މޫސުން ގޯސްވެ، ތިލަދުންމަތިން ފެށިގެން މާޅޮސްމަޑުލަށް ވައިޓް އެލަރޓް ނެރެފި

މޫސުން ގޯސްވެ، ހއ. އަތޮޅުން ބ. އަތޮޅަށް ވައިޓް އެލަރޓް ނެރެފިއެވެ.

މޫސުމާ ބެހޭ ގައުމީ އިދާރާއިން ބުނީ ހއ. އަތޮޅުން ބ. އަތޮޅަށް ބޯކޮށް ވާރޭވެހުމާއެކު ގުގުރާނެ ކަމަށް ލަފާކުރެވޭތީ އާދިއްތަ ދުވަހުގެ ހަވީރު 04:30ން ރޭގަނޑު 09:00ށް އެ ސަރަހަދަށް ވައިޓް އެލަރޓް ނެރެފައިވާ ކަމަށެވެ.

އެ އިދާރާއިން ބުނީ ރާއްޖޭގެ އެކި ހިސާބަށް ވިއްސާރަކުރާނެ ކަމަށާއި އަދި ބައެއް ރަށްރަށަށް ގުގުރުމާއެކު ބޯކޮށް ވާރޭ ވެހުން އެކަށީގެން ވާ ކަމަށެވެ.

ވައި ޖެހޭނެ ކަމަށް ލަފާ ކުރެވެނީ އާންމު ގޮތެއްގައި މަޑުން، ދެކުނުގެ އަތޮޅުތަކަށް ދެކުނާއި ހުޅަނގުދެކުނުން އަދި އެހެން ހިސާބުތަކަށް އިރުދެކުނާއި ދެކުނުން، ގަޑިއަކު 13 މޭލާއި 13 މޭލާ ދެމެދުގެ ބާރުމިނުގައި ކަމަށާއި ވިލާގަނޑުގައި ގަޑިއަކު ގާތްގަނޑަކަށް 30 މޭލަށް ވައި ގަދަވާނެ ކަމަށް މޫސުމާ ބެހޭ އިދާރާއިން ބުނެއެވެ.

އެ އިދާރާއިން އިތުރަށް ބުނީ ކަނޑު އާދައިގެ ވަރަކަށް މަޑުވެފައި ވިލާގަނޑުގައި ގަދަ ވާނެ ކަމަށާއި ރާޅުގެ އުސްމިނުގައި 1 ފޫޓާ 3 ފޫޓު ހުންނާނެ ކަމަށެވެ. އަދި ގަދަވާ ވަގުތުތަކުގައި ރާޅުގެ އުސްމިނުގައި 3 ފޫޓާ 5 ފޫޓު ހުންނާނެ ކަމަށް ވެސް އެ އިދާރާއިން ލަފާ ކުރެއެވެ.