ރައީސް ނަޝީދު ޖަރުމަނަށް ދަތުރުކުރެއްވި އެއާރ އެމްބިއުލާންސްގެ ޚަރަދު ހަމަޖެއްސީ ޖަރުމަނުން

ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ޖަރުމަނަށް ދަތުރު ކުރެއްވި އެއާރ އެންބިއުލާންސްގެ ޚަރަދު ހަމަޖައްސާފައި ވަނީ ޖަރުމަނު ވިލާތުގައި ހުންނަވާ ރާއްޖޭގެ އޮނަރަރީ ކޮންސޫލް މިސްޓަރ ކްރިސްޓިއަން ވޮން ސްޓެޓެން މެދުވެރިކޮށް ކަމަށް ރައްޔިތުންގެ މަޖިލީހުން ބުނެފިއެވެ.

މާލޭގައި ދިން ޓެރަރިސްޓް ހަމަލާގައި ރައީސް ނަޝީދަށް ލިބިވަޑައިގެންނެވި ޒަޚަމްތަކަށް އޭޑީކޭގައި ފަރުވާ ހޯއްދެވުމަށް ފަހު ބޭރަށް ފުރާ ވަޑައިގެންނެވީ، ބުރާސްފަތި ދުވަހުގެ ހެނދުނެވެ.

މިކަމާ ގުޅޭ ގޮތުން މަޖިލީހުން ނެރުނު ބަޔާނުގައި ބުނެފައި ވަނީ، ރައީސް ނަޝީދު ދަތުރުކުރެއްވި އެއާރ އެމްބިއުލާންސްގެ ޚަރަދާއި ބޭސްފަރުވާގެ ޚަރަދު ހަމަޖެއްސީ އޮނަރަރީ ކޮންސޫލް މިސްޓަރ ކްރިސްޓިއަން ވޮން ސްޓެޓެން މެދުވެރިކޮށް ކަމުގައެވެ.

ރައީސް ނަޝީދުގެ ދަތުރުފުޅުގެ ހުރިހާ އިންތިޒާމެއް ހަމަޖައްސާފައިވަނީ މިނިސްޓްރީ އޮފް ފޮރިން އެފެއާޒްއާއި ޖަރުމަނުވިލާތުގައި ހުންނަ ރާއްޖޭގެ އެންބަސީ މެދުވެރިކޮށް ޖަރުމަނުގެ ސަރުކާރުން ކަމަށް މަޖިލީހުގެ ބަޔާނުގައި ވެއެވެ.

ނަޝީދު އަވަހާރަކޮށްލަން، މެއި މަހުގެ ހަވަނަ ދުވަހު ދިން ހަމާލާގައި ރައީސް ނަޝީދުގެ އިތުރުން، އަރިހުގައި އެވަގުތު ތިއްބެވި ސިފައިންނާއި އާންމުންނަށް ވެސް އެކި ވަރުގެ އަނިޔާ ލިބިފައިވެއެވެ.

މި ނުރައްކާތެރި ހަމަލާގައި އިސްކޮށް އުޅުނު މީހުންގެ ތެރެއިން މިހާތަނަށް 3 މީހަކު ފުލުހުން ވަނީ ހައްޔަރު ކޮށްފައެވެ. އެ ތިން މީހުންގެ ބަންދަށް 15 ދުވަހުގެ މުއްދަތެއް ކޯޓުން ވަނީ ޖަހައިދީފައެވެ.