ރިޔާސީ ރޭސް 2023

ރިޔާސީ އިންތިޚާބުން 50 އިންސައްތައަށްވުރެ މަތިން އެއްވެސް ކެންޑިޑޭޓަކަށް ވޯޓު ލިބިވަޑައިގެންފައި ނުވާތީ، ދެވަނަ ބުރަކަށް ދާންޖެހިއްޖެއެވެ.

ހޮނިހިރު ދުވަހު ބޭއްވި ރިޔާސީ އިންތިޚާބުގެ ވޯޓުލުން ފަށާފައިވަނީ ހެނދުނު 8:00ގައެވެ. އަދި ވޯޓުގެ ކިޔު ބަންދު ކޮށްފައިވަނީ ހަވީރު 4:00ގައެވެ.

ފޯރިގަދަ މި އިންތިޚާބުގައި އެންމެ ގިނަ ވޯޓު ހޯއްދަވައިގެން ދެވަނަ ބުރަކަށް ދަތުރު ކުރައްވާނެ ކަމަށް ހިސާބުތަކުން ދައްކަނީ އެމްޑީޕީގެ ރިޔާސީ ކެންޑިޑޭޓު ރައީސް އިބްރާހީމް މުހައްމަދު ސާލިހާއި، އިދިކޮޅު ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒެވެ.

އިންތިޚާބުގެ ވަގުތީ ނަތީޖާ ދައްކާ ގޮތުން، މިހާތަނަށް ޕީއެންސީގެ ކެންޑިޑޭޓު ޑރ. މުއިއްޒަށް 45.6 އިންސައްތަ، އެމްޑީޕީގެ ކެންޑިޑޭޓް ރައީސް ސާލިހަށް 39.71 އިންސައްތަ ލިބިވަޑައިގެންފައި ވެއެވެ.

މީގެ އިތުރުން ދަ ޑިމޮކްރެޓްސްގެ ކެންޑިޑޭޓް އިލްޔާސް ލަބީބަށް 6.97 އިންސައްތަ، އަމިއްލަ ގޮތުން ވާދަކުރެއްވި އުމަރު ނަސީރަށް 2.83 އިންސައްތަ، ޖުމްހޫރީ ޕާޓީގެ ކެންޑިޑޭޓު ގާސިމް އިބްރާހީމަށް 2.57 އިންސައްތަ، އަމިއްލަ ގޮތުން ވާދަކުރެއްވި ފާރިސް މައުމޫނަށް 1.36 އިންސައްތަ، އެމްއެންޕީގެ ކެންޑިޑޭޓު މުހައްމަދު ނާޒިމަށް 0.82 އިންސައްތަ އަދި ހަސަން ޒަމީލަށް 0.15 އިންސައްތަ ލިބިވަޑައިގެންފައި ވެއެވެ.

ވަގުތީ ނަތީޖާ އިއުލާނު ކުރުން ކުރިއަށްދާއިރު، ދެވަނަ ބުރެއްގެ ވޯޓުލުން އޮންނާނީ ސެޕްޓެންބަރު މަހުގެ 30ގައެވެ. އެހެން އަހަރުތަކާ ޚިލާފަށް، މިއަހަރުގެ އިންތިޚާބުގައި ވޯޓުލާފައި ވަނީ ގާތްގަނޑަކަށް 75 އިންސައްތަ މީހުން ކަމަށާއި، މިއީ އެންމެ މަދުން ވޯޓުލީ ރިޔާސީ އިންތިޚާބު ކަމަށް އިލެކްޝަންސް ކޮމިޝަނުން މައުލޫމާތުދެއެވެ.

މިއަހަރުގެ ރިޔާސީ އިންތިޚާބުގެ ޖުމްލަ 188 ފޮއްޓެއް އޮބްޒަރވްކުރުމަށް އެޗްއާރްސީއެމްގެ މުވައްޒަފުންވަނީ ހަރަކާތްތެރި ވެފައި. އެގޮތުން ވޯޓު ފޮށީގެ ވަގުތީ ނަތީޖާ އިއުލާންކުރުމާ ހަމައަށްވެސް އޮބްޒަރވަރުން ހަރަކާތްތެރިވެ، ހާލަތު ބަލަމުންދާނެ ކަމަށް އެ ކޮމިޝަނުން ބުނޭ.

މިހާތަނަށް ރިސޯޓުތަކުގައި ހުރި 14 ވޯޓު ފޮއްޓެއްގެ ނަތީޖާ ލިބިފައިވޭ.

ބައެއް މަރުކަޒުތަކަށް ދިއުމުން، ވޯޓުލާ މަރުކަޒުތަކުގައި ވޯޓޫލާ ބޫތް ބަހައްޓާގައި ހުންނަ ގޮތުން ވޯޓުގެ ސިއްރުކަން ގެއްލޭކަމަށް ބައެއް އޮބްޒާވަރުންނާއި މަންދޫބުން ބުނެފައިވޭ.

ލަފާދޭ ކޮމިޓީގެ މަޝްވަރާއެކީގައި ކުރިން ބޫތް ބެހެއްޓިގޮތް އަޅުގަނޑުމެން މި ބަދަލުކޮށްލީ ލަފާދޭ ކޮމިޓީގެ ބޭފުޅުންގެ އިއްތިފާގުން. އެހެންވީމާ އެވަރުގެ އިއްތިފާގެއް އައީމަ ކޮމިޝަންގެ މެންބަރުންނަށް ފެނިވަޑައިގަތީ ބޫތް ބަހައްޓާގޮތް ބަދަލުކުރަން.

އއ. ރަސްދޫ ދެ ވޯޓުފޮށީގެ ދެ އޮފިޝަލަކު އިގްރާރާ ހިލާފުވެގެން އެކަން ބަލާ ވަނީ ދޫކޮށްލާފައި. އަދި އޮފިޝަލުންގެ ތެރެއިން އެ މަގާމްތަކަށް މީހުން ލާފައި ވޯޓުލުން ވަނީ އަލުން ފަށާފައި.

ބ. ތުޅާދޫގައި ވޯޓުލާން އައި މީހަކު ފޮޓޯ ނެގިކަމުގެ މައުލޫމާތު ލިބިގެން، ވޯޓުލުން ހުއްޓިފައިވަނީ. ވަރަށް އަވަހަށް ވޯޓުލުމުގެ މަސައްކަތް އަލުން ފެށޭނެ.

ކ. ގުރައިދޫގައި ހާއްސައެހީއަށް ބޭނުންވާ މީހުންގެ މަރުކަޒުގައި ތިބޭ މީހުންނަށް ވޯޓު ނުލެވޭ މައްސަލަ އައިސްފައިވޭ. ރަޖިސްޓްރީވެފައިވާނަމަ އެ ވޯޓު ފޮށްތަކަށް ވޯޓު ލެވޭނެ. އެހީތެރިއެއްގެ އެހީ ހޯދެނީ، ގާނޫނުގައި ބުނާގޮތުން ދެ އަތުންކުރެ އަތަކުން އަތެއް ބޭނުން ނުކުރެވޭ ހާލަތުގައާއި ލޮލަށް ނުފެންނަ މީހުންނަށާއި އަދި މުސްކުޅިވެ ގައިބާރު ދެރަވެ އެމީހަކު އަމިއްލައަށް ވޯޓު ކަރުދާހުގައި ފާހަގަޖަހަން އުޒުރުވެރިވާ މީހުންނަށް.

މެންދުރު 12:00 އާ ހަމައަށް 112,250 މީހުން ވޯޓު ލައިފައިވޭ. އެއީ 39.75 ޕަސެންޓު މީހުން.

މީގެ ތެރެއިން ފިރިހެނުންގެ އަދަދަކީ 20 އިންސައްތަ އަދި އަންހެނުންގެ އަދަދަކީ 19 އިންސައްތައް.

ވޯޓުލާ މަރުކަޒުތަކުގައި މީހުން އެބަތިބި. ބައެއް މަރުކަޒުތަކުގައި ކިއު ދިގުވެގެން ޝަކުވާ އައުމުން ކޯޑިނޭޝަން ސެންޓަރުގެ ފަރާތުން އެތަންތަނަށް އިތުރު އޮފިޝަލުން ފޮނުވާ ވޯޓުލުމުގެ މަސައްކަތް އަވަސްކުރުމުގެ ކަންކަން ކުރިއަށް އެބަދޭ. މެންދުރު ފަހުން ޕްރޮސެސް މިހާރަށްވުރެ ހަލުވިވެގެންދާނެ ކަމަށް ބެލެވޭ.

އަބޫދާބީގައި ރާއްޖެ ގަޑިން 10:00 ގައި އަދި އަބޫދާބީގެ ގަޑިން 9:00 ގައި ވޯޓުލުން ވަނީ ފެށިފައި. ހުރިހާ ތަނެއްގައި ވޯޓުލުން ފެށިގެން ކުރިއަށްއެބަދޭ.

މިހާރު ކުރިއަށްދާ ނޫސްވެރިންގެ ބައްދަލުވުމުގައި އީސީގެ ނައިބު ރައީސް އިސްމާއީލު ހަބީބު ވިދާޅުވީ އެންމެ ފަހުން ވޯޓުލާން ފެށިފައިވަނީ ލަންޑަންގައި ކަމަށް. އެއީ ލަންޑަންގެ ގަޑިން 8:30 ގައި، މާލޭގެ ގަޑިން 12:30 ގައި.

ނައިބު ރައީސް ފައިސަލް ނަސީމް ރިޔާސީ އިންތިހާބުގެ ވޯޓު ލައްވާފައި ވަނީ 11:45 ހާއިރުއެވެ.

އެމަނިކުފާނު ވޯޓުލެއްވުމަށް ފުވައްމުލަކު ސިޓީގެ ރައްޔިތުންގެ ވޯޓު ފޮށިތައް މާލޭގައި ބަހައްޓާފައި ހުރި ޖަމާލުއްދީން ސްކޫލަށް ވަޑައިގަންނަވާފައި ވަނީ 11:05 ހާއިރުއެވެ.

އެމަނިކުފާނު ވޯޓު ލައްވާފައި ވަނީ ކިއުގައި މަޑުކުރެއްވުމަށްފަހުއެވެ.

ތުޅާދޫގައި ވޯޓުލާން ދިޔަ މީހަކު ވޯޓުލާ މަރުކަޒަށް އިތުރު ގަލަމެއް ވެއްދި މައްސަލަ އެއް ފެންމަތިވެއްޖެއެވެ.

ތުޅާދޫގައި ހުރި މޮނިޓަރަކު ރާއްޖެ އެމްވީ އަށް މައުލޫމާތު ދެމުން ބުނީ ވޯޓުލަމުން ދަނިކޮށް މީހަކު އިތުރު ގަލަމެއް ވެއްދިކަން ފާހަގަވީ އެ ސަރަހައްދުގައި ތިބި ފުލުހުންނަށް ކަމަށެވެ. އިތުރު ގަލަމެއް ވެއްދި މީހާ އަކީ ފިރިހެނެކެވެ. އެއާއި އެކު ވޯޓުލުން މެދުކަނޑާލާފައިވާ ކަމަށާއި އޭރު ގާތްގަނޑަކަށް 12:15 ކަމަށް ވެސް އޭނާ ވަނީ ބުނެފައެވެ.

އޭނާ ވޯޓުލާ ސަރަހައްދަށް ވެއްދި އިތުރު ގަލަމަކީ ކެމެރާ ގަލަމެއް ކަމަށް ދަނީ ތުހުމަތުކުރަމުންނެވެ. އެހެންކަމުން މައްސަލަ ހައްލުވަންދެން ތުޅާދޫގައި ވޯޓުލުން ވަނީ މެދުކަނޑާލާފައެވެެ. މި މައްސަލަ ދިމާވެފައި ވަނީ ތުޅާދޫގެ ތިން ނަމްބަރު ވޯޓު ފޮށީގައެވެ.

ވޯޓުލުން ކުރިއަށްދާއިރު، އޮފިސަރުން ދަނީ އެންމެންގެ ސަލާމަތާއި ރައްކާތެރިކަން ކަށަވަރުކުރުމަށް ހީވާގިކަމާއެކު މަސައްކަތް ކުރަމުން ކަމަށް ފުލުހުން ބުނެއެވެ. އަދި އިންތިހާބު އޮމާންކޮށް ކުރިއަށް ގެންދިއުމުގައި ވަރުބަލިކަމެއް ނެތި ފުލުހުން ދަނީ މަސައްކަތް ކުރަމުންނެވެ.

ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވޯޓު ދެއްވައިފިއެވެ.

މިނިސްޓަރ ވޯޓު ދެއްވީ މެދުހެންވޭރު 3 ނަންބަރު ވޯޓު ފޮށްޓަށެވެ.

ރަސްދޫގައި ދިމާވީ އޮފުިޝަލުންނާއި ގުޅުން ހުރި މައްސަލަ އެއް ކަމަށް އިލެކްޝަންސް ކޮމިޝަނުން ބުނެފިއެވެ.

އިލެކްޝަންސް ކޮމިޝަނުގެ ނައިބު ރައީސް އިސްމާއިލް ހަބީބް ވިދާޅުވީ އެ ރަށުގައި ދިމާވީ އޮފިޝަލަކު އިގުރާރާއި ޚިލާފުވި މައްސަލަ އެއް ކަމަށެވެ. ހަމަނުޖެހުން ހިނގަން މެދުވެރިވީ އެ އޮފިޝަލުން ބަދަލުކުރަން އުޅުމުން ކަމަށާއި މި ކަމާއި ގުޅޭ އިތުރު ތަފްސީލްތައް 01:00ގައި އޮންނަ ނޫސްވެރިންގެ ބައްދަލުވުމުގައި ހާމަކުރައްވާނެ ކަމަށެވެ.

ވޯޓުލާ މަރުކަޒުގެ ތެރެއިން ހުރިހާ މަރުކަޒުތަކުގައި 9:00 ގައި ވޯޓްލާން ފަށާފައިވާ އިރު 85.8 އިންސައްތަ ވޯޓުލާ މަރުކަޒުގައި ވޯޓުލާން ފަށަން ކަނޑައަޅާފައިވާ ގަޑީގެ 10 މިނެޓް ތެރޭ ވަނީ ވޯޓުލާން ފަށާފައެވެ.

ހުރިހާ ވޯޓުލާ މަރުކަޒެއްގައިގެން މަރުކަޒުގައި ތިބެންޖެހޭ އޮފިޝަލުން ހާޒިރުވެ ތިބިކަން ފާހަގަކުރެވެއެވެ.

ވޯޓުލުމަށް ބޭނުންވާތަކެތި ހުރިހާ މަރުކަޒުތަކުގައި ހަމައަށް ހުރި އިރު، ވޯޓުލާން ފެށުމުގެ ކުރިން ހުރިހާ ވޯޓުކަރުދާސް ގުނާ ހަމަކުރެވުނެވެ. އަދި ހުރިހާ ވޯޓުފޮށިތައް ހުސްކަން ޔަގީންކުރިއެވެ.

ކެންޑިޑޭޓުންގެ މަންދޫބުން ހުރިހާ ވޯޓު މަރުކަޒުތަކެއްގައި ވެސް ހާޒިރުވެ ތިއްބެވެ. އެގޮތުން 89.5 އިންސައްތަ ވޯޓު މަރުކަޒުތަކުގައި މަދުވެގެން ތިން ކެންޑިޑޭޓުންގެ މަންދޫބުން ހާޒިރުވެތިބިއިރު، ހުރިހާ ވޯޓު މަރުކަޒެއްގައި ވެސް އެންމެ މަދުވެގެން ކޮންމެވެސް އެއް ކެނޑިޑޭޓެއްގެ މަންދޫބުން ހާޒިރުވެތިއްބެވެ. އަދި 7.2 އިންސައްތަ ވޯޓު މަރުކަޒުތަކުގައި މަދުވެގެން ފަސް ކެންޑިޑޭޓުންގެ މަންދޫބުން ހާޒިރުވެތިއްބެވެ.

72 އިންސައްތަ ވޯޓު މަރުކަޒުތަކުގައި ޕީޕީއެމް/ޕީއެންސީ ކޯލިޝަންގެ މަންދޫބުން ތިބި އިރު، 71 އިންސައްތަ ވޯޓު މަރުކަޒުތަކުގައި އެމްޑީޕީ/އޭޕީ/އެމްޑީއޭ ކޯލިޝަންގެ މަންދޫބުން އަދި 34 އިންސައްތަ ވޯޓު މަރުކަޒުތަކުގައި ޑިމޮކްރެޓްސް މަންދޫބުން ތިއްބެވެ.

96 އިންސައްތަ ވޯޓު މަރުކަޒުތަކުގައި ފުލުހުން ހަރަކާތްތެރިވަމުން ދިޔައީ ވޯޓުލާ ސަރަހައްދުތަކުގެ ބޭރުގައިކަން ފާހަގަކުރެވެއެވެ.

ވޯޓުލާފޮށިތަކުގެ 97 އިންސައްތަ ފޮށި ތައްޔާރުކޮށްފައިވަނީ ލާ ވޯޓުގެ ސިއްރުކަން ކަށަވަރުވާގޮތަށްކަމުގައި އޮބްޒާވަރުން ރިޕޯޓްކޮށްފައިވެއެވެ. އެހެންނަމަވެސް 3 އިންސައްތަ ވޯޓު މަރުކަޒުތަކުގައި ވޯޓުގެ ސިއްރުކަން ކަށަވަރުނުވާކަމަށް ވެސް ރިޕޯޓްކުރެވިފައިވެއެވެ. މި ފޮށިތައް ގާތުން ދަނީ ބަލަމުންނެވެ.

ހުޅުވުމުގެ ޕްރޮސެސްތައް ރަނގަޅަށް ކުރިއަށް ދިޔައިރު، ހެނދުނު 9:00 އަށް ހުރިހާ ވޯޓު ފޮށިތައް ހުޅުވާފައިވާއިރު، 85.8 އިންސައްތަ ވޯޓު ފޮށި ހުޅުވަން ޖެހޭ ވަގުތުގެ ފުރަތަމަ 10 މިނެޓުގެ ތެރޭގައި ހުޅުވާފައިވެއެވެ.

އއ. ރަސްދޫގައި ވޯޓުލުން މެދުކަނޑާލައިފިއެވެ.

އެ ރަށުގައި ވޯޓުލުން މެދުކަނޑާލާފައި ވަނީ ވޯޓުލަމުންދިޔަ މަރުކަޒުގައި އުސޫލާއި ހިލާފުވިމަކަމަށް ބުނެ ހުށަހަޅާފައިވާ މައްސަލަ އަކާއި ގުޅިގެންނެވެ. މައުލޫމާތު ލިބިފައިވާ ގޮތުން ފުލުހުން މިހާރު އަންނަނީ އެ މަރުކަޒު ކައިރީގައި ހަރަކާތްތެރިވަމުންނެވެ.

އެ ސަރަހައްދުގައި ހަރަކާތްތެރިވާ މޮނީޓަރަކު ރާއްޖެ ޓީވީ އަށްމައުލޫމާތުދެމުން ބުނީ ވޯޓުލުން ހުއްޓުނީ 10:00ގެ ފަހުން ކަމަށެވެ. އަދި މިހާތަނަށް ލިބޭ މައުލޫމާތަށް ބަލާއިރު ހުށަހެޅި ޝަކުވާއަކީ އޮފިޝަލުންނާއި ގުޅުން ހުރި ޝަކުވާ އެއް ކަމަށް އެނގިފައިވާ ކަމަށް ވެސް އޭނާ ވަނީ ބުނެފައެެވެ. މި މައްސަލަ ދިމާވެފައި ވަނީ (U02.02.2) ނަމްބަރު ވޯޓު ފޮށީގައެވެ.

ކުރީގެ ރައީސް މައުމޫން އަބްދުލް ޤައްޔޫމް ވޯޓުލައްވައިފިއެވެ.

ރިޔާސީ އިންތިޚާބު 2023އާ ގުޅިގެން ދަރުބާރުގެ ޕްރެސް ރޫމްގައި 1:00ގައި ޕްރެސްކޮންފަރެންސެއް ކުރިއަށްގެންދިއުމަށް ވަނީ ހަމަޖެހިފައި.