އެސްބީއައި އިމާރާތުގައި ރޯވި އަލިފާންގަނޑު ކޮންޓްރޯލް ކުރިތާ މާ ގިނަ އިރުތަކެއް ނުވަނީސް އެ އިމާރާތުގެ 8 ވަނަ ފަންގި ފިލާއިން އަލިފާނުގެ އަސަރު ފެނިއްޖެއެވެ. އެމްއެންޑީއެފުން ދަނީ އަލިފާން އެއްކޮށް ނިއްވާލުމުގެ މަސައްކަތް ކުރަމުންނެވެ.

އަލިފާނުގެ ހާދިސާ ހިނގި ސަރަހައްދުގައި ހުރި އިމާރާތްތަކުން މީހުން ހުސްކުރުމަށްފަހު، ބައެއް އިމާރާތްތަކަށް އާންމުން ވަންނަން ހުއްދަދޭން ފަށައިފިއެވެ. އެމްއެންޑީއެފުން ބުނެފައިވަނީ އަލިފާންގަނޑު ކޮންޓްރޯލްވުމާއެކު ބަލަންޖެހޭ ކަންކަން ބަލަމުން އަންނަ ކަމަށެވެ.

ކޮވިޑް-19 އާއި ގުޅިގެން ރާއްޖެ އަނެއްކާ ވެސް ލޮކްޑައުންއަކަށް ގޮސްފިނަމަ އެކަމުގެ ގެއްލުންތަކެއް ލިބިގެން ހިނގައިދާނެ ކަމަށާއި، މަސައްކަތް ކުރައްވަނީ ލޮކްޑައުންއަކަށް ނުގޮސް ކަންކަން ކުރެއްވޭތޯ ކަމަށެވެ. ރައީސް ވިދާޅުވީ ހުރިހާ ރައްޔިތުންގެ ހައްގުގައި ކުރައްވަން ޖެހޭ ކޮންމެ ކަމެއް ކުރައްވާނެ ކަމަށެވެ.

އެޗްޕީއޭގެ ގަވާއިދާ އެއްގޮތަށް ހުރިހާ ފަރާތްތަކުންވެސް އަމަލުކުރަމުން ގެންދިޔުމަށާއި އެގައިޑްލައިންތަކާއި ޚިލާފަށް އަމަލުކުރާ ފަރާތްތަކާމެދު ފުލުހުން ފިޔަވަޅު އަޅަމުން ގެންދާނެކަމަށް ރައީސް ވިދާޅުވިއެވެ.

އަލިފާން ރޯވި ސަރަހައްދުގައި އެކި މަސައްކަތުގައި އުޅުއްވާ މީހުން ފިޔަވައި އެހެން އެންމެން ގެއަށް ވަޑައިގަންނެވުމަށް ރައީސް އިލްތިމާސްކުރައްވައިފިއެވެ. ރައީސް ވިދާޅުވީ އަލިފާޏުގެ ހާސިދާގެ އިތުރުން ބަލިމަޑުކަމެއް އެބައޮތް ކަމަށާއި، ފެތުރެން ދިމާވަނީ އެންމެން އެއްތަނަކަށް އެއްވެ ގައިގޯޅިވާތީ ކަމަށެވެ. އެހެންކަމުން މިކަންކަމަށް ސަމާލުވެ އެޗްޕީއޭގެ އެންގުމާ އެއްގޮތަށް އަމަލުކުރުމަށް ރައީސް ވަނީ އެދިވަޑައިގެންފައެވެ.

އަލިފާނުގެ ހާދިސާ ހިނގި ސަރަހައްދަށް ރައީސް ވަޑައިގެން ކަންކަން ދަނީ ބައްލަވަމުން. ރައިސްގެ އިތުރުން ނައިބު ރައީސް ފައިސަލް ނަސީމް ވެސް ހުންނެވީ އެ ސަރަހައްދުގައި.

ބޮޑުތަކުރުފާނު މަގުގައި ހުންނަ އެސް.ބީ.އައި އާއި އިންވެގެން ހުރި ކެފޭގައި އަލިފާން ރޯވުމުގެ ސަބަބުން އެސަރަހައްދުގައި ހުރިި ގެތަކުގައި ދިރިއުޅެމުންދާ ފަރާތްތައް ވަނީ އިވަކުއޭޓް ކުރެވިފައި. އިތުރު މައުލޫމާތު ކުރިއަށް އޮތް ގަޑިތަކުގައި ފޯރުކޮށް ދެވޭނެ.

އަލިފާން އެއްވެސް ސަރަހައްދަކަށް ފެތުރިފައިވޭތޯ، އަދި އިތުރަށް ބަލަންޖެހޭ ކަންކަން ބެލުމުގެ މަސައްކަތް ކުރިއަށް އެބަދޭ. އަލިފާނުގެ އަސަރު ކުރީ ކިތައް އިމާރާތަށް ކަމެއް އަދި ސާފެއް ނޫން.

އަލިފާންގަނޑު ރޯވި ސަރަހައްދަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަޑައިގެންފި އެވެ.

މިރޭ ހިނގި އަލިފާނުގެ ހާދިސާ ތަހުގީގުކުރަން ފަށާފައިވާ ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެ އެވެ. އަލިފާން ގަނޑު މިހާރު ވަނީ ކޮންޓްރޯލް ކުރެވިފައެވެ.

އަލިފާންގަނޑު ރޯވި ސަރަހައްދަށް ކުޅި ބަލަން ދިޔަ މީހުން އެސަރަހައްދުން ދުރުކުރެވިފައިވާ ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ. ރާއްޖެ ޓީވީގެ ލައިވްކަވަރރޭޖަށް ދެއްވި ޚާއްސަ އިންޓަވިއުގައި ވާހަކަފުޅު ދައްކަވަމުން ސީޕީ ވިދާޅުވީ އިތުރު ނުރައްކަލެއް މިހާރު ނެތްކަމަށާއި އަލިފާންގަނޑު ކޮންޓްރޯލް ކުރެވިފައިވާ ކަމަށެވެ.

އަލިފާނުގެ ހާދިސާ ހިނގި ސަރަހައްދަށް ނައިބު ރައީސް ފައިސަލް ނަސީމް ވަޑައިގެންފިއެވެ. އަދި އެ ސަރަހައްދުގެ ހާލަތު ނައިބު ރައީސް ވަނީ ބައްލަވާލައްވާފައެވެ.

ބޮޑުތަކުރުފާނު މަގުގައި އެސްބީއައި ކައިރީގައި ހުރި ކެފޭއަކާއި އެސްބީއައި އިމާރާތުގައި އަލިފާން ރޯވުމާއި ގުޅިގެން، އެ ސަރަހައްދަށް ރައީސް އިބްރާހިމް މުހައްމަދު ސޯލިހު ޒިޔާރާތް ކުރައްވައިފިއެވެ. ހޯމް މިނިސްޓަރ އިމްރާން އަބްދުﷲ ވިދާޅުވީ އެ ސަރަހައްދަށް ރައީސް ވަޑައިގެން ހާދިސާގެ ކަންކަން ބައްލަވާފައިވާ ކަމަށެވެ.

އަލިފާން ރޯވި ސަރަހައްދަށް އެއްވެ ނޫޅުމަށާއި މިފަދަ ދަނޑިވަޅެއްގައި ހުރިހާ ރައްޔިތުންވެސް ފަރުދީ ޒިންމާ އަދާކުރުމަށް ހޯމް މިނިސްޓަރ އިމްރާން އަބްދުﷲ އެދިވަޑައިގެންފި އެވެ. އިމްރާން ވިދާޅުވީ އެސަރަހައްދަށް އެއްވާ މީހުން ދުރަށް ޖެއްސުމުގެ މަސައްކަތް ފުލުހުން ކުރަމުންދާ ކަމަށް މިނިސްޓަރ ވިދާޅުވި އެވެ. އަދި އަލިފާންގަނޑު ކޮންޓްރޯލްކުރެވި މިރޭ ކައިރި ގެތަކުގެ މީހުންނަށް އަނބުރާ ގެތަކަށް ދެވޭނެކަމަށް އުންމީދުކުރައްވާ ކަމަށްވެސް އިމްރާން ވިދާޅުވި އެވެ.

އެސްބީއައި ކައިރީގައި ހުރި ކެފޭގައި ހިނގި އަލިފާނުގެ ހާދިސާއާއި ގުޅިގެން ވަގުތީ ބޯހިޔާވަހިކަން ބޭނުންވާ ފަރާތްތަކަށް އެހީތެރިވުމަށް ކަލާފާނު ސްކޫލް އެކްޓިވޭޓް ކޮށްފައިވާ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީން ބުނެފިއެވެ.

އަލިފާނުގެ ހާދިސާއާއި ގުޅިގެން ނެޝަނަލް އެމަރޖެންސީ އޮޕަރޭޝަން ސެންޓަރު އެކްޓިވްވޭޓް ކޮށްފައިވާ ކަމަށް ނެޝަނަލް ޑިޒާސްޓާ މެނޭންޖްމަންޓް އޮތޯރިޓީން ބުނެފިއެވެ. އަދި އަލިފާނުގެ ހާދިސާގައި އެހީތެރިކަން ފޯރުކޮށްދޭން ޖެހޭ ފަރާތްތަކަށް އެހީތެރިކަން ފޯރުކޮށްދިނުމުގެ މަސައްކަތް ދަނީ ކުރަމުން.

އެމްއެންޑީއެފުން ބުނީ ރޯވި އަލިފާންގަނޑު ކޮންޓްރޯލް ކުރެވިއްޖެ ކަމަށާއި ހަދިސާގައި އެއްވެސް މީހަކަށް އަނިޔާ ނުވާ ކަމަށެވެ. ފަޔަރ ޓީމުން ދަނީ އަދިވެސް ހަރަކާތްތެރިވަމުން.

އަލިފާނުގެ ހާދިސާ ހިގައިގެން އުޅޭ ސަރަހައްދުގައި ދިރިއުޅޭ#ކޮވިޑް19ޕޮޒިޓިވް ފަރާތްތަކާއި ކޮންޓެކްޓްސް 1676 އަށް ގުޅުމަށް ހެލްތް މިނިސްޓްރީން ވަނީ އިލްތިމާސްކޮށްފައި

އަލިފާނުގެ ހާދިސާ ހިނގާ ސަރަޙައްދަށް އާއްމުފަރާތްތަކުން ނުދިއުމަށް އިލްތިމާސް ކުރަން މިވަގުތު ބޮޑުތަކުރުފާނު މަގު އެސް ބީ އައި ސަރަހައްދުގައި ހިނގަމުންދާ އަލިފާނުގެ ހާދިސާގައި، ދުމުން ރައްކާތެރިވުމަށް ދުމުގެ އަސަރު ކުރާ ހިސާބަށް އާއްމު ފަރާތްތަކުން ނުދިޔުމަށް އިލްތިމާސްކުރަން.

އާޓީފިޝަލް ބީޗު ކައިރީގައި ހުރި މި އިމާރާތުގައި ރޯވި އަލިފާންގަނޑު ކޮންމެވެސް ވަަރަކަށް ކޮންޓްރޯލްވެއްޖެ. އެމްއެންޑީއެފުން އަލިފާން ނިއްވަން ކުރަމުންދާ މަސައްކަތުގައި އެއަރޕޯޓް ފަޔަރުން ދަނީ އެހީތެރިވަމުން.

އަލިފާން ރޯވެފައިވާ ސަރަހައްދަށް ނުދިއުމަށް މޯލްޑިވްސް ނޭޝަނަލް ޑިފެންސް ފޯރސް، (އެމްއެންޑީއެފް) އިން އާއްމުންނަށް އިލްތިމާސްކޮށްފިއެވެ. އަދި އެ ސަރަހައްދުގައި އެއްވެފައި ތިބި މީހުން ދުރަށް ދިއުމަށް ވެސް ވަނީ އިލްތިމާސްކޮށްފައެވެ.

އެމްއެންޑީއެފުން ބުނީ ގިނަ އަދަދެއްގެ ފަޔަރ ވެހިކަލްތައް ހަރަކާތްތެރިވަމުން އަންނަ ކަމަށެވެ.

އަލިފާނުގެ ހާދިސާގައި އެއްވެސް ފަރާތަކަށް ގެއްލުންވެފައިވާކަމުގެ މައުލޫމާތު ކަމާބެހޭ އެއްވެސް އިދާރާއަކުން ދީފައެއް ނުވެއެވެ.

އަލިފާންގަނޑު ކޮންޓްރޯލް ކުރުމަށް ފަޔަރ އެންޑް ރެސްކިއު އިން ދަނީ ހަރަކާތްތެރިވަމުންނެވެ.

މަންޒަރު ދުށް މީހުން ބުނާ ގޮތުން މި ސަރަހައްދުގައި އެންމެ ފުރަތަމަ އަލިފާން ރޯވީ 'ކެފޭ ޓިއޯލޯ' ގައެވެ. އަދި ސްޓޭޓް ބޭންކް އޮފް އިންޑިއާ ހުންނަ އިމާރާތަށް އަލިފާންގަނޑު ފެތުރުނު ކަމަށެވެ. އެ އިމާރާތުގެ ޓެރަހުގައި ވަރަށް ބޮޑަށް ވަނީ ރޯވެފައެވެ.

މިވަގުތު ބޮޑުތަކުރުފާނު މަގު އެސް ބީ އައި ސަރަހައްދުގައި ހިނގަމުންދާ އަލިފާނުގެ ހާދިސާގައި، ދުމުން ރައްކާތެރިވުމަށް ދުމުގެ އަސަރު ކުރާ ހިސާބަށް އާއްމު ފަރާތްތަކުން ނުދިޔުމަށް ހެލްތު ޕްރޮޓެކްޝަން އޭޖެންސީ އިން އިލްތިމާސްކޮށްފިއެވެ.

އެގޮތުން، ދުމުގެ އަސަރު ކުރާ ހިސާބުތަކުގައި ގޭގެތެރެއަށް ދުން ނުވަންނަހެން ދޮރާއި ކުޑަދޮރުތައް ރަނގަޅަށް ލެއްޕުން މުހިއްމު ކަމަށާއި ހާއްސަކޮށް އުމުރުން ދުވަސްވީ ފަރާތްތަކާއި ކުޑަކުދިންނާއި ނޭވާލާ ނިޒާމުގެ ބަލިތައް ހުންނަ ފަރާތްތަކާއި ހިތުގެ ބަލިތައް ހުންނަ ފަރާތްތަކަށް ދުމުގެ އަސަރު ކުރުމުން ނުރައްކާވެދާނެ ކަމަށް ވެސް ވަނީ ބުނެފައެވެ.

އަލިފާން ރޯވި ސަރަހައްދުގައި އުޅެމުންދާ ކޮވިޑް-19 ޖެހިފައިވާ މީހުންނާއި ކޮންޓެކްޓުން ހެލްތު ޕްރޮޓެކްޝަން އޭޖެންސީ (އެޗްޕީއޭއަށް) ރިޕޯޓު ކުރުމަށް އެދެފިއެވެ.

އެމްއެންޑީއެފް އިން މައުލޫމާތުދޭ ގޮތުގައި އަލިފާން ރޯވެފައި ވަނީ ސްޓޭޓް ބޭންކް އޮފް އިންޑިއާ ހުންނަ އިމާރާތުގައެވެ.

އާޓީފިޝަލް ބީޗު ކައިރީގައި ހުރި މި އިމާރާތުގައި ރޯވި އަލިފާންގަނޑު ކޮންޓްރޯލް ކުރުމަށް އެމްއެންޑީއެފްގެ ފަޔަރ ޓީމުން މިހާރު ދަނީ ހަރަކާތްތެރިވަމުންދާ ކަމަށާއި ކައިރީގައި ހުރި އިމާރާތުން މީހުން ހުސްކުރުމުގެ މަސައްކަތް ކުރަމުން ދާކަމަށް އެމްއެންޑީއެފް އިން ބުނެއެވެ.