މޭވާއާއި ތަރުކާރީ ވިއްކާ ރާއްޖޭގެ ފިހާރަތަކުންވެސް އޮރެންޖް ގިތެޔޮމިރުސް އަދި ލުނބޯ ފަދަ ތަކެތީގެ އެފްރިކާގެ އުފެއްދުންތައް ފެނުން އައީ އާންމުވަމުންނެވެ. ޚާއްސަކޮށް ރަމަޟާން މަހު މިފަދަ ރީތި ބާވަތްތައް ފެނުން ގިނަވެއެވެ. އެފަދަ ބާވަތްތަކުގެ ފެންވަރު ވަރަށް ރަނގަޅެވެ. ރަނގަޅަށް ހައްދާ ދަނޑުތަކަކުން ނެރޭ ރަނގަޅު ފެންވަރުގެ ތަކެތިކަން އެނގެއެވެ.
ނަމަވެސް މިއަދު މިވަނީ ކުރިޔަށް އޮތްދުވަސްތަކުގައި މިތަކެތި ލިބުމުގެ އުންމީދު ފަނޑުވެފައެވެ. މައްސަލައަކީ ދަނޑުތައް ހައްދަން ބޭނުންކުރާ ފަރޓިލައިޒަރ ނުވަތަ ގަސްކާނާ ލިބުމުގެ ދަތިކަމެވެ.
ޓޮމާޓޯ ގިނައިން ހައްދާ އެއްގައުމުކަމަށްވާ ޓެންޒޭނިޔާގެ ދަނޑުވެރިއަކު ބުނި ގޮތުގައި އޭނާގެ ދަނޑުގައި އެކިބާވަތްތައް ހެއްދުން މިއަދުވަނީ ދަތި އުނދަގޫ ކަމަކަށް ވެފައެވެ. ސަބަބަކީ ގަސްކާނާ ލިބުމުގެ ދަތިކަން އިންތިހާއަށް ކުރިމަތިވެފައިވުމެވެ. އޭނާ ބުނިގޮތުގައި 50 ކިލޯގެ ބަސްތާއެއް 2019 ވަނަ އަހަރު 25 ޑޮލަރަށް ލިބޭއިރު މިއަދުވަނީ އޭގެ އަގު ދެގުނަ އަށް އުފުލިފައެވެ. އަދި އަގުބޮޑުކޮންވެސް ގަތުމަށް ތަކްލީފްތަކެއްވަނީ ކުރިމަތިވެފައެވެ.
މުޅި ދުނިޔެއަށް ވެސް މިވަގުތު ކުރިމަތިވެފައިވާ ގަސްކާނާ ލިބުމުގެ ދަތިކަމުގެ ފަހަތުގައިވެސް ވަނީ މިހާރު ކުރިޔަށްދާ ޔޫކްރެއިން ހަނގުރާމައެވެ. ރަޝިޔާ އަދި ޔޫކްރެއިން އަކީ ގަސްކާނާ އުފައްދާ އަދި އެކްސްފޯޓް ކުރާ ގައުމުތަކުގެ ލިސްޓުގެ ކުރީގައިވާ ދެގައުމަށް ވާއިރު އެދެގައުމުން އެއްޗެއް ބޭރު ކުރެވޭނެ ގޮތެއް ނެތި ބަންދުވުމުން މިކަން ވަނީ ވަރަށް ބޮޑު މައްސަލައަކަށް ވެފައެވެ.
އދ. އިން ހަދާފައިވާ އަންދާޒާތައް ދައްކާ ގޮތުން ގަސްކާނާ ލިބެން ހުރިވަރު ދެބައިކުޅައެއްބަޔަށް މިއަދު ވަނީ މަދުވެފައެވެ. އެއާއެކު ބައެއް ބާވަތުގެ ގަސްކާނާގެ އަގުވަނީ ތިންގުނަޔަށް އުފުލިފައެވެ. މިހެން ދިމާވުމުން ޓެންޒޭނިޔާފަދަ ފަގީރު ގައުމުތަކުގެ ދަންޑުވެރިންނަށް ވަނީ އުފުލައިނުގަނެވޭ ވަރުގެ ބުރަކަމެއް ކުރިމަތިވެފައެވެ. އަދި ނަތީޖާއެއްގެ ގޮތުން މައިގަނޑު ކާނާގެ ގޮތުގައި ބޭނުންކުރާ ގޮވާން ހެއްދުންވެސް ދަތިވެ ކާބޯތަކެތީގެ ދަތިކަން އިތުރަށް ބޮޑުވެގެން ދާނެއެވެ.
ވަރޑް ފުޑް ޕްރޮގްރާމްއިން އިންޒާރުގެ ބުނުމަކުން ހާމަކޮށްފައިވާ ގޮތުގައި ފަރޓިލައިޒަރުގެ ދަތިކަމާހުރެ ދުނިޔޭގައި އިތުރު ހަތް މިލިއަން މީހުންނަށް ކާބޯތަކެތީގެ ދަތިކަން ކުރިމަތި ވާނެ ކަމަށް ބެލެވެއެވެ. އެފަރާތުން ބުނެފައިވާ ގޮތުގައި ސީރިއަލް ޕްރޮޑަކްޝަންގެ މިންވަރު 2021 ވަނަ އަހަރު 45 މިލިއަން ޓަނުގައި ހުރިއިރު 2022 ވަނަ އަހަރު 38 މިލިއަނަށް ތިރިވާނެއެވެ.
އެހެންވެސް ގިނަ ގައުމުތަކެކޭ އެއްފަދައިން އެފްރިކާގެ ގިނަ ގައުމުތަކުންވެސް ބަރޯސާވަނީ ރަޝިޔާ ޗައިނާ އަދި ޔޫކްރެއިންގައި އުފައްދާ ފަރޓިލައިޒަރަށެވެ. ނަމަވެސް މިއަދު މިވަނީ އެކަމުގެ ދޮރު ބަންދުވެފައެވެ. އެހެން ގޮތެއް ހޯދަން މަޖުބޫރުވެފައެވެ.
އެފްރިކާގެ ގައުމުތަކުގެ އިތުރުން ސަރަހައްދީ ގައުމުތައް ކަމަށްވާ ސްރީލަންކާ އިންޑިޔާ އަދި ޕާކިސްތާނުގެ ދަނޑުވެރިންނަށްވެސް ވަނީ މިމައްސަލަ ވަރަށް ބޮޑަށް ކުރިމަތިވެފައެވެ.
