ސަލާމަތީ ބާރުތަކުގެ އިންޓެލިޖެންސް އޮޑިޓެއް ހަދަން ނިންމައިފިން: ރައީސް

ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދީފައިވާ ޓެރަރިސްޓް ޙަމަލާއަށްފަހު، ސިފައިންނާއި ފުލުހުންގެ އިންޓެލިޖެންސް އޮޑިޓެއް ހެއްދެވުމަށް ނިންމަވާފައިވާކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ވިދާޅުވެއްޖެއެވެ.

ރައީސް ޞާލިޙު މިހެން ވިދާޅުވީ، ރައީސް ނަޝީދުގެ ޙާލުކޮޅު ބައްލަވައިލެއްވުމަށް އޭޑީކޭއަށް ޒިޔާރަތް ކުރެއްވުމަށްފަހު ނޫސްވެރިންނާ ބައްދަލު ކުރައްވައި ދެއްކެވި ވާހަކަފުޅުގައެވެ. އެގޮތުން ރައީސް ވިދާޅުވީ، ސެކިއުރިޓީއާ ބެހޭގޮތުން ދިރާސާއެއް ހެދުމަށް މިހާރު ޙަވާލުކޮށްފައިވާނެ ކަމަށެވެ. އަދި އާދިއްތަ ދުވަހުގެ ވަގުތެއްގައި އެމްއެންޑީއެފްގެ ފަރާތުން ސެކިއުރިޓީ ބެލެހެއްޓުމާ ބެހޭގޮތުން އޮތް އިޖުރާޢަތްތަކާއި، ރައީސް ނަޝީދުގެ ސެކިއުރިޓީ ބަލަހައްޓަމުން ގެންދިޔަ ގޮތާއި، އޭގެ ތަފްސީލީ ރިޕޯޓެއް އެމަނިކުފާނާ ހިއްސާ ކުރައްވާނެކަމަށް ރައީސް ޞާލިޙު ވިދާޅުވިއެވެ.

ރައީސް އިތުރަށް ވިދާޅުވީ، ހޮނިހިރު ދުވަހުގެރޭ އެމަނިކުފާނު ނޭޝަނަލް ސެކިއުރިޓީ ކައުންސިލާ ބައްދަލު ކުރައްވާފައިވާ ކަމަށެވެ. އަދި އެމްއެންޑީއެފް އާއި ޕޮލިސްގެ އިންޓެލިޖެންސްގެ އޮޑިޓެއް ހެދުމަށް ނިންމާފައިވާކަން ރައީސް ފާހަގަކުރެއްވިއެވެ. އެއަށްފަހު އިތުރަށް ރަނގަޅު ކުރަންހުރި ކަންކަން ސާފު ކުރައްވައި، އިންޓެލިޖެންސްއާ ހިސާބަށް އެކަން ތިލަވެގެން ނުދިޔަ ސަބަބާއި، އެކަން ނޭނގި އޮތީ ކީއްވެތޯ ސާފު ކުރައްވާފައިވާކަަމަށް ރައީސް ވިދާޅުވިއެވެ.

ރައީސް ވިދާޅުވީ، މި ހުރިހާ އެއްޗެއް ބެލުމަށްފަހު، އިންޓެލިޖެންސް މިހާރަށްވުރެ ވަރުގަދަ ކުރަންޖެހޭ ކަމާއި، ސެކިއުރިޓީވެސް މިހާރަށްވުރެ ރަނގަޅަށް އޮންނަންޖެހޭކަން ފާހަގަ ކުރެއްވުނު ކަމަށެވެ. އަދި އެކަންކަމާ ގުޅޭ 2 ރިޕޯޓުގެ އަލީގައި ވަރަށް ގިނަ ކަންތައްތަކެއް ބަދަލު ކުރައްވާނެކަން ރައީސް ފާހަގަ ކުރެއްވިއެވެ.

މި މައްސަލައިގެ ތަހުޤީޤާ ގުޅޭގޮތުން ރައީސް ވިދާޅުވީ، ތަހުޤީޤު ވަރަށް ބާރަށް އަދި އެހާމެ ރަނގަޅަށް ކުރިއަށްދާ ކަމަށެވެ. އެގޮތުން މިހާތަނަށް 3 ފަރާތެއް ބަންދު ކުރެވިފައިވާކަން ފާހަގަކުރައްވައި ރައީސް ވިދާޅުވީ، އޭގެ ތެރެއިން އެންމެ "ޕްރައިމް ސަސްޕެކްޓް" ގޮތުގައި ބެލެވުނު ފަރާތް އާދިއްތަ ދުވަހުގެ ހެނދުނުގެ ވަގުތެއްގައި ހައްޔަރު ކުރެވިފައިވާ ކަމަށެވެ. އެއާއެކު، ވަރަށް އަވަހަށް މި މައްސަލައިގެ ތަހުޤީޤު ނިމި، ދައުވާ ކުރުމަށްޓަކައި ޕީޖީ އޮފީހަށް މައްސަލަ ފޮނުވިގެން ދާނެކަމަށް ޤަބޫލުފުޅު ކުރެއްވޭކަމަށް ރައީސް ވިދާޅުވިއެވެ.

ރައީސް ވަނީ މި ޙަމަލާގެ ފަހަތުގައި އެތައް ބަޔަކު ހިމެނުމަކީ ވެސް އެކަށީގެންވާކަމެއްކަން ފާހަގަ ކުރައްވައި، ތަހުޤީޤު ވަރަށް ފުޅާކޮށް ކުރިއަށް ގެންދަވާނެ ކަމަށް ވިދާޅުވެފައެވެ.

ރައީސް ނަޝީދަށް އަމާޒުކޮށް ދީފައިވާ ޙަމަލާއާ ގުޅިގެން މިހާތަނަށް 3 މީހަކު ވަނީ ހައްޔަރުކޮށްފައެވެ. އޭގެ ތެރެއިން 2 މީހަކު ހައްޔަރުކޮށްފައިވަނީ ހޮނިހިރު ދުވަހުގެ ވަގުތެއްގައެވެ. އަދި 3 ވަނަ މީހާ ހައްޔަރުކޮށްފައިވަނީ އާދިއްތަ ދުވަހުގެ ހެނދުނުގެ ވަގުތެއްގައެވެ.