މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ޚިޔާނާތުގެ ފައިސާގެ ތެރެއިން 3 މިލިއަން ރުފިޔާ ލިބިވަޑައިގެންފައިވާކަމަށް ފެތުރެމުންދާ ޚަބަރުތައް ޕްރޮސެކިއުޓަރ ޖެނެރަލް ހުސައިން ޝަމީމް ދޮގު ކުރައްވައިފިއެވެ.

ޝަމީމަށް 3 މިލިއަން ރުފިޔާ ލިބުނު ކަމަށް އެމްއެމްޕީއާރުސީ ޚިޔާނާތާއި ގުޅޭގޮތުން އެސްޓް ރިކަވަރީ ކޮމިޝަނުން ހެދި ރިޕޯޓުން ދައްކާފައިވާކަމަށް ބައެއް ނޫސްތަކުން ދަނީ ރިޕޯޓު ކުރަމުންނެވެ. އެގޮތުން އަދީބު ހައްޔަރު ކުރުމުން ވަކީލު ފީގެ ގޮތުގައި 3 މިލިއަން ރުފިޔާ ހަމަޖައްސައިދީފައިވާނެ ކަމަށް މުހައްމަދު އައްލާމް ލަތީފްއާ ހަވާލާދީ އެ ރިޕޯޓުގައި ބަޔާންކޮށްފައިވާކަމަށް ޚަބަރުތައް ބުނެއެވެ.

އެކަމާ ގުޅޭގޮތުން ރާއްޖެއެމްވީން ސުވާލުކުރުމުން ޝަމީމް ވިދާޅުވީ، އެއީ ކަނޑައެޅިގެން ދޮގު ޚަބަރެއް ކަމަށާއި، ދުވަހަކުވެސް އެފަދަ ފައިސާއެއް ލިބިވަޑައިގެންފައި ނުވާ ކަމަށެވެ.

އަދީބުގެ ވަކީލު ފީގެ ގޮތުގައި 3 މިލިއަން ރުފިޔާ ލިބިވަޑައިގެންފައިވާކަމަށް ފެތުރޭ ޚަބަރުތައް ޝަމީމް ދޮގު ކުރައްވާފައިވާއިރު، އަދީބުގެ ގާނޫނީ ވަކީލަކަށް ޝަމީމް އުޅުއްވާފައިވާކަމާއި، އެކަމާ ގުޅިގެން މަސްލަޙަތު ފުށުއަރާކަމަށް މީގެ ކުރިން ގިނަ ތުހުމަތުތަކެއް ކުރެވިފައިވެއެވެ. ނަމަވެސް ބޮޑު ޚިޔާނާތުގެ މައްސަލައިގައި އަދީބުގެ މައްޗަށް ތުހުމަތު ކުރެވި، އެ މައްސަލަ ކުރިއަށް ގެންދިޔައިރުވެސް ޕީޖީ ޝަމީމް ހުންނެވީ ސަސްޕެންޝަނުގައެވެ.

ޝަމީމް އެންމެ ފުރަތަމަ ފަހަރު ސަސްޕެންޑްކުރީ 2015 ވަނަ އަހަރުގެ ނޮވެމްބަރު މަހުގެ 4 ވަނަ ދުވަހުއެވެ. އޭރު އެމްއެމްޕީއާރްސީ ޚިޔާނާތުގެ މައްސަލައިގައި އަދީބުގެ ބަޔާންވެސް އޮތީ ނަގާފައެވެ. އެގޮތުން އެމްއެމްޕީއާރްސީ މައްސަލައިގައި އެންމެ ފުރަތަމަ އަދީބުގެ ބަޔާން ނަގާފައިވަނީ 17 ނޮވެމްބަރު 2015 ގައެވެ.

ސަސްޕެންޝަންގެ މުއްދަތުގައި ޝަމީމަށް މައްސަލަތަކުގައި ކޯޓަށްވެސް އަދި ދޫނިދޫއަށްވެސް ދިއުމުގެ ހުއްދައެއް ނޯވެއެވެ. އަދި ގާނޫނީ މަސައްކަތް ކުރުމުގެ ހުއްދައެއްވެސް ނޯވެއެވެ. ވުމާއެކު އަދީބުގެ މައްޗަށް ކުރެވޭ ޚިޔާނާތުގެ ދައުވާތަކާއި ތުހުމަތުތަކާ ގުޅިގެން އެއްވެސް ވަރަކަށް އަދީބުގެ ވަކީލެއްގެ ގޮތުގައި މަސައްކަތް ކުރެއްވުމުގެ ފުރުސަތު ޕީޖީ ޝަމީމްއަށް އޭރު ލިބިވަޑައިގެންފައެއް ނުވެއެވެ.