ފޭސްބުކްގެ ބެލެނިވެރި ކުންފުނި މެޓަ އިން ގިނަ ބަޔަކު ވަޒީފާއިން ވަކިކުރަން ފަށަނީ ބުދަ ދުވަހު ކަމަށް މީޑިއާ ރިޕޯޓްތައް ބުނެފިއެވެ.
ވޯލް ސްޓްރީޓް ޖާނަލް އިން ރިޕޯޓްކޮށްފައިވާ ގޮތުން އެތައް ސަތޭކަ އެގްޒެކްޓިވުންތަކަކަށް އަންގާރަ ދުވަހު ފޭސްބުކްގެ ސީއީއޯ މާކް ޒުކަބާގް ވަނީ މިކަން އަންގަވާފައެވެ.
އެގޮތުން ޒުކަބާގް ވަނީ އަންގާރަ ދުވަހު ބޭއްވި އެ ބައްދަލުވުމުގައި ކުންފުނީގެ މުވައްޒަފުން އިތުރުކުރި ކުރުން އެއީ އޭނަ ނިންމެވި ގޯސް ނިންމުމެއް ކަމަށް ވިދާޅުވެފައެވެ.
މެޓަ ކުންފުނީގެ ހިއުމަން ރިސޯސަސް ހެޑް ލޯރީ ގޮލަރ ވިދާޅުވީ ވަޒީފާ އިން ވަކިކުރާ މުވައްޒަފުންނަށް އެންމެ މަދުވެގެން ހަތަރު މަހުގެ މުސާރަ ކުންފުނިން ދޭނެ ކަމަށެވެ.
މިއަހަރުގެ ސެޕްޓެމްބަރު މަހާއި ހަމައަށް އެ ކުންފުނީގައި ޖުމްލަ 87،000 މުވައްޒަފުން ވަޒީފާ އަދާކުރާ ކަމަށް ތަފާސްހިސާބުތަކުން ދައްކައެވެ.
މީގެ ކުރިންވެސް އެ ކުންފުނީގެ ޓެކް ވަޒީފާގައި އުޅުނު ގިނަ ބަޔަކު ވަޒީފާއިން ވަކިކޮށްފައިވެއެވެެ. މިއީ އެ ސިނާއަތަށް ކޮވިޑަށްފަހު އަންނަމުންދާ ބަދަލުތަކުގެ ސަބަބުން ވަޒީފާގެ މާހައުލަށް އަންނަ ބަދަލުތަކެވެ. މިއީ ފަހުގެ ތާރީޚެއްގައި އެންމެ ގިނަ ބަޔަކު ވަޒީފާއިން ވަކިކުރާނެ ފަހަރު ކަަމަށްވެސް ރިޕޯޓްތަކުން ހާމަވެއެވެ.
މިފަހަރު ކުންފުނީގެ މުވައްޒަފުން މަދުކުރަން ކުރާ މަސައްކަތުގެ އަސަރު އެތައް ހާސް ބަޔަކަށް ކުރާނެކަމަށް ބެލެވެއެވެ.
މެޓަ ކުންފުނިން މިގޮތަށް ނިންމާފައިވާއިރު ދުނިޔޭގެ އެންމެ ބޮޑު އެއް ސޯޝަލް މީޑިއާ ކުންފުނި ކަމަށްވާ ޓްވިޓަރ އިން ވެސް ވަނީ 3000ށްވުރެ ގިނަ މުވައްޒަފުން ވަޒީފާ އިން ވަކިކޮށްފައެވެ.
