ރައީސް ނަޝީދުގެ ހާލުކޮޅާ ގުޅޭ އެންމެ ފަހުގެ މަޢުލޫމާތު މަޖިލީހުގެ އިދާރާގެ މުވައްޒަފުންނާ ހިއްސާކޮށްފި
މަޢުލޫމާތު ހިއްސާކޮށްފައިވަނީ މަޖިލީހުގެ އިދާރާގައި ބޭއްވި ބައްދަލުވުމެއްގައި މަޖިލީހުގެ ނައިބު ރައީސް އީވާ އަބްދުﷲ
ރައީސް ނަޝީދުގެ ޙާލުކޮޅާ ގުޅޭ އެންމެ ފަހުގެ މަޢުލޫމާތު މަޖިލީހުގެ އިދާރާގެ މުވައްޒަފުންނާ ހިއްސާކުރަނީ | މަޖިލިސް
ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ ހާލުކޮޅާ ގުޅޭ އެންމެ ފަހުގެ މަޢުލޫމާތު މަޖިލީހުގެ އިދާރާގެ މުވައްޒަފުންނާ ހިއްސާކޮށްފިއެވެ.
މި މަޢުލޫމާތު މަޖިލީހުގެ އިދާރާގެ މުވައްޒަފުންނާ ހިއްސާކޮށްފައިވަނީ، މަޖިލީހުގެ އިދާރާގައި ބޭއްވި ބައްދަލުވުމެއްގައި މަޖިލީހުގެ ނައިބު ރައީސް އީވާ އަބްދުﷲއެވެ. ރައީސް ނަޝީދުގެ ހާލުކޮޅު ރައްޔިތުންގެ މަޖިލީހުން ދަނީ ވަރަށް ގާތުން ބަލަމުންނެވެ. އެގޮތުން 6 މެއި 2021ވަނަ ދުވަހުގެ ރޭ ރައީސް ނަޝީދަށް އަމާޒުކޮށް ދިން ހަމަލާގައި އެމަނިކުފާނަށް ބޮޑެތި އަނިޔާތަކެއްވެ އޭޑީކޭ ހޮސްޕިޓަލްގައި ފަރުވާދޭން ފެށި ހިސާބުން ރައްޔިތުންގެ މަޖިލީހުން ވަނީ ޚާއްސަ ޖަލްސާއެއް ބާއްވާ އެމަނިކުފާނުގެ ހާލަތު މޮނީޓަރކުރަން ފަށާފައެވެ. މީގެ އިތުރުން މަޖިލީހުގެ ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީ ނުވަތަ ޓޫފޯވަން ކޮމިޓީއިން ވަނީ ސިއްރު ބައްދަލުވުމެއް ބާއްވާ ގިނަ ކަންތައްތަކެއް ނިންމާފައެވެ.
ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދީފައިވާ ޙަމަލާއާ ގުޅިގެން އެމަނިކުފާނު އޭޑީކޭ ހޮސްޕިޓަލުގައި ފަރުވާ ހޯއްދަވަމުންދާއިރު އިތުރު ފަރުވާއަށް ރާއްޖެއިން ބޭރަށް ގެންދިއުމަށް މަސައްކަތް ކުރަމުންދާ ކަަމަށް އާއިލާއިން ވަނީ ބުނެފައެވެ. އާއިލާގެ ފަރާތުން މައުލޫމާތު ދެމުން ބުނީ ރައީސް ނަޝީދު ރާއްޖެއިން ބޭރަށް ގެންދާނެ ދުވަހެއް އެނގޭނީ ޑޮކްޓަރުން އައިސް އިތުރަށް ބެލުމުން ކަމަށެވެ. އަދި ރައީސް ނަޝީދު އިތުރު ފަރުވާއަށް ރާއްޖެއިން ބޭރަށް ގެންދިޔުމަށް މަސައްކަތް ކުރަމުންދަނީ ޖަރުމަންވިލާތަށް ކަމަށާއި އެހެންނަމަވެސް އަދި ފަރުވާ ދިނުމަށް ގެންދާނެ ސީދާ ވަކި ގައުމެއް ކަނޑަނާޅާ ކަމަށް އާއިލާ އިން ވަނީ ބުނެފައެވެ.
ރައީސް ނަޝީދަށް ލިބިފައިވާ އަނިޔާތަކަށް ބަލާއިރު، ރައީސް ނަޝީދުގެ މޭކަށިގަނޑުގެ އެންމެ ތިރިއަށް ރޭޒަރ ފުކެއް ވަދެފައިވާ ކަމަށާއި އެންމެ ސެންޓިމީޓަރެއް ތިރިން ދިޔަނަމަވެސް މެއަށް އަރައި ފުރާނައަށް ގެއްލުންވީސް ކަމަށް އޭޑީކޭއިން ވަނީ ހާމަކޮށްފައެވެ. ރައީސް ނަޝީދަށް ފަރުވާ ދިން އޭޑީކޭ ހޮސްޕިޓަލުގެ ޑޮކްޓަރުންގެ ޓީމުން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ޑޮކްޓަރުން ވިދާޅުވީ ސީޓީ ސްކޭނަށް އެންމެ ފަސޭހައިން ފާހަގަކުރެވުނީ މައުދަނުގެ އެތިކޮޅުތައް ކަމަށާއި ނަޝީދުގެ ހަށިކޮޅުގެ ތެރޭގައި އެކި ކަހަލަ ވަރަށް ގިނަ އެތިކޮޅުތައް ހުރި ކަމަށެވެ.
ޑޮކްޓަރުން ވިދާޅުވީ ރޭޒާފުކެއްގެ އެތިކޮޅެއް ފުއްޕާމެއިން ނަގަން ޖެހުނު ކަމަށާއި އެ އެތިކޮޅު ވަދެގެން ދިޔައިރު ހިތަށް އަމާޒުނުވެ ސަލާމަތްވީ ކަށިގަނޑެއްގައި ޖެހި ފުނޑިގެން ދިއުމުން ކަމަށެވެ. އަދި ބަނޑާއި ގޮހޮރުގެ އެކި ތަންތަން ވެސް ފޫއަޅުވާފައި އެތިކޮޅުތައް ހަށިގަނޑުގެ ތެރެއަށް ވަދެފައިވާ ކަމަށާއި ފުރަމޭގެ ތެރެއަށް ވެސް އެތިކޮޅެއް ވަދެފައިވާ ކަމަށެވެ. ހަށިގަނޑުގެ އެހިސާބުތަކުގައި ގާތްގަނޑަކަށް 7 ޒަޚަމެއް ހުރި ކަމަށް ވެސް ޑޮކްޓަރުން ވިދާޅުވިއެވެ.
