ފުލް ލޮކްޑައުނަކަށް ދާން އަދި ނިންމާފައެއްނުވޭ، މަޝްވަރާތައް ދަނީ ކުރިއަށް

މާލެސިޓީ ފުލްކޮށް ލޮކްޑައުން ކުރުމަށް އަދި ނިންމާފައިނުވާ ކަމަށް ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒު ވިދާޅުވެއްޖެއެވެ.

ރާއްޖެއެމްވީއަށް މަބްރޫކް ވިދާޅުވީ މާލެސިޓީ ލޮކްޑައުން ކުރުމަށް އަދި ނިންމާފައިނުވާ ކަމަށާއި އެކަމަކު މިހާރު މަޝްވަރާތައް ކުރިއަށްދާ ކަމަށެވެ.

ފުލް ލޮކްޑައުނަކަށް ގޮސްދާނެކަމުގެ ބީރު ހީވެފައިވަނީީ ކޮވިޑް-19ގެ ކޭސްތައް ދަށްނުވާނަމަ ފުލް ލޮކްޑައުނަކަށް ދާން ޖެހިދާނެ ކަމުގެ އިންޒާރު ޓެކްނިކަލް އެޑްވައިޒަރީ ގްރޫޕް (ޓެގް)ގެ މެމްބަރު ޑރ. އަހުމަދު ޝަހީދު ދެއްވުމާ ގުޅިގެންނެވެ.

ރާއްޖެއަށް ކުރިމަތިވި ކޮވިޑް-19ގެ ހަތަރުވަނަ ރާޅާއެކު ކޮންމެ ދުވަހަކުވެސް ގިނަ ބަޔަކު ދަނީ ޕޮޒިޓިވްވަމުންނެވެ. ބަލި ކޮންޓްރޯލް ކުރުމަށް މިމަހުގެ 5ން 15ށް ޚާއްސަ ފިޔަވަޅުތަކެއް ވަނީ އަޅާފައެވެ. ސްކޫލުތަކާއި، ސަރުކާރުގެ އޮފީސްތަކާއި، ޕާކުތަކާއި މައިދާންތަކާއި، ކުޅިވަރު ކުޅޭ ތަންތަނާއި މުބާރާތްތައް ވަނީ ހުއްޓުވާފައެވެ. ދުވާ ޓްރެކާއި ސްވިމިން ޓްރެކް ވެސް ވަނީ ބަންދުކޮށްފައެވެ.

ރާއްޖޭގައި ކޮވިޑް-19ގެ ކޭސްތައް އިތުރުވަމުންދާ ވަރަކަށް އައިސީޔޫތަކާއި، ހޮސްޕިޓަލް އެނދުތައް ފުރެމުންދާތީ އެނދު އިތުރުކުރުމުގެ މަސައްކަތް މެއި މަހު ކުރީކޮޅު ވަނީ ފަށާފައެވެ. އައިސޮލޭޝަން ފެސިލިޓީތައް އިތުރުކުރުމުގެ މަސައްކަތް ވެސް ވަނީ ފަށާފައެވެ. ފަރުކޮޅުފުށި އައިސޮލޭޝަން ފެސިލިޓީ މިހާރު ގާތްގަނޑަކަށް ފުރިފައިވާ ކަމަށް އެޗްއީއޯސީން ބުނެއެވެ. އެހެންވެ މީގެ ކުރިން އައިސޮލޭޝަން ފެސިލީޓިއެއްގެ ގޮތުގައި ބޭނުންކޮށް ފަހުން ދޫކޮށްލާފައިވާ ވެލިދޫ އަނެއްކާވެސް ހުޅުވައި އައިސޮލޭޝަން ފެސިލިޓީއެއްގެ ގޮތުގައި ބޭނުންކުރަން ވަނީ ފަށާފައެވެ.