ރިޔާސީ ރޭސް 2023

މިހާރު ކުރިއަށްދާ ރިޔާސީ އިންތިހާބުގެ ކަންކަން ކުރިއަށް ދަނީ ވަރަށް އޮމާންކަމާއި އެކު ކަމަށާއި، މިއީ ކުރިން ފެންނަ މަންޒަރެއް ނޫން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވިއެވެ. މީގެ އިތުރުން ރައީސް އެދިވަޑައިގަތީ ހުރިހާ ރައްޔިތުންވެސް ވޯޓު ލުމުގެ ހައްގު ބޭނުންކުރުމަށެވެ.

މިއަހަރުގެ ރިޔާސީ އިންތިޚާބުގައި އަމިއްލަގޮތުން ވާދަކުރައްވާ ކެންޑިޑޭޓް އަހުމަދު ފާރިސް މައުމޫން ވޯޓު ލައްވައިފިއެވެ.

ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް، ކެންޑިޑޭޓް ނަންބަރު 3، އިބްރާހިމް މުޙައްމަދު ޞާލިހު ވޯޓު ދެއްވައިފިއެވެ. އެމަނިކުފާނު ވޯޓުލެއްވީ ޖަމާލުއްދީން ސްކޫލުގައި ހިންނަވރުގެ ރައްޔިތުން ވޯޓުލުމަށް ބަހައްޓާފައިވާ އެއް ނަންބަރު ވޯޓު ފޮއްޓަށެވެ.

މިއަހަރުގެ ރިޔާސީ އިންތިޚާބުގައި ދަ ޑިމޮކްރެޓްސްގެ ފަރާތުން ވާދަކުރައްވާ ކެންޑިޑޭޓް، އިލްޔާސް ލަބީބު ވޯޓުލައްވައިފިއެވެ.

އެމްއެންޕީގެ ފަރާތުން މިއަހަރުގެ ރިޔާސީ އިންތިޚާބުގައި ވާދަކުރައްވާ ކެންޑިޑޭޓް، މުޙައްމަދު ނާޒިމް ވޯޓުލައްވައިފިއެވެ.

މިހާރު ކުރިއަށްދާ ރިޔާސީ އިންތިޚާބުގައި 36،169 މީހުން ވޯޓުލާފައިވާ ކަމަށް އިލެކްޝަންސް ކޮމިޝަން (އީސީ) އިން ހާމަ ކޮށްފިއެވެ.

އެ އިދާރާއިން ބުނެފައިވާ ގޮތުގައި މިއަދުގެ ހެނދުނު 10:00 އާ ހަމައަށް ވޯޓުލި މީހުންގެ ތެރޭގައި 22،403 ފިރިހެނުންނާއި 13،760 އަންހެނުން ހިމެނެއެވެ.

މިއަހަރުގެ އިންތިޚާބުގައި ވޯޓުލުމުގެ ޙައްގު ލިބިފައިވަނީ 282،395 މީހުންނަށެވެ. މީގެ ތެރެއިން 246،232 އަދި ވޯޓު ނުލައެވެ،

ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް، އިބްރާހިމް މުޙައްމަދު ޞާލިހުގެ އަނބިކަނބަލުން ފަޒްނާ އަހުމަދު ވޯޓުލައްވައިފިއެވެ.

މިއަހަރުގެ ރިޔާސީ އިންތިޚާބުގައި ޕީއެންސީން ވާދަކުރައްވާ ކެންޑިޑޭޓް ޑރ. މުޙައްމަދު މުއިއްޒު ވޯޓު ލައްވައިފިއެވެ.

ރާއްޖޭގެ ހުރިހާ ސަރަހައްދެއްގައި ވޯޓުލުން ވަނީ ފެށިފައެވެ.

ޑިފެންސް މިނިސްޓަރު މާރިޔާ އަހުމަދު ދީދީ ވޯޓު ލައްވައިފިއެވެ.

ޑިފެންސް މިނިސްޓަރު މާރިޔާ އަހުމަދު ދީދީ ވޯޓު ލައްވައިފިއެވެ.

ރިޔާސީ އިންތިޚާބުގައި އަމިއްލަ ގޮތުން ވާދަކުރައްވާ ކެންޑިޑޭޓް، ކެންޑިޑޭޓް ނަންބަރު 2 ހަސަން ޒަމީލް ވޯޓުލައްވައިފިއެވެ.

ރިޔާސީ އިންތިޚާބުގެ ވޯޓުލުން އިނގިރޭސިވިލާތުގެ ލަންޑަނާއި ޔޫއޭއީގެ އަބޫދާބީ ފިޔަވައި އެހެން ހުރިހާ ތަނެއްގައި ފަށާފައިވާ ކަމަށް އިލެކްޝަންސް ކޮމިޝަނުގެ ނައިބުރައީސް އިސްމާއިލް ހަބީބު ވިދާޅުވެއްޖެއެވެ.

ރިޔާސީ އިންތިޚާބުގައި ޖުމްހޫރީ ޕާޓީގެ ފަރާތުން ވާދަކުރައްވާ ކެންޑިޑޭޓް، ގާސިމް އިބްރާހިމް ވޯޓު ލައްވައިފިއެވެ.

ރިޔާސީ އިންތިޚާބުގައި ޕީއެންސީގެ ފަރާތުން ވާދަކުރައްވާ ކެންޑިޑޭޓް ޑރ. މުޙައްމަދު މުއިއްޒުގެ ރަނިންގމޭޓް ހުސައިން މުޙައްމަދު ލަތީފު ވޯޓުލައްވައިފިއެވެ. އޭނާ ވޯޓު ލައްވާފައިވަނީ ތާޖުއްދީން ސްކޫލުގައި ބަހައްޓާފައިވާ ގދ. އަތޮޅުގެ 5 ވަނަ ވޯޓު ފޮއްޓަށެވެ.

ރިޔާސީ އިންތިޚާބު 2023ގައި ވޯޓުލުމަށް ވޯޓުލާ މަރުކަޒުތަކުގައި މިހާރުން ފެށިގެން ކިޔޫ ހަދަން ފަށައިފިއެވެ. ވޯޓުލާ ފަރާތަތކަށް ހެނދުނު 7:30ން ފެށިގެން ކިޔޫގައި މަޑު ކުރެވޭނެ ކަމަސް އީސީން ބުނެއެވެ. ވޯޓުލުން ފަށާނީ 8:00ގައެވެ.

ރިޔާސީ އިންތިޚާބުގައި ވޯޓުލާ ފަރާތްތަކަށް ހެނދުނު 7:30 ފެށިގެން ކިޔޫގައި މަޑުކުރެވޭނެ ކަމަށް އީސީން ވަނީ ބުނެފައެވެ. ވޯޓުލުން ފަށާނީ 8:00 ގައެވެ. ހަވޯރު 4:00 އާ ހަމައަށް ވޯޓުލުން ކުރިއަށްދާއިރު ވޯޓު ގުނަން ފަށާނީ 4:30ގައެވެ.

ވޯޓުލުން ކުރިއަށްދާނީ ހެނދުނު 8:00ން ފެށިގެން ހަވީރު 4:00 އަށެވެ.

ރިޔާސީ އިންތިހާބު 2023 ގައި 8 ކެންޑިޑޭޓަކު ވާދަކުރެއެވެ. މިއީ ފެހި ގާނޫނު އަސާސީގެ ދަށުން އެންމެ ގިނަ އަދަދަކަށް ކެންޑިޑޭޓުން ކުރިމަތިލި ފަހަރެވެ. އިންތިހާބުގައި 282,395 މީހުންނަށް ވޯޓުލެވެއެވެ. ބޭރުގައި 7 ވޯޓު ފޮށްޓެއް ބަހައްޓާއިރު ޖުމްލަ 574 ވޯޓު ފޮށި ބަހައްޓައެވެ.

ރިޔާސީ އިންތިޚާބާ ގުޅިގެން ކެމްޕެއިން ކުރުން މަނާ ވަގުތުތަކުގައި ކެމްޕެއިނާ ގުޅޭ ކޮންޓެންޓް ބްރޯޑްކާސްޓް ނުކުރުމަށް މޯލްޑިވްސް ބްރޯޑްކާސްޓިންގ ކޮމިޝަނުން އިލްތިމާސްކޮށްފިއެވެ.

ބްރޯޑްކޮމްއިން ބުނީ އިންތިޚާބުތަކާ ބެހޭ އާންމު ގާނޫނު ގެ 44 ވަނަ މާއްދާގެ (ހ) ގައި ބުނާ ގޮތުން، އިންތިޚާބުގައި ވޯޓުނަގާ ދުވަހުގެ ކުރީ ދުވަހުގެ ހަވީރު 6:00 އިން ފެށިގެން، ވޯޓު ނަގާ ދުވަހުގެ ފަހު ދުވަހުގެ ހެނދުނު 6:00 އާ ދެމެދު އެއްވެސް ކެނޑިޑޭޓަކަށް ތާއީދުކުރުމުގެ އެއްވެސް ހަރަކާތެއް ހިންގުމަކީ މަނާކަމެއް ކަމަށެވެ.

އެހެންކަމުން، 9 ސެޕްޓެމްބަރ 2023 ގައި ބާއްވާ ރިޔާސީ އިންތިޚާބުގައި ވާދަކުރާ ކެނޑިޑޭޓުންނާ ގުޅޭ އެއްވެސް ކެމްޕެއިން ހަރަކާތެއް ނުވަތަ އެފަދަ ކެނޑިޑޭޓަކަށް ތާއިދު ހޯދުމަށް ފޮނުވޭ އެއްވެސް ކޮންޓެންޓެއް، 8 ސެޕްޓެމްބަރ 2023 ވާ ހުކުރު ދުވަހުގެ ހަވީރު 6:00ން ފެށިގެން 10 ސެޕްޓެމްބަރު 2023 ވާ އާދީއްތަ ދުވަހުގެ ހެނދުނު 6:00ގެ ނިޔަލަށް ބްރޯޑްކާސްޓް ނުކުރުމަށް ހުރިހާ ބްރޯޑްކާސްޓަރުންނަށް އިލްތިމާސްކުރާ ކަމަށެވެ.

ގާނޫނާ ޚިލާފަށް ބްރޯޑްކާސްޓްކުރުމަކީ، ގާނޫނެއްގެ ބާރު ކެނޑިގެންދާ ގޮތަށް ބްރޯޑްކާސްޓްކުރުން ކަމަށް ވާތީ، މިއީ ބްރޯޑްކާސްޓްކުރުމުގެ ކޯޑް އޮފް ޕްރެކްޓިސްގެ ފުރަތަމަ ހަމައިގެ (2) އާ ޚިލާފު ކަމެއް ކަމަށެވެ. އަދި މި ކަމަށް ހުރިހާ ބްރޯޑްކާސްޓަރުންނަށް ސަމާލުވުމަށް ވަނީ އިލްތިމާސްކޮށްފައެވެ.

ކަޅު ކުލަ ނުވަތަ ނޫ ކުލަ ނޫން ކުލައެއްގެ ގަލަމުން ލާ ވޯޓު ގުނާނީ ބާތިލު ވޯޓެއްގެ ގޮތުގައިކަމަށް އިލެކްޝަންސް ކޮމިޝަން(އީސީ)ގެ ނައިބު ރައީސް އިސްމާއީލު ހަބީބު ވިދާޅުވެއްޖެއެވެ.

ރިޔާސީ އިންތިޚާބާއި ގުޅޭގޮތުން އެންމެ ފަހުގެ މައުލޫމާތު ދިނުމަށް ހުކުރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ހަބީބު ވިދާޅުވީ ވޯޓުލާން އަންނަ މީހާއަށް ގަލަމެއް ގެނެވޭނެކަމަށެވެ. ނަމަވެސް އެމީހާ ގެންނަ ގަލަމުން ވޯޓުލެވޭނީ އެއީ ނޫ ކުލަ ނުވަތަ ކަޅު ކުލައިގެ އާދައިގެ ގަލަމަކަށް ވާނަމަކަމަށް ހަބީބު ވިދާޅުވިއެވެ. އެކަން އޮފިޝަލުން ޗެކްކުރާނެކަމަށްވެސް ހަބީބު ވިދާޅުވިއެވެ.

މީގެއިތުރުން ހަބީބު ވިދާޅުވީ ޞައްހަ ވޯޓެއްގެ ގޮތުގައި ގުނޭނީ އެމީހަކު ބޭނުންވާ ކެންޑިޑޭޓެއްގެ ނަމާ ދިމާލުގައި ރަނގަޅު އެއް ފާހަގަ ޖަހާފައި އޮންނަ ވޯޓުކަރުދާސްކަމަށެވެ.

މިކަންކަމަށް މިހާރު އޮފިޝަލުންނަށް އިރުޝާދު ދީފައިވާނެކަމަށް ހަބީބު ވިދާޅުވިއެވެ. މީގެއިތުރުން ވޯޓުލާ ބޫތުތަކަށްވެސް މިހާރު ވަނީ ބަދަލު ގެނެސްފައިކަމަށް ހަބީބު ވިދާޅުވިއެވެ.

އެގޮތުން ވޯޓުލާ ހުރިހާ މަރުކަޒެއްގެ ބޫތު ހުންނާނީ، ބޫތުގައި ފާހަގަ ޖަހަން ހުންނަ މީހާގެ ފުރަގަސް ފެންނަގޮތަށްކަމަށެވެ. އަދި މި ނިންމުމަކީ ލަފާދޭ ކޮމިޓީގެ ލަފަޔާއިއެކު ނިންމި ނިންމުމެއްކަމަށްވެސް ހަބީބް ވިދާޅުވިއެވެ. މި ގެނައި ބަދަލުގެ ސަބަބުން ވޯޓް ކަރުދާހުގަ ފާހަގަ ޖަހާ މީހާގެ ހަރަކާތްތައް މޮނީޓަރުންނާއި އޮބްޒާވަރުންނާއި ވޯޓުގެ ކަންކަން ބަލަހައްޓަން ތިބޭ އޮފިޝަލުންނަށް ރަނގަޅަށް ފެންނިގެންދާނެކަމަށް ވެސް ހަބީބް ފާހަގަކުރެއްވިއެވެ.

ހަބީބު ވިދާޅުވީ މިގެނައި ބަދަލާއެކު ވޯޓުލާ މީހާގެ ފޮޓޯ ނެގުމާއި ވީޑިއޯ ނެގުން މަނާވެގެންދާނެކަމަށެވެ. އެމީހާ ލާ ފާހަގަ އެނގޭ ގޮތަށް އެއްވެސް ކަމެއް ނުކުރުމަށް ހަބީބު ވަނީ އިލްތިމާސްކުރައްވާފައެވެ.

ހުކުރު ދުވަހުގެ އިރުއޮއްސި 6:00ން އާދީއްތަ ދުވަހުގެ ހެނދުނު 6:00 އާ ދެމެދު އެއްވެސް ކެންޑިޑޭޓެއްގެ ކެމްޕޭން ޖަގަހައެއް ހުޅުވާފައި ބެހެއްޓުމަކީ ހުއްދަ ކަމެއް ނޫން ކަމަށް އިލެކްޝަން ކޮމިޝަން (އީސީ)ން ނިންމާފައިވާ ނިންމުމަށް މިހާރު ބަދަލުގެނެސްފައިވާކަމަށް އެކޮމިޝަންގެ ނައިބު ރައީސް އިސްމާއީލު ހަބީބު ވިދާޅުވެއްޖެއެވެ.

ކުރިން އީސީން ވަނީ ސެޕްޓެމްބަރު 8 ވާ ހުކުރު ދުވަހުގެ އިރުއޮއްސި 6:00 އިން ފެށިގެން، ސެޕްޓެމްބަރު 10 ވާ އާދީއްތަ ދުވަހުގެ ހެނދުނު 6:00 އާ ދެމެދު، ސިޔާސީ ޕާޓީއެއްގެ ނުވަތަ އެއްވެސް ކެންޑިޑޭޓެއްގެ ކެމްޕޭން ޖަގަހަ އެއް ހުޅުވާފައި ބެހެއްޓުމަކީ، ހުއްދަ ކަމެއް ނޫންކަން، ރިޔާސީ ކެންޑިޑޭޓުންގެ ރަސްމީ އިންތިޚާބީ އޭޖެންޓުންނަށް އަންގާފައެވެ. އަދި މަނާގަޑީގައި ކެމްޕޭން ޖަގަހަ ހުންނަންޖެހޭނީ ބަންދުކޮށްފައި ކަމަށްވެސް ކޮމިޝަނުން ނިންމިއެވެ.

ނަމަވެސް ހުކުުރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮމިޝަންގެ ނައިބު ރައީސް ވިދާޅުވީ ލަފާދޭ ކޮމިޓީގައި މަޝްވަރާކުރިއިރު ގިނަ ސިޔާސީ ޕާޓީތަކަކުން ޖަގަހަތަކުގައި ތިބެގެން މަސައްކަތްކުރެވޭނެ ގޮތް ބޭނުންވާތީ އެކަމާއި ގުޅޭގޮތުން ކޮމިޝަންގެ މެމްބަރުންގެ މެދުގައި މަޝްވަރާކޮށްފައިވާކަމަށެވެ. އަދި ކޮމިޝަންގެ މެމްބަރުންގެ ނިންމުމަކީ ޖަގަހަތަކުގެ އެތެރޭގައި ޕާޓީތަކުގެ މެމްބަރުންނަށް އިދާރީ މަސައްކަތްކުރެވޭނެކަމަށާއި ނަމަވެސް ޖަގަހަތައް ހުންނަންވާނީ ބަންދުކޮށްފައިކަމަށެވެ.

ހަބީބު ވިދާޅުވީ ކެމްޕެއިން ކުރަން މަނާވަގުތުތަކުގައި ސޯޝަލް މީޑިޔާ މެދުވެރިކޮށްވެސް ކެމްޕެއިން ނުކުރެވޭނެކަމަށެވެ. އަދި މިކަންކަމަށް ހުރިހާ އެންމެންވެސް ސަމާލުކަން ދިނުމަށް ހަބީބު އެދިވަޑައިގެންނެވިއެވެ.

ހޮނިހިރު ދުވަހު ކުރިޔަށްދާ މިއަހަރުގެ ރިޔާސީ އިންތިޚާބުގެ ނަތީޖާ ވަކިގޮތަކަށް ނިކުންނަށް ފެށުމުން ޝަކުވާ ހުށަހެޅުމުގެ ބަދަލުގައި ކަމެއް ހިނގާއިރަށް ވަގުތުން ޝަކުވާ ހުށަހެޅުމަށް އިލެކްޝަންސް ކޮމިޝަން (އީސީ)ގެ ނައިބު ރައީސް އިސްމާއީލު ހަބީބު އެދިވަޑައިގެންފިއެވެ.

ހުކުރު ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ހަބީބު ވިދާޅުވީ ޝަކުވާ ހުށަހެޅޭނެ ނިޒާމު ވަނީ ގާއިމުކުރެވިފައިކަމަށެވެ. އެގޮތުން ކޮންމެ އަތޮޅަކާއި ސިޓީއެއްގައި ކޮމްޕްލެއިންޓްސް ބިޔުރޯ ގާއިމުކުރެވިފައިވާއިރު މާލޭގައި ގައުމީ ކޮމްޕްލެއިންޓްސް ބިޔުރޯ ގާއިމުކުރެވިފައިވާކަމަށެވެ. ވޯޓުލާ ދުވަހު ގާނޫނާއި ޚިލާފުކަމެއް ހިނގާނަމަ އެކަމެއް ހެއްކާއެކު ވީހާވެސް އަވަހަށް ހުށަހެޅުމަށް ހަބީބު އެދިވަޑައިގެންނެވިއެވެ. ހަބީބު ވިދާޅުވީ އިންތިޚާބީ މަރުކަޒެއްގައި ކަމެއް ހިނގާނަމަ އެކަމެއް ހުށަހަޅާނީ އެމަރުކަޒެއްގެ ވެރިއަކަށްކަމަށެވެ.

އެހާހިސާބުން ވޯޓުލާ މަރުކަޒުގެ ވެރިއަކު އެމައްސަލައެއް ހައްލުކުރަން މަސައްކަތްކުރާނެކަމަށެވެ. ފަހުން ޝަކުވާ ހުށަހެޅުމުން ކޯޓު މަރުހަލާގައިވެސް އެކަންކަން ފެންނަން ނޯންނާނެކަމަށް ހަބީބު ވިދާޅުވިއެވެ.

ރިޝްވަތު ހުށަހެޅުމާއި އައިޑީކާޑު ވިއްކާ މައްސަލަތަކެއް ސޯޝަލް މީޑިޔާގައި ދައުރުވަމުންދާކަމަށާއި އެފަދަ މައްސަލަތައް ހުށަހެޅިފައިވޭތޯ ނޫސްވެރިއަކު ކުރި ސުވާލަށް ޖަވާބު ދެއްވަމުން ހަބީބު ވިދާޅުވީ އެފަދަ މައްސަލައެއް ހުށަހެޅިފައިނުވާކެމަށެވެ. އަދި އިންތިޚާބުގެ ފުލުހުންގެ ފަރާތުން ހުންނަވާ ކޮމާންޑަރު އަހުމަދު ޝާކިރުވެސް ވިދާޅުވީ އެފަދަ މައްްސަލައެއް ހުށަހަޅާފައިނުވާކަމަށެވެ.

ނަމަވެސް އިންތިޚާބާއި ގުޅޭ ޝަކުވާ އޮންނަ ނިޒާމުގެ ތެރެއިން ހުށަހެޅުމަށް ދެބޭފުޅުންވެސް އެދިވަޑައިގެންނެވިއެވެ.

ހޮނިހިރު ދުވަހު ކުރިޔަށްދާ މިއަހަރުގެ ރިޔާސީ އިންތިޚާބަށް އިލެކްޝަންސް ކޮމިޝަން (އީސީ) އޮތީ ވަރަށް ފުރިހަމައަށް ތައްޔާރުވެފައިކަމަށާއި ކޮމިޝަންގެ ފަރާތުންވާން ޖެހޭ ތައްޔާރީތައް ވަނީ ނިމިފައިކަމަށް އެކޮމިޝަންގެ ނައިބު ރައީސް އިސްމާއީލު ހަބީބު ވިދާޅުވެއްޖެއެވެ.

ހުކުރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ހަބީބު ވިދާޅުވީ މިނިވަންކަމާއި އިންސާފުވެރިކަމާއެކު އިންތިޚާބުގެ ކަންކަން ކުރިޔަށްގެންދިޔުމަށް ސިޔާސީ ޕާޓީތަކާއި ކެންޑިޑޭޓުންނާއި ރައްޔިތުންގެ އެއްބާރުލުން ވަރަށް ބޮޑަށް އީސީއަށް ބޭނުންވާކަމަށެވެ. އަދި އަމާންކަމާއެކު އިންތިޚާބުގެ ހުރިހާ ކަމެއް ކުރިޔަށްދާނެ ގޮތެއްގެ މަތިން ހުރިހާ ފަރާތްތަކުންވެސް އަމަލުތައް ބެހެއްޓުމަށް ހަބީބު އެދިވަޑައިގެންނެވިއެވެ.

ހަބީބު ވިދާޅުވީ ވޯޓުލާންވީ މަރުކަޒު ކުރިން ބެލުމަކީ ވަރަށް މުހިންމުކަމެއްކަމަށާއި 1414ށް އެސްއެމްއެސްކޮށްގެން އެމައުލޫމާތު ޗެކުކުރުމަށްފަހު ވޯޓުލާން ދިޔުމަށް އެދޭކަމަށެވެ. އަދި ކާކުކަން އަންގައިދޭ ރަސްމީ މުއްދަތު ހަމަނުވާ އައިޑީކާޑު ނުވަތަ ޕާސްޕޯޓް ނުވަތަ ޕާސްޕޯޓް ކާޑު ނުވަތަ ޑްރައިވިންގ ލައިސަންސް ގެންދިޔުމުން ވޯޓުލެވޭނެކަމަށް ހަބީބު ވިދާޅުވިއެވެ.

ހުރިހާ ވޯޓު ފޮއްޓެއްގައިވެސް ހެނދުނު 8 ޖަހާއިރު ވޯޓުލާން ފެށޭނެކަމަށާއި 7:30ގައި ކިޔުހެދުމަށް ހުޅުވާލާނެކަމަށް ހަބީބު ވިދާޅުވިއެވެ. ރާއްޖެ ގަޑިން ހެނދުނު 8 ޖަހާއިރު ވޯޓުލާން ނުފެށޭނީ ލަންޑަންގައި ކަމަށާއި ލަންޑަންގައި ވޯޓުލާން ފެށޭނީ ރާއްޖެ ގަޑިން 12 ޖަހާއިރުކަމަށް ހަބީބު ވިދާޅުވިއެވެ.

އަދި ވޯޓު ލާ ނިމޭތާ 30 މިނެޓްފަހުން ވޯޓު ގުނަން ފަށާއިރު 4 ޖެހުމުގެ ކުރިން އެފޮއްޓަކަށް ވޯޓުލުމަށް ރަޖިސްޓްރީގައި އޮތް ހުރިހާ އެންމެން ވޯޓުލީ ކަމުގައިވިޔަސް އެ ފޮއްޓެއްގެ ވޯޓު ގުނަން ފަށާނީ 430 ގައި ކަމަށް ހަބީބު ވިދާޅުވިއެވެ. އަދި ވަގުތީ ނަތީޖާ ހަވީރު 5:30 އެހާއިރު އިއުލާންކުރަން ފެށޭނެކަމަށް ބެލެވޭކަމަށް ހަބީބު ވިދާޅުވިއެވެ.

މީގެއިތުރުން އިންތިޚާބަށް ނުފޫޒުފޯރުވާ ފަދަ އެއްވެސް ކަމެއް އެއްވެސް ފަރާތަކުން ނުކުރުމަށް ހަބީބު އެދިވަޑައިގެންނެވިއެވެ.

ހުކުރު ދުވަހުގެ އިރުއޮއްސި 6:00ން ފެށިގެން އާދިއްތަ ދުވަހުގެ ހެނދުނު 6:00 އާއި ހަމައަށް ކެމްޕޭންގެ އެއްވެސް ހަރަކާތެއް ހިންގުމަކީ މަނާކަމެކެވެ.