އެމްޑީޕީގެ ރިޔާސީ ޕްރައިމަރީގެ ފޯރި އިންތިހާއަށް ބޮޑުވެފައިވާއިރު ދެ ކެނޑިޑޭޓުންގެ ފަރާތުން ތަފާތު ވާހަކަތައް ދަނީ ޢާއްމު ކުރަމުންނެވެ. ދެފަރާތުން ބަހުގެ ހަމަލާތަކާއި ރައްދުތައްދަނީ ކެނޑިނޭޅި ދެމުންނެވެ. ދެ ރައީސުންނަށް ތާއީދު ކުރާ ފަރާތްތަކުންވެސް މިހާރު އެއްބަޔަކު އަނެއް ބަޔަކަށް ނުގޮވާކަ އެއްޗެއް ނެތެވެ.
ރައީސް މުހައްމަދު ނަޝީދުގެ ފަޅިން އަދި މުޅިން ތަފާތު ކަމެއް ފެންނަން ފަށައިފިއެވެ. އެމަނިކުފާނު ޕްރޮމޯޓު ކުރުމުގައި އިދިކޮޅު ޕީޕީއެމް ޕީއެންސީގެ މީހުންނާއި އެޕާޓީތަކުގެ ސޯޝަލް މީޑިޔާގެ އެކްޓިވިސްޓުން ހަރަކާތްތެރިވާތަނެވެ. އަދި ކުރިން އެމަނިކުފާނަށް ވަރަށް ހަޑިހުތުރުކޮށްވެސް ފާޑު ކިޔަމުންދިޔަ އެފަދަ އިދިކޮޅު އެކްޓިވިސްޓުންދަނީ އެމަނިކުފާނަށް ހުޝާމިދު ކުރުމާއި އެމަނިކުފާނުގެ ފިކުރު ދިރުވުމުގައި އަވަދިނެތި މަސައްކަތް ކުރަމުންނެވެ. އަދި އެފަދަ ފަރާތްތައް ނަޝީދުގެ ކެމްޕެއިން ހަރަކާތްތަކުންވެސް ފެންނަމުން ދެއެވެ.
މިހެން މިކަން އޮއްވައި ހޯމަ ދުވަހު ރައީސް ނަޝީދު ބޭއްވި ޕްރެސް ކޮންފަރެންސްގައި މުޅިން އެހެން ވާހަކައެއް އެމަނިކުފާނު ވަނީ ވިދާޅުވެފައެވެ. ގިނަބަޔަކު ޤަބޫލު ކުރާގޮތުގައި އެއީ ބޮޑުތަނުން ތަފާތު އަދި އޭގައި ފޮރުވިފައިވާ ލައްކަ ވާހަކަތައް ހިމެނޭ ވާހަކައެކެވެ.
ރައީސް ނަޝީދު ވިދާޅުވީ ރައީސް އިބްރާހިމް މުހައްމަދު ސާލިހަށްވުރެ ކުރީގެ ރައީސް އަބްދުﷲ ޔާމީން ވެސް މާ ގާބިލުކަމަށެވެ. އެޕްރެސް ކޮންފަރެންސްގައި ރައީސް ޔާމީނަށް ވަރަށް ބޮޑަށް ތައުރީފު ކުރެއްވި އެވެ. ނަޝީދު ވިދާޅުވީ ޔާމީނަކީ "ކިޔަވައިގެން ހުރި، ތަންދޮރު ދަންނަ" ވަރަށް ގާބިލު ބޭފުޅެއް ކަމަށާއި ޔާމީނާ އޮތް ހަމައެކަނި ހިޔާލު ތަފާތުވުމަކީ "އިންޑިއާ އައުޓް" ކެމްޕެއިން ކަމަށެވެ.
"ރައީސް ޔާމީނަކީ އިންޓަލެކްޗުއަލް ބޭފުޅެއް. އެކަޑެމިކް ބޭފުޅެއް. ތަންދޮރު އެނގިވަޑައިގަންނަވާ ވިޝަނެއް ހުރި ބޭފުޅެއް. އަޅުގަނޑު ނުދެކެން އެއީ އެހާ ތަފާތު ބޭފުޅެއްގެ ގޮތުގައެއް،" ނަޝީދު ވިދާޅުވި އެވެ.
އަދި ރައީސް ސާލިހަށް އިޝާރާތްކުރައްވައި އެމަނިކުފާނަކީ އެފަދަ ބޭފުޅެއްކަމަކަށް ނުދެންނެވޭނެ ކަމަށް ރައީސް ނަޝީދު ވިދާޅުވިއެވެ.
"އަޅުގަނޑަކަށް ނުދެންނެވޭނެ މިހާރުގެ ރައީސް އެ ގޮތެކޭ." ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ރައީސް ޔާމީނާ އޮތް ހަމައެކަނި ޚިޔާލް ތަފާތު ވުމަކީ އިންޑިއާއައުޓް ކެމްޕޭން ކަމަށެވެ. ނަމަވެސް ރާއްޖޭގައި މިވަގުތު ކުރިއަށްދާ ބޮޑެތި ޕްރޮޖެކްޓްތަކަކީ އިންޑިއާގެ އެހީތެރިކަމުގައި އަދި އެޤައުމުގެ ކުންފުނިތަކުން ހިންގާ ޕްރޮޖެކްޓްތަކަށްވާއިރު ރައީސް ސާލިހުގެ އެފަދަ ތަރައްޤީގެ މަޝްރޫޢުތައް ލަސްކަމަށް ވިދާޅުވާ ރައީސް ނަޝީދު ވިދާޅުވީ އިންޑިއާއާ ދެކޮޅަށް ހިންގާ މިފަދަ ކަންކަމަކީ ވަރަށް ހުތުރު ކަންކަން ކަމަށާއި ގައުމެއް އައުޓޭ ކިޔައިފައި އެކަހަލަ "ޒެނޮފޯބިކް" ކަންކަން ކުރަމުން ގެންދިއުމަކީ އެއްގޮތަކަށް ވެސް ތަރައްގީވަމުން އަންނަ ގައުމެއްގެ ވިސްނުމަކަށް ވެގެން ނުވާނެ ކަމަށެވެ.
"އިންޑިއާ އައުޓް" ގެ މައްސަލާގައި ނަޝީދު ވިދާޅުވީ އެކަން އެގޮތަށް ނުކުރައްވަން ޔާމީނަށް ގުޅުއްވައި ތަކުރާރުކޮށް އެދިވަޑައިގެންފައި ވާނެ ކަމަށެވެ. އެކަމާ މެދު ޔާމީން ވިސްނަވައި، އެ ހިޔާލު ދޫކޮށްލެއްވުމަށް ވެސް ނަޝީދު އެދިވަޑައިގަތެވެ.
"އިންޑިއާއާ ދެކޮޅަށް ހިންގާ މިފަދަ ކަންކަމަކީ ވަރަށް ހުތުރު ކަންކަން. ކިހިނެއްތޯ، ގައުމެއް އައުޓޭ ކިޔައިފައި އެ ކަހަލަ "ޒެނޮފޯބިކް" ކަންކަން ކުރަމުން ގެންދިއުމަކީ އެއްގޮތަކަށް ވެސް ތަރައްގީވަމުން އަންނަ ގައުމެއްގެ ވިސްނުމަކަށް ވެގެން ނުވާނެ،" ނަޝީދު ވިދާޅުވި އެވެ.
ކުރިން ވަރަށް ބޮޑަށް ޕީޕީއެމްއަށާއި ރައީސް ޔާމީނަށް ފާޑު ވިދާޅުވަމުން ވަޑައިގެންނެވި ނަޝީދު ވިދާޅުވީ ޕީޕީއެމާއި ޔާމީނާމެދު އެއްވެސް ރުޅިވެރިކަމެއް އެ މަނިކުފާނުގެ ނެތް ކަމަށެވެ. އަދި އެމްޑީޕީގެ ޕްރައިމަރީގެ ކެމްޕެއިނަށް ރަށްރަށަށް ވަޑައިގަތުމުން ޕީޕީއެމްގެ މެންބަރުންވެސް އެ މަނިކުފާނަށް މަރުހަބާ ދެންނެވި ކަމަށްވެސް ނަޝީދު ވިދާޅުވި އެވެ.
މިފަހަކަށް އައިސް ރައީސް ޔާމީނާ ގުޅިވަޑައިގެން މަސައްކަތް ކުރެއްވުމުގެ ވިސްނުން ގެންގުޅުއްވާކަމަށް ދޭހަވާގޮތަށް ވާހަކަފުޅު ދައްކަވާ ނަޝީދު މިހާ ފާޅުކަން ބޮޑުގޮތެއްގައި މިގޮތަށް ވިދާޅުވި މީ ފުރަތަމަ ފަހަށެވެ.
ކޮންމެއަކަސް ރައީސް ނަޝީދުގެ މިވާހަކަތަކާއެކު ސޯޝަލް މީޑިއާއާއި އޮންލައިން ނޫސްތަކުގެ ކޮމެންޓްތަކުގައި ޕީޕީއެމް އަދި ޕީއެންސީ ސަޕޯޓަރުން އެމަނިކުފާނަށް ތައުރީފް އޮއްސަމުންދާއިރު، ރައީސް އިބްރާހީމް މުހައްމަދު ސާލިހަށް ތާއީދުކުރާ ފަރާތްތަކާއި ބައެއް އާއްމުން ދަނީ އެކަމަށް ވަރަށް ބޮޑަށް ފާޑު ކިޔަމުންނެވެ. އަދި ކޮރަޕްޝަނާއި މަނީ ލޯންޑަރިންގެ ކުށް ސާބިތުވެ ޖަލު ހުކުމެއް ތަންފީޒް ކުރައްވަމުން ގެންދަވާ ރައީސް ޔާމީންއަށް މިފަދަ ގޮތަކަށް ތާއީދު ކުރެއްވުމުގެ ފަހަތުގައި ބޮޑު ސިއްރުތަކެއް އެކުލެވިގެންވާނެކަމަށްބުނެ އެއްބަޔަކު ދަނީ ސުވާލު އުފައްދަމުންނެވެ.
