އިންޑިއާގެ ޑިފެންސްގެ ވެރިޔާ ޖެނެރަލް ބިޕިން ރަވަތު އަވަހާރަވުމާ ގުޅިގެން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް އެބޭފުޅާގެ އާއިލާއަށް ތައުޒިޔާ ވިދާޅުވެއްޖެއެވެ.

ރައީސް ސާލިހް ކުރެއްވި ޓުވީޓެއްގައި ވިދާޅުވީ, ބިޕިން ރަވަތު އަވަހާރަވި ޚަަބަރު އެއްސެވީ ފުން ހިތާމަޔާއެކު ކަމަށެވެ. 2019 ވަނަ އަހަރު ބިޕިންއާ ބައްދަލުވެވެވަޑައިގަތް ކަމަށާއި އެބޭފުޅާއަކީ ކަންކަމުގައި ގައުމު އިސްކުރެއްވި ނަމޫނާ ބޭފުޅެއް ކަމަށް ރައީސް ވިދާޅުވިއެވެ.

ރައީސް ސާލިހްގެ އިތުރުން ރައްޔިތުންގެ މަޖިލީހުގެ ރައީސާއި ރާއްޖޭގެ ފޮރިން މިނިސްޓަރ އަބްދުﷲ ޝާހިދު ވެސް ބިޕިން ރަވަތު އަވަހާރަވުމާއި ގުޅިގެން އާއިލާއަށް ތައުޒިޔާ ވިދާޅުވެފައެވެ.

ބިޕިން އަވާހަރަވީ އިންޑިއާގެ ވައިގެ އަސްކަރިއްޔާގެ ހެލިކޮޕްޓަރެއް ވެއްޓި ހިނގި ހާދިސާގައެވެ. މި ހާދިސާ ހިނގާފައިވަނީ ސުލޫރް އަވަށުން ޓަމިލްނާޑޫގެ ވެލިންގްޓަނަށް ދަތުތުކުރަމުން ދަނިކޮށް، ކޫނޫރު އަވަށް ކައިރިން ކަމަށެވެ. އިންޑިއާގެ ވައިގެ އަސްކަރިއްޔާއިން ބުނެފައިވަނީ ޖެނެރަލް ބިޕިންނާއި އޭނާގެ އަނބިކަނބަލުން އަވަހާރަވިއިރު، ޖުމްލަ 11 މީހަކު މި ހާދިސާގައި ނިޔާވެފައިވާ ކަމަށެވެ.

ރަޝިއާއިން އުފައްދާފައިވާ އެމްއައި 17ވީ5 މަރުކާގެ މި ހެލިކޮޕްޓަރު ދަތުރުކުރަމުން ދިޔައީ ޑިފެންސް ކޮލެޖްގައި ގާއިމްކޮށްފައިވާ ވައިގެ މަރުކަޒަކަށެވެ. ހެލިކޮޕްޓަރު ވެއްޓެން މެދުވެރިވި ސަބަބެއް މިހާތަނަށް ދެނެގަނެވިފައި ނުވާއިރު، މި ހާދިސާ ވަގުތުން ތަހުގީގުކުރުމަށް އިންޑިއާގެ ވައިގެ އަސްކަރިއްޔާއިން ވަނީ އަންގާފައެވެ.

މި ހާދިސާގައި ހެލިކޮޕްޓަރުން ދަތުރުކުރި ކެޕްޓަން ވަރުން ސިންގ ސަލަމާތްވި ކަމަށާއި، އޭނާއަށް އަސްކަރީ ހޮސްޕިޓަލުގައި ފަރުވާ ދެމުން އަންނަ ކަމަށް އިންޑިޔާގެ ވައިގެ އަސްކަރިއްޔާއިން މައުލޫމާތު ދީފައިވެއެވެ.

ޖެނެރަލް ބިޕިން، ޗީފް އޮފް ޑިފެންސް ސްޓާފްކަމަށް އައްޔަންކުރެވުނީ 2019 ވަނަ އަހަރުގައެވެ. އޭގެ ކުރިން އޭނާ ހުންނެވީ އިންޑިއާގެ އެއް މިލިއަން ފައުޖުގެ ޗީފްގެ ގޮތުގައެވެ.

އުމުރުފުޅުން 63 އަހަރުގެ ބިޕިން އަކީ ހިތްވަރުގަދަ އޮފިސަރެއްގެ އިތުރުން ނަމޫނާ ކޮމާންޑަރެކެވެ. ބިޕިން އުފަންވެވަޑައިގަތީ 16 މާޗް 1958ގައި އުތުރު އިންޑިއާގެ އުއްތަރަޚާންދަށެވެ.