ރައީސް ސޯލިޙުގެ 3 ވަނަ ރިޔާސީ ބަޔާން އިއްވެވުން

ދެން ޖަލްސާއެއް އޮންނާނީ ހޯމަ ދުވަހުގެ ހެނދުނު 0900 ގައި ކަމަށް ރައީސް ނަޝީދު ވިދާޅުވި، ޖަލްސާ ނިންމަވާލެއްވި ނަމަވެސް، މަޖިލީހުގެ އާރކައިވް އަދި ލައިބްރަރީ ހުޅުވުން އޮންނާނެ

މަޖިލީހުގެ މައިނޯރިޓީ ލީޑަރަކީ އޭދަފުށީ ދާއިރާގެ މެމްބަރު އަހުމަދު ސަލީމްކަން ފާހަގަ ކުރައްވައި މަޖިލީހުގެ ރައީސް، މުޙައްމަދު ނަޝީދު ވަނީ ރިޔާސީ ބަޔާނަށް މައިނޯރިޓީ ލީޑަރު ދެއްވާ ޖަވާބު ތައްޔާރު ކުރެއްވުމަށް އެދިވަޑައިގަންނަވާފައި،

ރައީސް ވިދާޅުވީ، ރާއްޖެ ތަރައްޤީ ކުރާނީ ޑިމޮކްރެސީގެ ހަމަތަކާ އެއްގޮތަށް، ހެޔޮވެރިކަމުގެ އުޞޫލުން ކަމަށް، އަދި އެ އުސޫލުން ރާއްޖެ ކުރިއަރުވައި ތަރައްޤީކުރުމަށް ބޭނުންވާ އިތުރު ޤާނޫނުތަކުގެ ބިލުތައް މިއަހަރުގެ ތެރޭގައިވެސް ހުށައަޅުއްވާނެކަން ރައީސް ފާހަގަ ކުރެއްވި،

ރައީސް ވިދާޅުވީ، ދައުލަތުގެ އެހެން ބާރުތަކު ގެ ނުފޫޒުން މިންޖުވެ، މައްސަލަތައް ނިންމުމުގެ މިނިވަންކަން ، އެންމެ މަތީ ކޯޓުން ފެށިގެން އެންމެ ދަށު ކޯޓާ ހަމައަށް، މިހާރު އެބައޮތް ކަމަށް، އަދި ޝަރުޢީ މަރުޙަލާ އަވަސްކޮށް، އިންޞާފު ލިބޭނެ އިންތިޒާމް ކަށަވަރު ކުރުމަށްޓަކައި، ސަރކިޓް ކޯޓް ތަޢާރަފް ކުރުމަށް ބޭނުންވާ ޤާނޫނުގެ ބިލު އެކުލަވާލައި، މިއަހަރުގެ ތެރޭގައި މަޖިލީހަށް ހުށައަޅުއްވަން ޤަސްތު ކުރައްވާ ކަމަށް ރައީސް ވިދާޅުވި

ލ. ކަޅައިދޫގައި ހަދާ ރިހެބިލިޓޭޝަން މަރުކަޒުގައި ތަޢުލީމާއި ހުނަރުގެ މުހިންމު ޕްރޮގްރާމްތައް ހިންގާނެ ކަމަށް ރައީސް ސޯލިޙު ވިދާޅުވި، ރައީސް ވިދާޅުވީ، މަސްތުވާތަކެތި ބޭނުންކުރާ މީހުންނަށް ފަރުވާ ދިނުމަށް، ޑްރަގް އޮފެންޑާޒް ރިމާންޑް ސެންޓަރެއް ހެދުމަކީ، 2011 ވަނަ އަހަރު ޢަމަލުކުރަން ފެށި، މަސްތުވާތަކެއްޗާ ބެހޭ ޤާނޫނުން ލާޒިމްކޮށްފައި އޮތް ކަމެއް ކަމަށް، އަދި 10 އަހަރަށް ފަހު، މާލެ އަތޮޅު ގުޅީފަޅުގައި އެމަރުކަޒު ޤާއިމުކޮށް، އެތަނުގައި ބައެއް މީހުންނަށް ފަރުވާ ދިނުމުގެ މަސައްކަތް މިހާރު ފެށިފައިވާކަން ރައީސް ރިޔާސީ ބަޔާން އިއްވަވައިދެއްވަމުން ފާހަގަ ކުރެއްވި

ތިމާވެށީގެ ދާއިރާއިން ކުރައްވަން ނިންމަވާފައިވާ މުހިއްމު ކަންކަމަށް އަލިއަޅުވާލައްވާ ރައީސް ވިދާޅުވީ، އަމާޒަކީ، 2030 ވަނަ އަހަރުގެ ނިޔަލަށް، ދިވެހިރާއްޖޭގެ، ކާބަން އެމިޝަންސް، ނެޓް ޒީރޯއަށް ހެދުން ކަމަށް،

ރައީސް ވިދާޅުވީ، އެންމެ ގިނައިން ކުނި ޖަމާވެފައި ހުރި 20 ރަށުގެ ކުނިތައް، 7 މަސް ތެރޭގައި ނަގައި ސާފު ކުރުމަށް ވެމްކޯއާ ޙަވާލު ކުރެވިފައިވާ ކަމަށް، އަދި އެކަން ދާއިމީ ގޮތެއްގައި ޙައްލުކުރުމަށްޓަކައި، ރާއްޖޭގެ 3 ސަރަޙައްދެއްގައި ކުނި މެނޭޖްކުރާނެ ވަސީލަތްތައް ތަރައްޤީ ކުރަމުންދާ ކަމަށް ރައީސް ވިދާޅުވި

މ. މުލީގައި ތަރައްޤީކުރާ އެއަރޕޯޓުގެ މަސައްކަތް މި މަހު ބަޔަކާ ޙަވާލު ކުރައްވާނެ ކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ވިދާޅުވި،

އޭގެ އިތުރުން، ހދ. މަކުނުދުއާއި، ށ. ބިލެތްފަހި އަދި ބ. ތުޅާދުއާއި ތ. ވިލުފުށީގައި އެއަރޕޯޓް ހަދައިދޭނެ ބަޔަކު ހޯދަން މިހާރު ހުޅުވާލާފައިވާކަން ރައީސް ފާހަގަ ކުރެއްވި

އެންޓި- ޓްރެފިކިން އިން ޕާސަންސް އޮފީހެއް މިއަހަރު ޤާއިމު ކުރަން ނިންމަވާފައިވާކަން ދާދި ދެންމެ ރިޔާސީ ބަޔާން އިއްވަވަމުން ރައީސް ސޯލިޙު ވަނީ އިއުލާނު ކުރައްވާފައި،

ރިޔާސީ ބަޔާން އިއްވަވަމުން ރައީސް ސޯލިޙު ވިދާޅުވީ، ލޯކަލް ޕޮލިސިންގް ޕްރައިއޯރިޓީގެ ދަށުން، މިއަހަރުގެ ތެރޭގައި، އިތުރު 42 ޕޮލިސް ސްޓޭޝަން ޤާއިމުކުރަން މަސައްކަތް ކުރައްވަމުން ގެންދަވާ ކަމަށް، އަދި މިހާރު އައްޑޫގައި ހަދަމުން އަންނަ، ނޭ ޝަނަލް ކޮލެޖް އޮފް ޕޮލިސިންގް އެންޑް ލޯ އެންފޯރސްމަންޓް ސެންޓަރވެސް، މިއަހަރުގެ ތެރޭގައި ރަސްމީކޮށް ހުޅުވައި ޚިދުމަތް ދޭން ފެށޭނެކަން ރައީސް ފާހަގަ ކުރެއްވި

ރިޔާސީ ބަޔާން އިއްވަވައިދެއްވަމުން ރައީސް ސޯލިޙު ވަނީ ދިވެހި ފުލުހުންގެ ޚިދުމަތް ޕްރޮފެޝަނަލްކޮށް ، ނެއިބަރހުޑް ޕޮލިސިންގެ އުޞޫލުން ޚިދުމަތް ދިނުމަށް، މިދިޔަ އަހަރުގެ ތެރޭގައި މުހިންމު ގިނަ މަސައްކަތްތަކެއް ކުރެވިފައިވާކަން ފާހަގަ ކުރައްވާފައި، އަދި އޭގެ ނަތީޖާވެސް ރަނގަޅުކަން ފާހަގަ ކުރައްވައި ރައީސް ވިދާޅުވީ، މިދިޔަ އަހަރުގެ ތެރޭގައި، ގުރޫޕް މާރާމާރީއެއްގައި އެއްވެސް މީހެއްގެ ފުރާނަ ގެއްލިފައިނުވާކަމަށް،

ޚާރިޖީ ސިޔާސަތުތަކާ ގުޅޭގޮތުން ވާހަކަ ދައްކަވަމުން ރައީސް ވިދާޅުވީ، އިތުރު ޤައުމުތަކަށް "ނޮން-ރެސިޑެންޓް" ސަފީރުން ކަނޑައެޅުމަށް މަސައްކަތް ކުރައްވަމުން ގެންދަވާ ކަމަށް، އެގޮތުން ފުރަތަމަ ފަހަރަށް ފަލަސްޠީނަށް "ނޮން - ރެސިޑެންޓް" ސަފީރެއް މި އަހަރުގެ ތެރޭގައި އައްޔަންކުރުމަށް ޤަސްދު ކުރައްވާކަމަށް ރައީސް ވިދާޅުވި

ރިޔާސީ ބަޔާން އިއްވަވައިދެއްވަމުން ރައީސް ވިދާޅުވީ، ޚާއްޞަ އެހީއަށް ބޭނުންވާ މީހުންނާއި ކުދިންނަށް ބޭނުންވާ ޚިދުމަތްތައް އެއް ފުރާޅެއްގެ ދަށުން ލިބިދިނުމަށްޓަކައި، ޑިސްއެބިލިޓީ މެނޭޖްމަންޓް އެންޑް ރިހިބިލިޓޭޝަން ސެންޓަރ ޤާއިމްކުރުމުގެ މަސައްކަތް މިއަހަރު ފައްޓަވާނެ ކަމަށް، އަދި އެކުދިންނަށް ބޭނުންވާ ތެރަޕީއާއި ފަރުވާ ލިބޭނެ ވަސީލަތްތަކާއެކު، ހުޅުމާލޭ ހޮސްޕިޓަލްގައި ޗައިލްޑް ޑިވެލޮޕްމަންޓް ސެންޓަރެއް ޤާއިމްކުރުމުގެ މަސައްކަތް ކުރަމުންދާކަންވެސް ރައީސް ފާހަގަ ކުރެއްވި

އޭގެ އިތުރުން، ފަޚުރުވެރިކަމާއެކު، ދިރިއުޅެވޭނެ މާޙައުލެއް ޤާއިމްކުރުމަށްޓަކައި، މުޅިންއަލަށް އެލްޑަރލީ ވިލެޖެއް، އައްޑު އަތޮޅުގައި ޤާއިމްކުރުމުގެ މަސައްކަތްވެސް މިއަހަރު ފެށޭނެކަން ރައީސް ފާހަގަ ކުރެއްވި

ރިޔާސީ ބަޔާން އިއްވަވަމުން ރައީސް ސޯލިޙު ވިދާޅުވީ، ދީނުގެ ނަމުގައި، ކުޑަކުދިންނާއި އަންހެނުންނަށް ޖިންސީ އަދި ޖިސްމާނީ ގޯނާކޮށް، ޙައްޤުތަކުން މަޙްރޫމްކޮށް، މުޖްތަމަޢު ބައިބައިކުރުމަށް، އެއްވެސް ބަޔަކަށް މިފަސްގަނޑުގައި އެއްވެސް ފުރުޞަތެއް ނުދެވޭނެ ކަމަށް،

އޭގެ އިތުރުން، އަނިޔާ ލިބޭ ކޮންމެ މީހަކު އަނިޔާއިން ދުރުކޮށް، ރައްކާތެރި އަމާން ދިރިއުޅުމަކަށް މަގުފަހިކޮށްދިނުމަކީ، ހެޔޮވެރިކަމުގެ އެންމެ މުހިންމު އަސާސް ކަމަށް ޤަބޫލު ކުރައްވާކަމަށް ރައީސް ވިދާޅުވި

ރައީސް ވިދާޅުވީ، ރާއްޖޭގައި މުޅިން އަލަށް ފަށާ ކޮންޓްރެކްޓް ފާމިންގ އުޞޫލުން ދަނޑުވެރިކަން ކުރަން ކަނޑައަޅާފައިވާ 45 ރަށެއް ގެ ދަނޑުވެރިންނާއެކު، ކުރިއަށް އޮތް 2 މަސް ދުވަހުގެ ތެރޭގައި އެއްބަސްވުން ޤާއިމުކޮށް، ތިމާވެއްޓާ ރައްޓެހި ޒަމާނީ ޓެކްނޮލޮޖީގެ އެހީގައި ދަނޑުވެރިކަން ފެށުމަށް، އެގްރޯ ކުންފުނިން މިހާރު ތައްޔާރުވަމުންދާ ކަމަށް ، އަދި އެކަމުގެ މަޤްސަދަކީ ރާއްޖޭގައި ކާބޯތަކެތި އުފައްދާ މިންވަރު އިތުރުކޮށް، ރާއްޖެއަށް އެތެރެކުރާ ކާބޯތަކެތީގެ މިންވަރު މަދުކޮށް، ކާނާގެ ޔަޤީންކަން ކަށަވަރުކޮށްދިނުން ކަމަށްވެސް ރައީސް ވިދާޅުވި

ރިޔާސީ ބަޔާން އިއްވަވަމުން ރައީސް ވިދާޅުވީ، މި އަހަރުގެ ތެރޭގައި ޖުމްލަ 18 ރިސޯޓެއް މުޅިން އަލަށް ހުޅުވި 5062 އެނދު މާރކެޓަށް ނެރެވޭނެ ކަމަށް އުއްމީދު ކުރެވޭ ކަމަށް، އެއާއެކު، ފަތުރުވެރިކަމުގެ ދާއިރާއިން އެކަނިވެސް، އިތުރު 9000 ވަޒީފާ މިއަހަރުގެ ތެރޭގައި އުފެދޭނެ ކަމަށް ލަފާކުރެވޭކަން ރައީސް ފާހަގަ ކުރެއްވި

ރައީސް ވިދާޅުވީ، ސަރުކާރުން ޚިދުމަތް ދެމުން އައިސްފައިވަނީ ސިވިލް ސަރވިސްގެ އެންމެ މުވައްޒަފެއްގެ މުސާރަވެސް އުނިނުކޮށް އަދި އެންމެ މުވައްޒަފަކުވެސް ވަޒީފާއިން ވަކިނުކޮށް ކަމަށް، އަދި އެތައް ދިވެހިންނެއްގެ ވަޒީފާ ސަލާމަތް ކުރައްވައި، ވިޔަފާރިތައް ބަނގުރޫޓުވިޔަ ނުދީ ހިފެހެއްޓުމަށް ގިނަ މަސައްކަތްތަކެއް ކުރެވުނުކަން ރައީސް ފާހަގަ ކުރެއްވި