވަތަ ތާއިދު ނެތް ކަމަށް ރައްޔިތުންގެ މަޖިލީހުގެ ސަރަކާރުގެ މަސްއޫލިއްޔަތު އަދާ ކުރާ މިންވަރު ބަލާ ކޮމެޓީ އަށް ވެސް އެއްވެސް މައްސަލައެއް ހުށަހަޅާފައި ނުވާ ކަމަށެވެ. އަދި ވިދާޅުވީ ވަޒީރެއްގެ އިތުބާރުގެ މައްސަލައެއް އުޅޭ ނަމަ މަސްއޫލިއްޔަތު ކޮމެޓީ އަށް ހުށަހަޅާނެ ކަމަށާއި މިހާތަނަށް އެފަދަ އެއްވެސް މައްސަލަ އެއް ހުށަހެޅިފައިވާ ކަމުގެ މައުލޫމާތެއް ވެސް ލިބިފައި ނުވާ ކަމަށެވެ.
މަހިބަދޫ ދާއިރާގެ މެމްބަރު ތޯރިގް އޭނާގެ ފޭސްބުކްގައި ވިދާޅުވީމަސްވެރިކަމުގެ ސިނާއަތުގައި މަސައްކަތްކުރާ ރައްޔިތުންގެ ދަތިތައް ހައްލު ނުވެގެން ދިއުމުގެ ޒިންމާ ޑރ. ޝައިނީ ނަންގަވަން ޖެހޭނެ ކަމަށެވެ.
ތޯރިގް ވިދާޅުވީ ޑރ. ޝައިނީ އިތުރަށް ފިޝަރީޒް މިނިސްޓަރުގެ މަގާމުގައި ހުންނަވައިގެން މަސްވެރިންނަށާއި މަސްވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ދިމާވެފައިވާ ދަތިތަކަށް ހައްލެއް ލިބިދާނެ ކަމަށް ގަބޫލު ނުކުރައްވާ ކަމަށެވެ.
ސަރުކާރުގެ މެނިފެސްޓޯގައި ހިމެނޭ "ބެޔަސް ނުބެޔަސް" ސިޔާސަތު ތިން އަހަރު ވީއިރު ވެސް ކާމިޔާބުވެފެއިނުވާއިރު މަސްވެރިން ބާނާ މަސް ގަނެވޭނެ އެންމެ ދަށް އަގެއް ކަނޑައެޅުމާބެހޭ ރެގިޔުލޭޓަރީ ބޮޑީ އުފެއްދުމަށް ރައްޔިތުންގެ މަޖިލީހުގެ ޕީޕީއެމް އަށް ނިސްބަތްވާ މެމްބަރުން އެދުނު އެދުން ކުރިއަށް ނުގެންދާ ކަމަށް ތޯރިގް ވިދާޅުވެފައި ވެއެވެ.
ތޯރިގް ވިދާޅުވީ މާލޭގެ ފަޅުން މަސްވެރިންނަށް ދިމާވާދަތިތަކަށް ހައްލުކޮށް މަސްވެރިންގެ ހައްގުތައް ހޯދައިދިނުމަށް މިނިސްޓަރު ޝައިނީ މަސައްކަތް ނުކުރައްވާ ކަމަށެވެ.
މީގެ އިތުރުންއޮޑިޓް އޮފީހުން މާލީއްޔަތުކޮމެޓީ އަށް ހުށަހަޅާފައިވާ ފިޝަރޯޒް މިނިސްޓްރީގެ ފާއިތުވެދިޔަ އަހަރުގެތަކުގެ އޮޑިޓްރީޕޯޓްތަކުގައި މާލީއްޔަތު ގަވާއިދާއި އަދި ބެސްޓްޕްރެކްޓިސްއާ ހިލާފަށް ހުރި ކަންކަން ރަނގަޅުކުރުމުންދާ ކަމަށް އޮޑިޓް ރިޕޯޓްތަކުން ނުފެންނަ ކަމަށް ވެސް ތޯރިގް ވިދާޅުވިއެވެ.
މީގެއިތުރުން ތޯރިގް ވިދާޅުވީ، ބޮޑު ކަންނެލި އެކްސްޕޯޓު ކުރާ ފަރާތްތަކާ މިނިސްޓަރާ މެދެދު ޖާއިޒް ނޫން ގުޅުންތަކެއް އޮންނަ ކަމަށް ގިނަ ފަރާތްތަކުން ބުނަމުން ދާ ކަމަށެވެ.
އެހެން ކަމުން ދިވެހިރައްޔިތުންނަށް އެންމެ ފައިދާ ބޮޑު ގޮތަކީ މިނިސްޓަރު ޝައިނީމަގާމުން އިސްތިއުފާ ދެއްވުން ކަމަށް ތޯރިގް ވިދާޅުވެފައި ވެއެވެ.
މި ނޫން ވެސް ގިނަ ތުހުމަތުތަކެއް ތޯރިގް ވަނީ ޝައިނީ އަށް ކުރައްވާފައެވެ. މި ކަމާ ބެހޭ ގޮތުން ރާއްޖެއެމްވީން ސުވާލުކުރުމުން ޝައިނީ ޖަވާބު ދެއްވީ ހިނިފުޅުވަޑުވާލެއްވުމަކުންނެވެ. އިތުރު އެއްޗެއް ވިދާޅެއް ނުވެއެވެ.
