ޖުމްހޫރީ ޕާޓީ (ޖޭޕީ)ގެ މިހާރުގެ އަމާޒަކީ ޕާޓީއަށް މެމްބަރުން އިތުރުކުރުމާއި ޕާޓީ އިތުރަށް ވަރުގަދަކުރުންކަމަށް ޕާޓީގެ ކައުންސިލް މެމްބަރު އަދި މިނިސްޓަރ އޮފް ޓްރާންސްޕޯޓް އައިޝަތު ނަހުލާ ވިދާޅުވެއްޖެއެވެ.
ޖޭޕީއާ އަލަށް ގުޅުނު ފަރާތްތައް މެމްބަރުކަމުގެ ފޯމު ހަވާލުކުރުމަށް ބޭއްވި ރަސްމިއްޔާތަށްފަހު ވާހަކަދައްކަވަމުން ނަހުލާ ވިދާޅުވީ އެއް ޓީމެއްގެ ގޮތުގައި މަސައްކަތްކުރާ ބަޔަކަށް ޖުމްހޫރީ ޕާޓީ ހެދުމަކީ އަމާޒެއްކަމަށެވެ. އަދި މިހާރު ކުރިމަތިވަމުންދާ ކަންތައްތައް ބަދަލުކުރާނެ އިސްލާމިއްޔަތަށް ލޯބިކުރާނެ ޕާޓީއެއްގެ ގޮތުގައި އަބަދުވެސް ޖޭޕީ އޮންނައިރު ކުރިޔަށް އޮތްތަނުގައިވެސް ޖޭޕީއަށް އަލަށް މީހުން ގުޅޭނެކަމާމެދު ޝައްކުނުކުރައްވާކަމަށް ނަހުލާ ވިދާޅުވިއެވެ.
ޖުމްހޫރީ ޕާޓީއާއި އަލަށް ގުޅިފައިވަނީ އިރުޝާދުއްދީން ރަޝީދު އާއި މުވާޒުއްދީން ރަޝީދެވެ.
ޖޭޕީ އަކީ މިސަރުކާރުގެ ކޯލިޝަންގައި ހިމެނޭ ޕާޓީއަކަށްވާއިރު އަންނަ އަހަރު ބާއްވާ ރިޔާސީ އިންތިޚާބަށް އެޕާޓީގެ ފަރާތުން ކެންޑިޑޭޓަކު ނެރޭނެކަމަށް ޖޭޕީގެ ލީޑަރު އަދި މާމިގިލި ދާއިރާގެ މެމްބަރު ގާސިމް އިބްރާހީމް ވަނީ ވިދާޅުވެފައެވެ. ޖޭޕީގެ އަސާސީ ގަވާއިދު ބުނާގޮތުން އެޕާޓީގެ ރިޔާސީ ކެންޑިޑޭޓަކީ އެ އިރެއްގައި ހުންނަވާ ޕާޓީގެ ލީޑަރެވެ.
