ފާއިތުމިވީ ފަސޭހަ ދުވަސްކޮޅެކެވެ. ދެ އަހަރަށްފަހު އާންމު ދިރިއުޅުމަށް ރުޖޫއަވީއެވެ. އެތައް ދައްޗަކާއި ތުރާލެއް ތަހައްމަލުކޮށްފައެވެ. ދެ އަހަރު ދުވަސް ވަންދެން މުޅި ގައުމު އޮތީ ސިއްހީ ކުއްލި ނުރައްކަލުގެ ހާލަތުގައެވެ. ކޮވިޑް-19ގެ ހާލަތު ހަމައަކަށް އެޅެންދެން މި ހާލަތުގައި، އެތައް ގޮންޖެހުމަކާއެކު ދިވެހިން ދުވަސްތަކެއް ހޭދަކޮށްފިއެވެ.

ދެ އަހަރަށްފަހު މީގެ ތިން މަސް ކުރިން، މާރޗް 13 ވަނަ ދުވަހު ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވަނީ ސިއްހީ ކުއްލި ނުރައްކަލުގެ ހާލަތު އުވާލައްވާފައިވާކަން އިއުލާނުކުރައްވާފައެވެ. ސިއްހީ ކުއްލި ނުރައްކަލުގެ ހާލަތު އުވާލުމާއެކު އެތައް ކަމަކަށް ލުއި ލިބިގެން ދިޔައެވެ. މާސްކު އެޅުމާއި، ގިނަ މީހުން އެއްވެ އުޅުން މަނާކޮށްފައި އޮތް އޮތުން އުވިދިއުމާއި، މިފަދަ އެތައް ކަމެއް އުވާލިއެވެ. އެއް ބަޔަކަށް ކުރެވުނީ، ބަންދެއްގައި ހުރެފައި މިނިވަންވި ކަމުގެ އިހުސާސެވެ.

ކޮންމެއަކަސް މިނިވަންކަންމަތީ، އެއްވެސް ރައްކާތެރިކަމުގެ ފިޔަވަޅެއް ނާޅައި ތިންމަސް އުޅެވިއްޖެއެވެ. މިވީ ދުވަސްކޮޅުގެ ތެރޭގައި އާންމު ދިރިއުޅުމުގައި މާސްކު ބޭނުންކުރީ މަދު ބައެކެވެ. މާސްކު އެޅުމުގެ ފިޔަވަޅު އުވާލިޔަސް، ރައްކާތެރިކަމުގެ ފިޔަވަޅެއްގެ ގޮތުން މާސްކު އެޅުމަކީ އެޗްޕީއޭއިންވެސް ބާރުއަޅާ ކަމެކެވެ. މަދު ބަޔަކު މާސްކު އަޅައިގެން އާންމު ދިރިއުޅުމުގެ ކަންކަން ކުރިނަމަވެސް ގިނަ މީހުން ކޮވިޑްގެ މަތިން ހަނދާން ނެތިފައި ތިބި ފަދައެވެ. އަދި ކޮވިޑަކީ ނެތް އެއްޗެއް ކަމަށް ހީކޮށްލައިގެންވެސް އެއް ބަޔަކު އެބަތިއްބެވެ.

މިހެން ތިއްބައި އެންމެންގެ ސަަމާލުކަން ކޮވިޑަށް ހުއްޓިގެން ދިޔައީ ކޮވިޑް ކޭސްތައް އިތުރުވަމުންދާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ހާމަކުރި ހިސާބުންނެވެ. ހިތަށް ހަމަޖެހުމެއް ގެނައުމަށްފަހު އަނެއްކާވެސް ހިތަށް ނުތަވަނަވަސްކަން ގެނައީއެވެ. ދެން ވާނީ ކިހިނެއްތޯ ސުވާލު އުފައްދަން ފެށީއެވެ. އެއްވެސް މީހަކު ބޭނުން ނުވިޔަސް އަނެއްކާވެސް ގުރުބާނީތަކެއް ވާންޖެހިދާނެ ހާލަތަކަށްވެސް ތިބެންޖެހެނީ ތައްޔާރުވެގެންނެވެ. ހަމަގައިމުވެސް މިހާރު ވަނީ މާސްކު އަޅައިގެން އުޅުމަށް އަންގާފައެވެ.

ދުނިޔޭގެ އެހެން ގައުމުތަކުގައިވެސް އަދިވެސް ކޮވިޑް-19 ފެތުރެމުން އެބަދެއެވެ. އެހެންނަމަވެސް ބައްޔަށް ޕޮޒިޓިވްވާ މީހުންގެ އަދަދު ކުރިއަށްވުރެ މަދެވެ. މިއާއެކު އެހެން ގައުމުތަކުންވެސް ވަނީ ގިނަ ފިޔަވަޅުތަކެއް ދޫކޮށްލާފައެވެ. މިގޮތަށް ތިއްބައި ދުނިޔޭގެ ސިއްހަތު ޖަމިއްޔާއިންވެސް ވަނީ އިންޒާރެއް ދީފައެވެ. ކޮވިޑް-19 ޕެންޑަމިކަކީ އަދިވެސް ދެމިއޮތް އެއްޗެއްކަމުގެ ހަނދާން މިވަނީ އައުކޮށްދީފައެވެ. މީގެ ކުރިން ކުރިމަތިލާފައިނުވާވަރުގެ ނުރައްކާތެރި ވޭރިއެންޓެއް ފެނިދާނެ ކަމާއި، ރައްކާތެރިކަމުގެ ފިޔަވަޅުތައް ވަރުގަދަކުރުމަށް ވަނީ ނަސޭހަތްތެރިވެފައެވެ.

މިއީ އާދައިގެ ކަމެއްގެ ގޮތުގައި ނުދެކުމަށް ދުނިޔޭގެ ސިއްހަތު ޖަމިއްޔާއިން އިލްތިމާސްކޮށްފައިވާއިރު، އަދިވެސް ވެކްސިން ނުޖަހާ ތިބި މީހުން ވެކްސިން ޖެހުން މުހިންމެވެ. ގައުމުތަކަށް ބޭނުންވާ ވަސީލަތްތައް ހޯދަން މަސައްކަތްކުރުން މުހިންމެވެ. ކޮވިޑްގެ ކޭސްތައް މަދުވިޔަސް ޕެންޑަމިކް ނިމެންދެން، ޕެންޑަމިކް ކުރިއަށްދާކަން ހަނދާންކޮށްދޭނެ ކަމަށް ދުނިޔޭގެ ސިއްހަތު ޖަމިއްޔާއިން ވަނީ ބުނެފައެވެ.