ބީއެމްއެލުން ޚިދުމަތް ދެމުންދާ ގަޑިތަކަށް އާދީއްތަ ދުވަހުން ފެށިގެން ބަދަލު ގެންނަނީ

ބޭންކް އޮފް މޯލްޑިވްސް (ބީއެމްއެލް) އިން ޚިދުމަތް ދެމުންދާ ގަޑިތަކަށް އާދީއްތަ ދުވަހުން ފެށިގެން މިމަހުގެ 20 ވަނަ ދުވަހުގެ ނިޔަލަށް ބަދަލު ގެނެސްފިއެވެ.

ބީއެމްއެލުން ބުނީ ހެލްތް ޕްރޮޓެކްޝަން އެޖެންސީން ކަނޑައަޅުއްވާފައިވާ އުސޫލޫތަކާއި އެމް.އެމް.އޭ ގެ އިއުލާނާ އެއްގޮތްވާ ގޮތުގެ މަތިން ޚިދުމަތް ދިނުމަށް 16 މޭ އިން ފެށިގެން 20 މޭ 2021 އާ ހަމަޔަށް ބޭންކު ހުޅުވިފައި ހުންނަ ދުވަސްތަކަށް ބަދަލު ގެނެވިފައިވާ ކަމަށެވެ.

އެގޮތުން މި މުއްދަތުގައި ބޭންކް އޮފް މޯލްޑިވްސްގެ ބްރާންޗް ތަކާއި ސަރވިސް ސެންޓަރތައް ހުޅުވާފައި ހުންނާނީ ހޯމަ، އަންގާރަ އަދި ބުރާސްފަތި ދުވަހު ހެނދުނު 09:30 އިން މެންދުރު 12:00ށް ކަމަށެވެ. އަސާސީ ޚިދުމަތްތައް ފޯރުކޮށްދިނުމަށް ރާއްޖެއިން ބޭރަށް ފައިސާ ފޮނުވުމުގެ ޚިދުމަތާއި (ޓީޓީ) ބީއެމްއެލް ޗެކް ޕްރޮސެސް ކުރުމަށް ހަމަޖެހިފައިވާ ކަމަށެވެ. އަދި ހެނދުނު 11:00 ގެ ކުރިން ލިބޭ ހުށަހެޅުންތަކާއި ޖަމާކުރެވޭ ޗެކްތައް ހަފްތާ ބަންދާއި ސަރުކާރު ބަންދު ނޫން ދުވަސްތަކުގައި ޕްރޮސެސް ކުރެވޭނެ ކަމަށް ބީއެމްލުން ބުނެއެވެ.  

މީގެ އިތުރުން ބީއެމްއެލުން ބުނީ މާލޭ ސިޓީގައި ބޭންކިންގ ޚިދުމަތް ހޯދުމަށް ކިއުބީ އެޕް މެދުވެރިކޮށް އޮންލައިން ނަންބަރު ނެގޭނެ ކަމަށެވެ. އަދި ޚިދުމަތް ހޯދުމަށް ބޭންކަށް ދިއުމުގެ ކުރިން ކިޔުގައި މަޑުކޮށްގެން ކަސްޓަމަރުންގެ އަދަދު ޗެކްކުރުމަށް އެދިފައިވެއެވެ.

އެޕޮއިންޓްމަންޓަށް ދެމުންދާނެ ޚިދުމަތްތަކަށް އަލިއަޅުވާލައި ބީއެމްއެލުން ބުނީ އެކައުންޓް އޯޕެނިންގ ސެންޓަރ، ލޯން ސެންޓަރ އަދި ބިޒްނަސް ސެންޓަރތަކުން ޚިދުމަތް ދިނުމަށް ހަމަޖެހިފައިވަނީ އެޕޮއިންޓްމަންޓަށް ކަމަށެވެ. އަދި ބޭންކުގެ ވެބްސައިޓް މެދުވެރިކޮށް އެޕޮއިންޓްމަންޓަށް އެދި ހުށަހެޅޭނެއެވެ.

ކަސްޓަމަރުން ގޭގައި ތިބެގެން ބޭންކިންގ ޚިދުމަތް ހޯދުމަށާއި އޮންލައިންކޮށް ލިބެން ހުންނަ ހިދުމަތްތައް ބޭނުން ކުރުމަށް ބޭންކުން ވަނީ އިލްތިމާސް ކޮށްފައެވެ.