މާލޭގެ ހޮސްޕިޓަލްތަކުގެ އޯޕީޑީއަށް މިދުވަސްވަރަކީ ބާރުބޮޑު ދުވަސްވަރެކެވެ. ކޮވިޑުން އެއްކޮށް އަރައިނުގަނެވެނީސް މާލޭގައި މިވަނީ އާންމު ރޯގާތައް އިންތިހާއަށް އިތުރުވެފައެވެ. އާންމު ރޯގާތަކުގައި ކުޑަކުދިން ހާލު ދެރަވާތަންވެސް އެބައާދެއެވެ. މިކަމާއި ގުޅިގެން ސިއްހީ ޚިދުމަތްތެރިންވަނީ ކަންބޮޑުވުންވެސް ފާޅުކޮށްފައެވެ.
ރާއްޖެޓީވީގެ ފަލަ ސުރުޚީ ޕްރޮގްރާމްގައި ވާހަކަ ދައްކަވަމުން ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ޓެކްނިކަލް އެޑްވައިޒަރީ ގްރޫޕްގެ މެމްބަރު ޑރ. ނަޒްލާ މުސްތަފާވެސް ވަނީ މިކަމާއި ގުޅިގެން ކަންބޮޑުވުން ފާޅުކުރައްވާފައެވެ.
ޑރ ނަޒްލާ ވިދާޅުވީ މާލެ ސަރަހައްދުގައި ކޮވިޑް ކޮންޓްރޯލް ކުރެވިފައިވާ ކަމަށެވެ. އެކަމަކު، އާންމު ރޯގާތައް އިންތިހާއަށް އިތުރުވެފައިވާ ކަމަށް ވިދާޅުވިއެވެ. އަދި މި ރޯގާގައި އެންމެ ބޮޑަށް އަސަރުކުރަނީ ކުޑަ ކުދިންނަށް ކަމަށާއި، އެހެން ކަމުން ރޯގާގެ އަލާމަތްތައް ފެންނަނަމަ ކުޑަކުދިން ސްކޫލަށް ނުފޮނުވުމަށް އިލްތިމާސްކުރެއްވިއެވެ.
ކުޑަކުދިން ސީރިއަސް ހާލަތަށް ދަނީ އެ ކުދިންގެ ދިފާއީ ނިޒާމް ބޮޑެތި މީހުންނާއި އަޅާބަލާއިރު ދަށްވުމުން ކަމަށްވެސް ޑރ ނަޒްލާ ވިދާޅުވިއެވެ.
ސްކޫލަށް ކުދިން ފޮނުވާން ބެލެނިވެރިން ބައެއް ފަހަރު މަސައްކަތް ކުރަނީ ސްކޫލަށް ނުދާނަމަ ފިލާވަޅުތައް ހޯދަން އުނދަގޫވުމުންނެވެ. އެހެންކަމުން އާންމު ރޯގާތައް އިންތިހާއަށް ގިނަވެފައިވާ މިދަނޑިވަޅުގައި ސްކޫލުތަކުން ވެސް ދަރިވަރުންނަށް ފަސޭހަ ގޮތަކަށް ގެއްލޭ ފިލާވަޅުތައް ލިބޭނެ ގޮތެއް ހަމަޖައްސައިދޭން ޖެހެއެވެ.
މާލޭގައި އާންމު ބަލިތައް އިތުރުވުމާއި ގުޅިގެން މައި ހޮސްޕިޓަލް ކަމަށްވާ އައިޖީއެމްއެޗްގައި ވަނީ ފްލޫ ކްލިނިކެއްވެސް ހުޅުވާފައެވެ. އައިޖީއެމްއެޗްއިން ބުނީ ފްލޫ ކްލިނިކެއް ހުޅުވީ އާންމު ބަލިތަކަށް ދައްކާ މީހުންގެ އަދަދު އިތުރުވަމުންދާތީއާ މާލޭގައި އާންމު ރޯގާތައް އިތުރުވެފައިވާ ކަމަށް ފެންނާތީ ކަމަށެވެ.
އާންމު ރޯގާގެ އަލާމަތްތަކުގެ ތެރޭގައި ހުން އައުން، ބޮލުގައި ރިއްސުން، އަރިދަފުސް ރޯގާ، ކެއްސުން، ނޭވާލާން އުނދަގޫވުން، ބޭރަށް ހިނގުން އަދި ހޮޑުލެވުން ހިމެނެއެވެ.
އާންމު ރޯގާތައް އިތުރުވެފައިވާ މިދަނޑިވަޅު އެކަމަށް ސަމާލުވެ އުޅުން ވަރަށް މުހިންމެވެ. އަދި ރޯގާގެ އަލާމާތެއް ފެނިއްޖެނަމަ ލަސްނުވެ ޑޮކްޓަރަށް ދައްކާ ފަރުވާ ހޯދުން މުހިންމެވެ.
