މަޖިލިސް 20

ބައެއް ވޯޓު ފޮށިތައް ބަންދުކޮށް ވޯޓު ގުނަން ފަށައިފިއެވެ.

މިހާރު ކުރިޔަށްދާ ރައްޔިތުންގެ މަޖިލީހުގެ އިންތިޚާބުގައި 5:30 ގައި ކިޔު ބަންދުކުރާނެކަމަށެވެ.

މިއަދު ކުރިޔަށްދާ ރައްޔިތުންގެ މަޖިލީހުގެ އިންތިޚާބުގައި ހަވީރު 4 ޖެހުމާ ހަމައަށް 63 އިންސައްތަ މީހުން ވޯޓު ލާފައިވާކަމަށް އީސީން ބުނެފިއެވެ.

މިހާރު ކުރިޔަށްދާ ރައްޔިތުން މަޖިލީހުގެ އިންތިހާބުގެ ސެކިއުރިޓީ އޮޕަރޭޝަންގައި މިހާތަނަށް ޖުމުލަ 3 މީހަކު ފުލުހުންގެ ބެލުމުގެ ދަށަށް ގެނެސްފައިވާކަމަށް ފުލުހުން ބުނެފިއެވެ.

މިހާރު ކުރިޔަށްދާ ރައްޔިތުންގެ މަޖިލީހުގެ އިންތިޚާބުގައި 56 އިންސައްތަ މީހުން ވޯޓު ލައިފިއެވެ.

ވޯޓުލާ ސަރަހައްދުތަކާއި އާންމު ތަންތަނުގައި ކެންޑިޑޭޓުން އާންމުންނާއި ބައްދަލު ނުކުރުމަށް އިލެކްޝަންސް ކޮމިޝަން (އީސީ)އިން އިލްތިމާސްކޮށްފިއެވެ.

އީސީން ބައެއް ކެންޑިޑޭޓުންގެ އެޖެންޓުންނަށް ފޮނުވި މެސެޖެއްގައި ބުނެފައި ވަނީ އާންމު ތަންތަނާއި ވޯޓުލާ ސަރަހައްދުގައި ކެންޑިޑޭޓުން އާންމުންނާ ބައްދަލު ކުރާ ނަމަ އެކަން ބެލެވޭނީ ކެމްޕެއިން ކުރުމުގެ ގޮތުގައި ކަމަށެވެ.

ވޯޓުލާ ސަރަހައްދުތަކާއި އާންމު ތަންތަނުގައި ކެންޑިޑޭޓުން އާންމުންނާއި ބައްދަލު ނުކުރުމަށް އީސީން އިލްތިމާސްކޮށްފައިވާއިރު، ކެމްޕެއިން ކުރުމުގެ ބައެއް މައްސަލަތައް އެޗްއާރްސީއެމްއަށް ވެސް ވަނީ ލިބިފައެވެ.

އީސީން ބުނީ ކެންޕޭން ކުރުން މަނާވަގުތު ކެންޕޭން ކުރާނަމަ ފިޔަވަޅު އަޅާނެ ކަމަށެވެ.

ރައްޔިތުންގެ މަޖިލީހުގެ އިންތިޚާބު 2024ގެ ވޯޓުލުން އޮބްޒަރވްކުރުމުގެ ތެރެއިން މިހާތަނަށް އެޗްއާރުސީއެމްއިން ފާހަގަކުރެވިފައިވާ ބައެއް ކަންތައްތަކުގެ ތެރޭގައި:

‏· ކަނޑައެޅިފައިވާ ވަގުތުގައި (08:00ގައި) ވޯޓުލާން ފެށިފައިވަނީ 77%މަރުކަޒެއްގައި. މައިގަނޑު ގޮތެއްގައި ވޯޓުލާން ފެށުން ލަސްވެފައިވަނީ އޮފިޝަލުން ވާން ޖެހޭ ތައްޔާރީތައް ވުމަށް ލަސްވުމުގެ ސަބަބުން.

‏· އޮބްޒާވް ކުރި ފޮށިތަކުގެ ތެރެއިން އެންމެ ލަހުން ވޯޓުލުން ފެށިފައިވަނީ 8:35 ގައި.

‏· ހުރިހާ ވޯޓުލާ ސަރަހައްދެއްގައިވެސް މަރުކަޒު ފާހަގަވާގޮތަށް ދާންވާ މަގު އަންގައިދިނުމަށް ރަގަޅު އިންތިޒާމްތަކެއް ހަމަޖެހިފައިވާކަން ފާހަގަކުރެވިފައިވޭ.

‏· މިހާތަނަށް މައްސަލަތަކެއް ފާހަގަކުރެވިފައެއް ނުވޭ. ވޯޓުލުމުގެ ކަންކަން އަމާންކަމާއެކު ކުރިއަށްދޭ.

އެމްޑީޕީގެ ރައީސް އަބްދުﷲ ޝާހިދު ވޯޓު ލައްވައިފިއެވެ.

މިހާރު ކުރިޔަށްދާ ރައްޔިތުންގެ މަޖިލީހުގެ އިންތިޚާބުގައި މިއަދު 12 ޖެހުމާ ހަމައަށް ވޯޓުލާފައިވަނީ 93،224 މީހުންކަމަށް އީސީން ބުނެފިއެވެ.

މިއީ 32.75 އިންސައްތަ މީހުންނެވެ.

މާލެ ސިޓީގެ މޭޔަރ އާދަމް އާޒިމް ވޯޓުލައްވައިފިއެވެ.

ތިން ގަޑިއިރުގެ ތެރޭގައި ވޯޓުލާފައިވަނީ 24 އިންސައްތަ މީހުންކަމަށް އީސީން ބުނެފިއެވެ. އެއީ 70،949 މީހުންނެވެ.

ކުރީގެ ނައިބު ރައީސް ފައިސަލް ނަސީމް ވޯޓު ލައްވައިފިއެވެ.

މިއަދު ކުރިއަށްދާ ރައްޔިތުންގެ މަޖިލީހުގެ އިންތިޚާބުގެ ވޯޓުލުން ކުރިއަށްދާއިރު ގްރޭޓާމާލޭގެ އިތުރުން 18 އަތޮޅެއްގެ 35 ރަށަކާއި، 1 ޖަލެއްގައި ބެހެއްޓިފައިވާ ވޯޓުފޮށިތައް އޮބްޒަރވްކުރުމަށް އެޗްއާރުސީއެމުން އަންނަނީ ހަރަކާތްތެރިވަމުންނެވެ. އެގޮތުން ޖުމްލަގޮތެއްގައި އަތޮޅުތެރޭގެ 93 މަރުކަޒަކާއި، ގުރޭޓާ މާލޭގެ 168 މަރުކަޒަކާއި، ޖަލުގައި ބެހެއްޓޭ 2 މަރުކަޒެއް ހިމެނޭގޮތުން ޖުމްލަ 263 މަރުކަޒެއްގައި ބަހައްޓާފައިވާ ވޯޓުފޮށިތައް ކޮމިޝަނުން އޮބްޒާވް ކުރާނެއެވެ.

ކުރީގެ ރައީސް މައުމޫން އަބްދުލްޣައްޔޫމް ވޯޓު ލައްވައިފިއެވެ. މައުމޫން ވޯޓު ލައްވާފައިވަނީ އިސްކަންދަރު ސްކޫލްގައި ހުރި މައްޗަންގޮޅި އުތުރު 3 ނަންބަރު ވޯޓު ފޮއްޓަށެވެ.

މިއަދު ހެނދުނު 10 ޖެހުމާ ހަމައަށް ވޯޓު ލާފައިވަނީ 16.61 އިންސައްތަ މީހުންކަމަށް އިލެކްޝަންސް ކޮމިޝަނުން ބުނެފިއެވެ. މިއީ ވޯޓު ލުމުގެ ހައްގު ލިބިފައިވާ މީހުންގެ 47،296 މީހުންނެވެ.

ކުރީގެ ރައީސް އަދި ރައްޔިތުންގެ މަޖިލީހުގެ ކުރީގެ ރައީސް މުހައްމަދު ނަޝީދު ވޯޓު ލައްވައިފިއެވެ. ނަޝީދު ވޯޓު ލައްވާފައިވަނީ އިސްކަންދަރު ސްކޫލްގައި ބެހެއްޓިފައިވާ ގަލޮޅު އުތުރުގެ އެއް ނަންބަރު ވޯޓު ފޮއްޓަށެވެ.

މިއަދު ކުރިޔަށްދާ ރައްޔިތުންގެ މަޖިލީހުގެ އިންތިޚާބަށް ސަރުކާރުން ބިރު ދެއްކުމާއި ނުފޫޒު ފޯރުވުމުގެ ކަންކަން ކުރަމުންދާކަމުގެ ޝަކުވާ ލިބެމުންދާކަމަށް އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ވޯޓު ލެއްވުމަށްފަހު ނޫސްވެރިންނާ ބައްދަލުކުރައްވާ ވާހަކަ ދައްކަވަމުން ރައީސް ޞާލިހު ވިދާޅުވީ ކެމްޕެއިން ތެރޭގައި ވަރަށް ސާފުކޮށް ސަރުކާރުގެ ވަސީލަތްތައް ބޭނުންކޮށްގެން ކެމްޕެއިން ކުރަމުންދިޔަތަން ފެނިގެންދިޔަކަމަށެވެ. އަދި ވަކިން ޚާއްސަކޮށް ސަރުކާރުގެ ކުންފުނިތަކުގެ ބޭނުން އިންތިހާއަށް ކުރަމުންދިޔަތަން ފެނިގެންދިޔަކަމަށް ރައީސް ޞާލިހު ވިދާޅުވިއެވެ.

މިއަދު ކުރިޔަށްދާ ރައްޔިތުންގެ މަޖިލީހުގެ އިންތިޚާބުގައި ސާފު އަޣްލަބިއްޔަތު އެމްޑީޕީއަށް ލިބިގެންދާތަން ފެނިވަޑައިގަންނަވާކަމަށް އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ވޯޓު ލެއްވުމަށްފަހު ނޫސްވެރިންނާ ބައްދަލުކުރައްވާ ވިދާޅުވީ ބޮޑެތި ސިޓީތަކާއި ކުދިރަށްތަކުންވެސް އެމްޑީޕީއަށް ކާމިޔާބުވާތަން ފެނިވަޑައިގަންނަވާކަމަށެވެ. އަދި އުންމީދުކުރައްވަނީ ރަނގަޅު އަގްލަބިއްޔަތެއް އެމްޑީޕީއަށް ލިބިގެންދިޔުންކަމަށް ވިދާޅުވިއެވެ.

މީގެއިތުރުން ވީހާވެސް ގިނަ ބަޔަކު ވޯޓުލާން ވީހާވެސް އަވަހަށް ނިކުތުމަށް އިލްތިމާސްކުރެއްވިއެވެ.

ކުރީގެ ރައީސް އަދި އެމްޑީޕީގެ އިސް އެޑްވައިޒަރ އިބްރާހީމް މުހައްމަދު ޞާލިހު ވޯޓު ލައްވައިފިއެވެ.

ރައީސް ޞާލިހު ވޯޓުލައްވާފައިވަނީ ޖަމާލުއްދީން ސްކޫލަށެވެ. ވޯޓު ލެއްވުމަށްފަހު ނޫސްވެރިންނާ ބައްދަލުކުރައްވާ ރައީސް ޞާލިހު ވިދާޅުވީ އިންތިޚާބު އެމްޑީޕީއަށް ކާމިޔާބުވާތަން ފެނިވަޑައިގަންނަވާކަމަށެވެ.

ރައްޔިތުންގެ މަޖިލީހުގެ އިންތިޚާބުގެ ވޯޓުލުން މިއަދު ކުރިޔަށްދާއިރު 96 އިންސައްތަ ފޮށިތަކުގެ ވޯޓުގެ ސިއްރު ކަށަވަރުކުރުމަށް އެކަށީގެންވާ ފިޔަވަޅު ވަނީ އަޅާފައިކަމަށް ޓްރާންސްޕޭރެންސީން ބުނެއެވެ. ވޯޓުގެ ސިއްރުކަން ގެއްލިދާނެކަމަށް ބެލެވޭ 4 އިންސައްތަ މަރުކަޒު މިދަނީ ވަރަށް ގާތުންބަލަމުން ކަމަށް ޓްރާންސްޕޭރެންސީ މޯލްޑިވްސް އިން ބުނެއެވެ.

މިއަދު ކުރިޔަށްދާ ރައްޔިތުންގެ މަޖިލީހުގެ އިންތިޚާބުގައި 9 ޖެހުމާ ހަމައަށް 24،703 މީހުން ވޯޓުލާފައިވާކަމަށް އިލެކްޝަންސް ކޮމިޝަނުން ބުނެފިއެވެ.

އެމްޑީޕީގެ ޗެއަރޕާސަން ފައްޔާޒު އިސްމާއީލު ވޯޓު ލައްވައިފިއެވެ. ފައްޔާޒު ވޯޓު ލައްވާފައިވަނީ އަމީނިއްޔާ ސްކޫލަށެވެ.

ރައްޔިތުންގެ މަޖިލީހުގެ އިންތިޚާބު 2024 ގައި ގާއިމުކޮށްފައިވާ ހުރިހާ ވޯޓުލާ މަރުކަޒެއްގެ ވޯޓުނެގުން ވަނީ ފެށިފައި

ވޯޓުލުމަކީ ޒިންމާއެއް ކަމަށާއި، ހުރިހާ ރައްޔިތުން ވެސް ނުކުމެ އަވަހަށް ވޯޓުލުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު އިލްތިމާސްކުރައްވައިފިއެވެ.

ރައީސް ޑރ. މުއިއްޒު ތާޖުއްދީން ސްކޫލްގައި ބަހައްޓާފައި ހުރި މާފަންނު ދެކުނު ދާއިރާގެ ވޯޓު ފޮއްޓަށް ވޯޓުލެއްވުމަށް ފަހުގައި މީޑިއާތަކަށް ވިދާޅުވީ ވޯޓުލުމަކީ ކޮންމެ ރައްޔިތަކަށް ވެސް ގާނޫނީ އަސާސީ ލިބިދީފައިވާ ހައްގެއް ކަމަށާއި، އެ ހައްގުގެ ބޭނުން ހިފަންޖެހޭ ކަމަށެވެ.

އެހެންކަމުން ވޯޓުލުން ލަސްނުކޮށް އަވަހަށް ވޯޓުލުމަށް އެމަނިކުފާނު އިލްތިމާސްކުރެއްވިއެވެ.

ވޯޓުލުން ކުރިއަށްދަނީ ހޮނިހިރު ދުވަހުގެ 5:30ށެވެ.

ވޯޓުލުން ފަށައިގެން ކުރިއަށް ގެންދާއިރު، ކޮންމެ ވޯޓު ފޮށްޓަކަށް އެންމެ ގިނަވެގެން ވޯޓު ލާނީ 500 މީހުންކަމަށް އިލެކްޝަން ކޮމިޝަން (އީސީ)އިން ބުނެފިއެވެ.

އީސީން ބުނީ މިފަހަރުގެ އިންތިޚާބުގައި ކޮންމެ ވޯޓު ފޮއްޓަކަށް ވޯޓުލާނީ އެންމެ ގިނަވެގެން 500 މީހުން ކަމަށެވެ. އަވަހަށް ވޯޓުލުމަށް އައުމަށް އީސީން އިލްތިމާސްކޮށްފައިވާއިރު، މިފަހަރުގެ އިންތިޚާބަކީ އެންމެ ގިނަ ދާއިރާތައް ކަނޑައަޅާފައިވާ ފަހަރެވެ.

19 ވަނަ ރައްޔިތުންގެ މަޖިލީހުގައި ހިމެނެނީ 87 ދާއިރާއެވެ. 20 ވަނަ ރައްޔިތުންގެ މަޖިލީހަށް ވަނީ 6 ދާއިރާ އިތުރުވެފައެވެ.

އިތުރުވާ 6 ދާއިރާއަކީ

• މާލޭ ސިޓީއަށް 2 ގޮނޑި

• އައްޑޫ ސިޓީއަށް 1 ގޮނޑި

• މާޅޮސްމަޑުލު ދެކުނުބުރިއަށް 1 ގޮނޑި

• މާލެ އަތޮޅަށް 1 ގޮނޑި

• ހުވަދުއަތޮޅު އުތުރުބުރިއަށް 1 ގޮނޑި

މިހާރު އޮތް ރައްޔިތުންގެ މަޖިލީހުގެ ދައުރު ހަމަވާނީ 30 މެއި 2024 އަށެވެ.

ރައްޔިތުން މަޖިލިސް އިންތިޚާބުގެ ވޯޓުލުމުގެ ވަގުތު އިތުރު ނުކުރާނެ ކަމަށް އިލެކްޝަން ކޮމިޝަން (އީސީ) އިން ބުނެފިއެވެ. އީސީން ވަނީ ވަގުތު އޮއްވައި ހުރިހާ ފަރާތްތަކުން ވޯޓުލުމަށް އައުމަށް އެދިފައެވެ.

އިންތިޚާބުގައި ޖުމްލަ 93 ދާއިރާއެއްގެ މެންބަރުން އިންތިޚާބު ކުރާއިރު، އެ ދާއިރާތަކަށް ޕާޓީތަކުން އަދި އަމިއްލަ ގޮތުން 368 ކެންޑިޑޭޓުން ވާދަކުރެއެވެ.

މަޖިލިސް އިންތިޚާބުގައި 93 ދާއިރާއަކަށް ޖުމްލަ 284،663 މީހަކަށް ވޯޓުލުމުގެ ހައްގު ލިބެއެވެ. މީގެ ތެރޭގައި ހިމެނެނީ 145،302 ފިރިހެނުންނާއި 139،361 އަންހެނުންނެވެ.

އިންތިޚާބުގައި ޖުމްލަ 602 ވޯޓު ފޮށި ބަހައްޓާއިރު، މާލޭގައި 181 ފޮށި، ވިލިމާލޭގައި 9 ފޮށި، ހުޅުމާލޭގައި 51 ފޮށި އަދި އަތޮޅުތަކުގައި 319 ފޮށި އަދި ރިސޯޓުތަކުގައި 34 ފޮށި ވަނީ ބަހައްޓާފައެވެ. މީގެ އިތުރުން ޖަލުތަކުގައި 5 ފޮށި އަދި ރާއްޖޭން ބޭރުގައި 3 ފޮށި ވަނީ ބަހައްޓާފައެވެ.

ރައްޔިތުން މަޖިލީހުގެ އިންތިޚާބުގައި ވޯޓުލުން ފަށާ ގަޑިއަކީ ހެނދުނު 8:00 އިން ފެށިގެން ހަވީރު 5:30 އަށެވެ. ވޯޓު ފޮށީގެ ކިޔޫގައި މީހަކު ނެތް ނަމަ 5:30 ގައި ފޮށި ބަންދުކުރުމަށް ފަހު، 30 މިނެޓު ފަހުން ވޯޓު ގުނަން ފަށާނެ ކަމަށް އިލެކްޝަން ކޮމިޝަން (އީސީ)އިން ބުނެއެވެ.

އެހެން ގައުމުތަކުގައި ވޯޓުލާން ފަށާ ގަޑިއަށް ބަލާއިރު، (އެ ގައުމެއްގެ ގަޑިން) އިންޑިޔާގެ ޓްރިވެންޑްރަމްގައި ހެނދުނު 8:30 ސްރީލަންކާގެ ކޮލަމްބޯގައި ހެނދުނު 8:30 އަދި މެލޭޝިޔާގެ ކުއަލަލަމްޕޫރުގައި ހެނދުނު 11:00 ކަމަށް އީސީން ބުނެއެވެ.

ވޯޓުލާ މަރުކަޒުތަކުގައި ހަރަކާތްތެރިވާ އޮފިޝަލުން ތަކެއްޗާއެކު ވޯޓުލާ މަރުކަޒުތަކަށް ފޮނުވުމުގެ މަސައްކަތުގެ ތެރެއިން. އިންތިހާބުގެ ވޯޓުލުން ފެށޭނީ 8:00 ގައި.