ބްރޯޑްކާސްޓް ކުރާ ފަރާތްތައް ޖޫރިމަނާ ކުރުމުގެ ކުރިން މޯލްޑިވްސް ބްރޯޑްކާސްޓިން ކޮމިޝަން ޒިންމާދާރުވާންޖެހޭ ކަމަށް ވިދާޅުވެ ކޮމަންޑޫ ދާއިރާގެ މެންބަރު އަދި މީޑިއާނެޓްގެ އެގްޒެކްޓިވް ޑިރެކްޓާ ފައިނޭންސް އަހުމަދު ނާޝިދު (އޭޑީކޭ ނާޝިދު) ބްރޯޑްކޮމްގެ ރައީސް ޝަހީބަށް ބަހުގެ ހޫނު ހަމަލާތަކެއް ރަށްދުކުރައްވައިފިއެވެ.

ޗަމްޕާ ސެންޓްރަލް ހޮޓަލުގައި ބުރާސްފަތި ދުވަހުގެރޭ އޮތް ހަފުލާއެއްގައި ބްރޯޑްކޮމްގެ ރައީސް މުހައްމަދު ޝަހީބާއި ބައެއް މެންބަރުން ވެސް ތިއްބަވަނިކޮށް ބްރޯޑްކޮމްއަށް ވަރަށް ބޮޑަށް ފާޑު ވިދާޅުވަމުން ނާޝިދު ވިދާޅުވީ، ބްރޯޑްކާސްޓަރުން ބޮޑެތި އަދަދުތަކުން ޖޫރިމަނާ ކުރުމުގެ ކުރިން، މޯލްޑިވްސް ބްރޯޑްކާސްޓިން ކޮމިޝަނުން އެތަނުގެ ޒިންމާ އަދާކުރަންޖެހޭނެ ކަމަށް ދެކިވަޑައިގަންނަވާ ކަމަށެވެ.

ސަރުކާރުގެ ކޮރަޕްޝަންގެ އަމަލުތައް ކަމަށް ބުނެ އަލްޖަޒީރާ އިން ދެއްކި ތަހުގީގީ ރިޕޯޓު "ސްޓީލިން ޕެރަޑައިސް" ރީބްރޯޑްކާސްޓްކޮށްގެން މީޑިއާނެޓް 500،000 ރުފިޔާ އިން ޖޫރިިމަނާކޮށްފައި ވާ ދަނޑިވަޅެއްގައި، ޝަހީބަށް ނިސްބަތްކޮށް ނާޝިދު ވިދާޅުވީ، ކޮމިޝަން ޒިންމާދާރުވުމަށް ގޮވާލަނީ މީޑިއާނެޓް ޖޫރިމަނާ ކުރުމުން ނޫން ކަމަށާއި، އެފައިސާ ދައްކަވާނެ ކަމަށެވެ.  

ރާއްޖޭގައި ބްރޯޑްކާސްޓަރުން އެ މީހުންގެ ދައުރު އަދާކުރަނީ ވަރަށް އުނދަގުލުން ބޮޑެތި ގޮންޖެހުންތަކަކާ އެކު ކަމަށްވާއިރު، އަދި އެ މަސައްކަތް ކުރުމަށް ކޮމިޝަންގެ އެއްބާރުލުމާއި ހިމާޔަތް ބޭނުންވި ނަމަވެސް، އޭގެ ބަދަލުގައި އެތަނުން ކުރަނީ ބޮޑެތި ޖޫރިމަނާ ކަމަށް ނާޝިދު ވިދާޅުވިއެވެ. އަދި ބްރޯޑްކާސްޓިންގެ ދާއިރާ ތަރައްގީކޮށްދިނުމަށް މަސައްކަތްކޮށްދިނުމަށް ނާޝިދު ވަނީ ބްރޯޑްކޮމްްއަށް  ގޮވާލައްވާފައެވެ.

އަބުރާ ބެހުމަކީ އަދި އަބުރާ ބެހެވެނީ ކިިހިނެއްކަން ވެސް ބްރޯޑްކާސްޓަރުންނަށްނޭނގި އޮއްވައި، އަދި ބްރޯޑްކޮމް އިން ދޭން ޖެހޭ އެއްބާރުލުމާއި ސަޕޯޓް ނުދެވޭ ހާލުގައި، ކުރާ ކަމަކީ ބޮޑެތިހެން ހީވާ ޖޫރިމަނާތައް ކުރުން ކަމަށާއި، އެކަން ހުއްޓާލަންޖެހޭ ކަމަށް ނާޝިދު ވިދާޅުވިއެވެ.

އަބުރު ރައްކާތެރިކުރުމުގެ ނަމުގައި ފާސްކުރި ގާނޫނުގެ ސަބަބުން ހިޔާލުފާޅުކުރުން ހަނިވާކަން ފާހަގަކުރައްވަމުން ނާޝިދު ވިދާޅުވީ، އޭނާ ކޮންމެހެން ޝަހީބު އިންނެވި ހަފްލާއެއްގައި އެވާހަކަ ފާހަގަކުރައްވަނީ މީޑިއާނެޓް ޖޫރިމަނާކުރުމުން ނޫން ކަމަށާއި، މަޖިލީހުގެ މެންބަރެއްގެ ހައިސިއްޔަތުން ބްރޯޑްކާސްޓިން ކޮމިޝަން ޒިންމާދާރުކުރުވުމަށް ކަމަށެވެ.

އެ ހަފުލާގައި ނާޝިދުގެ ފަހުން ބްރޯޑްކޮމްގެ ރައީސް ޝަހީބު ވާހަކަ ދެއްކެވި ނަމަވެސް ކޮމިޝަނާ ގުޅޭގޮތުން ނާޝިދު ދެއްކެވި އެއްވެސް ވާހަކާއަކަށް ރައްދު ދެއްވާފައެއް ނުވެއެވެ.

"ސްޓީލިން ޕެރަޑައިސް" ދެއްކި މައްސަލައިގަ މީޑިއާނެޓް ޖޫރިމަނާކޮށްފައި ވަނީ މިދިޔަ އަންގާރަ ދުވަހުއެވެ. ބޮރޮޑްކާސްޓިން ކޮމިޝަނުގެ މެމްބަރަކު ވިދާޅުވީ މީޑިޔާނެޓަށް ފަސް ލައްކަ ރުފިޔާއިން ޖޫރިމަނާ ކުރީ "ގައުމާ ސަލާމަތަށް ނުރައްކާވާ ފަދަ ކޮންޓެންޓެއް ގެނެސްދީފައިވާތީ" ކަމަށެވެ. ޖޫރިމަނާ ކުރުމުގެ އިތުރުން މައާފަށް އެދި ބަޔާނެއް ނެރެން ވެސް މީޑިޔާނެޓަށް އެންގުމަށް ކޮމިޝަނުން ވަނީ ނިންމާފައެވެ. ނަމަވެސް އެކަން އަދި އެ ސްޓޭޝަނަށް އަންގާފައި ނުވާ ކަމަށް ވެއެވެ.

ދިވެހިސަރުކާރުން ހިންގާ ކަމަށް ތުހުމަތުކުރެވޭ ވައްކަމާއި ޚިޔާނާތާ ޖަރީމާތަކެއްގެ މައްޗަށް ގަތަރުގެ އަލް ޖަޒީރާ ޗެނަލުން ތައްޔާރުކުރި އިންވެސްޓިގޭޓިވް ޑޮކިއުމެންޓްރީ "ސްޓީލިން ޕެރެޑައިސް"އަށް ބައިނަލް އަގުވާމީ އެވޯޑެއް ވެސް ދާދި ފަހުން ލިބިފައެވެ. އަލްޖަޒީރާގެ ސްޓީލިންގ ޕެރަޑައިސް އަށް ލިބުނީ ކަރަޕްޝަން ރިޕޯޓިން އެވޯޑް އެވެ.

ސްޓީލިން ޕެރެޑައިސް އަލްޖަޒީރާއިން ދައްކާފައިވަނީ ސެޕްޓެމްބަރު 7، 2016 ވަނަ އަހަރުގައެވެ.

އަލްޖަޒީރާ އިން ދެއްކި ޑޮކިއުމެންޓްރީއެއް ރީބްރޯޑްކާސްޓްކުރި މައްސަލައިގަ މީޑިއާނެޓް ޖޫރިމަނާ ކޮށްފައިވާ އިރު އެމްޑީޕީގެ ހަރުގޭގައި ދެއްކި ވާހަކަތަކަކާ ގުޅިގެންނާއި ރާއްޖެ ޓީވީން ދެއްކި ޚަބަރަކާ ގުޅިގެން ރާއްޖެ ޓީވީ ޖުމްލަ 1.2 މިލިއަން ރުފިޔާ އިން ޖޫރިމަނާކޮށްފައިވާ އިރު އެ ކޮންޓެންޓްތައް ރީބްރޯޑްކާސްޓްކޮށްގެން މީޑިއާނެޓް ޖޫރިމަނާކޮށްފައެއް ނުވެއެވެ. އަދި މީޑިއާ ނެޓުން ދައްކާ ބައެއް ޗެނެލްތަކުގައި އިސްލާމްދީނާ ހިލާފު އަދި އެހެން ދީންތަކަށް ފެތުރުމަށް ބާރު އަޅައި ދޭ ދަރުސް ފަދަ ޕްރޮގްރާމްތައް ދައްކަމުންދާއިރު އެކަމާ ގުޅިގެން ވެސް ބްރޯޑްކާސްޓިން ކޮމިޝަނުން ފިޔަވަޅު އަޅާފައެއް ނުވެއެވެ.