އދ.ގެ ފަރާތުން އަންދާޒާކޮށްފައިވާގޮތުގައި މިހާރުވެސް ކުރިޔަށްދާ، ނިމުމެއް ފެންނަންނެތް ސީރިޔާ ހަގުރާމައިގައި ފާއިތުވި 10 އަހަރުތެރޭ 3 ލައްކައެއްހާ އާންމު ރައްޔިތުން މަރުވެފައިވެއެވެ. މިއީ ދެފަރާތުން ހަމަލާތަކުގައި ބައިވެރިވާ ސިފައިންނާއި މުޖާހިދުން ނުލައި މަރުވި މީހުންގެ އަދަދެވެ.

އިއުރޯ ނިއުސްއަށް ދެއްވި ބަސްދީގަތުމެއްގައި އދ.ގެ ސީރިޔާ ކޮމިޝަންގެ ރައީސް ޕައުލޯ ޕިނެއިރޯ ވިދާޅުވީ، މި އަދަދުން އެކަނިވެސް ސީރިޔާ ހަގުރާމައިގެ ކަންބޮޑުވުން އޮތް މިންވަރު ހާމަވާކަމަށެވެ.

އޭނާ ވިދާޅުވި ގޮތުގައި އދ.ން އެކުލަވާލި ރިޕޯޓުންވެސް ސާފުވާން އޮތް އެއް ހަގީގަތަކީ، ސީރިޔާގެ އާންމު ރައްޔިތުންގެ ރައްކާތެރިކަމާމެދު އެއްވެސް ފަރާތަކުން ވިސްނައި ނުވަތަ ފިޔަވަޅުއަޅާފައި ނުވާކަމެވެ.

ޕިނެއިރޯ އިތުރަށް ވަނީ ރެފިއުޖީންނަށް ހިމާޔަތް ދިނުމުގައިވެސް ސީރިޔާ ރެފިއުޖީންނާ ޔޫކްރެއިން ރެފިއުޖީންނާ ދެމެދު ގެންގުޅޭ "ޑަބަލް ސްޑޭންޑަރޑް" ނުވަތަ ދެފުށްދެގޮތް އުސޫލުގެ ސަބަބުން ހިތްޕުޅުހަމަނުޖެހުން ފާޅުކުރައްވާފައެވެ. ރަޝިޔާގެ ހަމަލާތަކުން ސަލާމަތްވުމަށް ގައުމު ދޫކޮށް ދާ ޔޫކްރެއިންގެ ރައްޔިތުންނަށް ލިބޭ އިނާޔަތްތަކާއި ހިމާޔަތް އެއީ އެމީހުންނަށްވެސް ހައްގު ކަންކަން ކަމަށާއި، ނަމަވެސް ހަމަ އެއިނާޔަތްތަކާއި ހިމާޔަތް ސީރިޔާގެ ރެފިއުޖީންނަށްވެސް ލިބެންޖެހޭނެ ކަމަށް އޭނާ ވިދާޅުވިއެވެ.  

ފެބްރުއަރީ 24ގައި ޔޫކްރެއިން ހަނގުރާމަ ފެށުމާ ގުޅިގެން އީޔޫގެ މައި އިދާރާއިން ވަނީ 2001ވަނަ އަހަރު އެކުލަވާލެވުނު ގާނޫނަކަށް އަމަލުކުރަން ފަށާފައެވެ. މި ގާނޫނުގެ ދަށުން، ހަގުރާމައިން ސަލާމަތްވުމަށް ދާ ޔޫކްރެއިންގެ ރައްޔިތުންނަށް އީޔޫގެ ގައުމުތަކުގައި 3 އަހަރުދުވަހުގެ މުއްދަތަށް ދިރިއުޅުމާއި ސިއްހީ ފަރުވާއާއި އަދި މަސައްކަތްކުރުމުގެ ހުއްދަ ދެވިގެންދެއެވެ. ހަނގުރާމަޔަކާ ކުރިމަތިލާން ޖެހިފައިވީނަމަވެސް، ސީރިޔާގެ ރައްޔިތުންނަށް ރެފިއުޖީ ހާލަތު އެންމެ ބޮޑުވި 2015 ވަނަ އަހަރުވެސް އެފަދަ ގާނޫނެއްގެ މަންފާ ލިބިފައިނުވާކަން ކޮމިޝަންގެ ޗެއަރ ފާހަގަކުރެއްވިއެވެ.

ސީރިޔާ ހަނގުރާމައިގައި ޖަރީމާތައް ހިންގަމުންދާ ފަރާތްތައް ބައިނަލްއަގުވާމީ އިންސާފުގެ ކޯޓުތަކަށް ހުށަހެޅޭނެތޯ ދެންނެވުނު ސުވާލެއްގެ ޖަވާބުގައި ޕިނެއިރޯ ވިދާޅުވީ، ކޮމިޝަންގެ ފަރާތުން އިންޓަރނޭޝަނަލް ކްރިމިނަލް ކޯޓަށް ސީރިޔާ ހަނގުރާމައިގެ މައްސަލަ ވެއްދޭނެކަމަށް މިވަގުތު ދެކެވަޑައިނުގަންނަވާ ކަމަށާއި، އދ.ގެ ސަލާތީ މަޖިލީހާ ހަމަޔަށް ގެންދިޔަނަމަވެސް ކަންތައް ވާނީ މިހާރުވެސް ކަންތައް ވަމުންދާ ގޮތަށް ކަމުގައެވެ. މިބަސްފުޅުން އޭނާ އިޝާރާތްކުރެއްވީ ސީރިޔާ ހަނގުރާމަޔާ ބެހޭގޮތުން ހުޅަނގުގެ ބައެއްގައުމުތަކުން ސަލާމަތީ މަޖިލީހަށް ހުށައެޅި ބައެއް ގަރާރުތައް ފާސްވިޔަނުދީ ރަޝިޔާއާއި ޗައިނާއިން ވީޓޯ ކުރަމުންދާ މައްސަލައަށެވެ. ރަޝިޔާއާއި ޗައިނާއިން ދެކެނީ ސީރިޔާ ހަނގުރާމައަކީ ޖާއިޒް ހަނގުރާމައެއްކަމަށެވެ. އެހެން ކަމުން އެދެގައުމުން ގެންދަނީ ސީރިޔާ ހަނގުރާމަޔާ ދެކޮޅަށް ހުށައެޅޭ ހުރިހާ ގަރާރެއް ވީޓޯކުރަމުންނެވެ،

އދ.ގެ ސީރިޔާ ކޮމިޝަންގެ ޗެއަރ ޕިނެއިރޯ ވިދާޅުވީ، އުފާވެރި ޚަބަރަކީ ސީރިޔާ ހަނގުރާމައިގައި ޖަރީމާތައް ހިންގަމުންގެންދާ ފަރާތްތަކާ ދެކޮޅަށް ޔޫރަޕްގެ ބައެއް ގައުމުތަކުން އަމިއްލަޔަށް ޝަރީއަތްތައް ކުރަމުންދާކަމެވެ.

މިދިޔަ ޖެނުއަރީ މަހު ޖަރުމަނުގެ ކޯޓަކުންހިންގި ޝަރީއަތެއްގައި ވަނީ، ހަނގުރާމައިގެ ޖަރީމާތައް ހިންގާފައިވާ މައްސަލައިގައި ސީރިޔާގެ ކާނަލްއެއްގެ މައްޗަށް ކުށް ސާބިތުވެ އުމުރު ދުވަހަށް ޖަލަށްލާން ހުކުމްކޮށްފައެވެ.