ހަމަލާގެ ފަހުން ރައީސް ނަޝީދުގެ ފުރަތަމަ ބަސްފުޅު: ހެޔޮވެރިކަން ހޯދައިދިނުމުގައި ދެމިހުންނާނަން
12 މެއި 2021 | ބުދަ 17:37ރާއްޖޭގެ ސިއްހީ ދާއިރާއަށް އެމަނިކުފާނު މަރުހަބާ އާއި ޝުކުރު ދެންނެވި
ރައީސް ނަޝީދު އެމަނިކުފާނަށް ފަރުވާދެއްވި ބައެއް ޑޮކްޓަރުންނާއެކު
ރައީސް ނަޝީދަށް ދިން ޓެރަރިސްޓް ހަމަލާއަށް ފަހު އެމަނިކުފާނު ފުރަތަމަ ފަހަރަށް އަމިއްލަފުޅަށް ޓުވީޓުކުރައްވައި އާންމުނަށް މެސެޖެއް ދެއްވައިފިއެވެ.
މެއި މަހުގެ 6 ވަނަ ދުވަހުގެ ރޭ އެމަނިކުފާނަށް ދިން ހަމަލާއަށް ފަހު އޭޑީކޭގައި ފަރުވާހޯއްދަވަމުންގެންދަވާ ރައީސް ނަޝީދާއި ބައްދައްލުކުރެއްވުމަށް ފަހު އެކި ސިޔާސީ ބޭފުޅުންނާއި، އާއިލާގެ ބޭފުޅުން ވެސް ވަނީ އެމަނިކުފާނުގެ މެސެޖުތައް އާންމުންނަށް ދެއްވާފައެވެ. ފަރުވާ ހޯއްދަވާތާ ހަ ދުވަހަށް ފަހު ފިތުރު އީދުގެ ތަހުނިޔާ ފޮނުއްވައި އެމަނިކުފާނު ކުރެއްވި ޓުވީޓުގައި އެންމެ ފުރަތަމަ ވެސް ޝުކުރު އަދާކުރެއްވީ ދިވެހިރާއްޖޭގެ ސިއްހީ ދާއިރާއަށެވެ. އެމަނިކުފާނު ވަނީ ރައްޔިތުން އެދޭ ހެޔޮ ވެރިކަން ހޯދައިދިނުމުގައި ދެމި ހުންނަވާނެ ކަމުގެ ޔަގީންކަން ވެސް އަރުވާފައެވެ.
ރައީސް ނަޝީދަށް ލިބިވަޑައިގެންނެވި އަނިޔާއަށް އިތުރު ފަރުވާ ހޯއްދެވުމަށް މި މަހުގެ 13 ވަނަ ދުވަހު ޖަރުމަނަށް ވަޑައިގަންނަވަން މިހާރު އަންނަނީ ތައްޔާރުވަމުންނެވެ. އެމަނިކުފާނު ފުރާވަޑައިގަންނަވަން ހަމަޖެހިފައި ވަނީ ބުރާސްފަތި ދުވަހުގެ ހެނދުނުއެވެ.
ރައީސް ނަޝީދު ދިރިއުޅުއްވާ ކެނެރީގެ ކައިރީގައި ސައިކަލެއްގައި އައިއީޑީއެއް ގޮއްވާލުމުން އެމަނިކުފާނުގެ ހަށިކޮޅަށް 10 ރޭޒަރ ފުއް ވަދެ ހަށިގަނޑުގެ މުހިއްމު ގުނަވަންތައް ފޫއަޅުވާލި ރޭޒަރ ފުއްތައް ނަގަން 16 ގަޑިއިރުގެ އޮޕަރޭޝަންތަކެއް ކުރިއެވެ.
ރައީސް ނަޝީދަށް ފަރުވާ ދެއްވި އޭޑީކޭގެ ޑޮކްޓަރުންގެ ޓީމުން މީޑިއާތަކަށް އާއްމުކުރި މައުލޫމާތުތަކަށް ބަލާއިރު، ރައީސް ނަޝީދުގެ ފުރާނަ ސަލާމަތްވީ ހަމަ ކިރިޔާކަން އެނގެއެވެ.
ހޭނައްތައިގެން ކުރި ސާޖަރީތަކަށް ފަހު ރައީސް ނަޝީދު ވެންޓިލޭޓަރުން ނެގީ މި ހަފުތާގައެވެ.
