ޓެރަރިސްޓް ހަމަލާގެ މައުލޫމާތު ފުލުހުންނަށް ރިޕޯޓުކުރަން އަންގާފައެއް ނެތް: އިލްޔާސް
14 މެއި 2021 | ހުކުރު 16:22އެ މައުލޫމާތު އާންމުންގެ މީހެއްގެ ފަރާތުން ލިބުނު ކަމަށް ވިދާޅުވި
ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބު- އިލްޔާސަކީ ރައްޔިތުންގެ މަޖިލީހުގެ 241 ކޮމިޓީގެ މެމްބަރެއް
ރައީސް ނަޝީދަށް އަމާޒުކޮށް ބަޔަކު ހަމަލާއެއް ދޭން ރާވަމުންދާ ކަމުގެ މައުލޫމާތު އާންމުންގެ މީހަކު ހިއްސާކުރުމުން އެކަން ޑިފެންސް މިނިސްޓަރ މާރިޔާ އަހުމަދު ދީދީގެ ސަމާލުކަމަށް ގެނެސްފައިވާނެ ކަަމަށާއި، ނަމަވެސް ފުލުހުންނަށް އެ މައުލޫމާތު ރިޕޯޓު ކުރުމަށް އަންގާފައި ނެތްކަމަށް ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބު ވިދާޅުވެއްޖެއެވެ.
ހުކުރު ދުވަހު އިލްޔާސް ނެރުއްވި ނޫސްބަޔާނެއްގައި ވިދާޅުވީ، ރައީސް ނަޝީދު އަވަހާރަކޮށްލަން ބަޔަކު ރާވަމުންދާކަމުގެ މައުލޫމާތު އާންމުންގެ މީހެއްގެ ފަރާތުން ލިބުނު ކަމަށެވެ. އެ އެމައުލޫމާތު ވަގުތުން ރައީސް ނަޝީދާ ހިއްސާ ކުރައްވާފައިވާނެ ކަމަށް މެމްބަރު އިލްޔާސް ވިދާޅުވިއެވެ.
އޭގެ އިތުރުން، މިނިސްޓަރ އޮފް ޑިފެންސް މާރިޔާ އަހުމަދު ދީދީއަށް ގުޅުއްވައި ރައީސް ނަޝީދުގެ އިރުޝާދާއެކު، އެ މައުލޫމާތު މިނިސްޓަރަށް އަރުވާފައިވާނެ ކަމަށްވެސް އިލްޔާސް ވިދާޅުވިއެވެ. އިލްޔާސް ވިދާޅުވީ، އޭނާއަށް ލިބިފައިހުރި މައުލޫމާތުގެ ތަފްސީލު މިނިސްޓަރާ ހިއްސާ ކުރައްވާފައިވާނެ ކަމަށާއި، ރައީސް ނަޝީދުގެ ސަލާމަތާ ރައްކާތެރިކަން ބެލެހެއްޓުމުގެ ގާނޫނީ ޒިންމާ އަދާކުރަންޖެހޭ ފަރާތަކީ ޑިފެންސް މިނިސްޓްރީ ކަމަށްވާތީ އެ މައުލޫމާތު އެމުއައްސަސާއާ ހިއްސާކުރުމުން، އެ މައުލޫމާތު މޯލްޑިވްސް ޕޮލިސް ސަރވިސް ނުވަތަ ކޮމިޝަނަރ އޮފް ޕޮލިސްއާ ހިއްސާކުރުމަށް އަންގާފައި ނުވާ ކަމަށެވެ.
އިލްޔާސް ވިދާޅުވީ، ރައީސް ނަޝީދަށް ހަމަލާދިން މައްސައްލައިގެ ތަހުގީގަށް އޭނާގެ ފަރާތުން ދޭންޖެހޭ މައުލޫމާތާއި އެއްބާރުލުން ދެމުން ގެންދާ ކަމަށެވެ.
އިލްޔާސަކީ ރައްޔިތުންގެ މަޖިލީހުގެ 241 ކޮމިޓީގެ މެމްބަރެއްވެސް މެއެވެ.
