ފާއިތުވި 24 ގަޑިއިރު ތެރޭގައި 590 މީހަކު ޕޮޒިޓިވްވެ 210 މީހަކު ބަލިން ރަނގަޅުވެއްޖެއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތައް ދައްކާ ގޮތުން ފާއިތުވި 24 ގަޑިއިރުގެ ތެރޭގައި 4014 ސާމްޕަލެއް ވަނީ ނަގާފައެވެ. އޭގެ ތެރެއިން 590 މީހުން ޕޮޒިޓިވްވެފައިވާއިރު، މާލެ ސަރަހައްދުން 439 މީހުން، އަތޮޅުތެރޭގެ ރަށްތަކުން 141 މީހުން، ހިންގަމުންދާ ރިސޯޓުތަކުން 09 މީހުން، ސަފާރީތަކުން އެކަކު ޕޮޒިޓިވްވެފައިވެއެވެ.

8640 އެކްޓިވް ކޭސް ހިމެނޭއިރު، 230 މީހަކަށް ހޮސްޕިޓަލްގައި ދަނީ ފަރުވާ ދެމުން ކަމަށް އެޗްޕީއޭއިން ބުނެއެވެ.

ރާއްޖެއިން ޕޮޒިޓިވްވި މީހުންގެ ޖުމްލަ އަދަދު 34،724ށް އަރާފައިވާއިރު 25،992 މީހުން ވަނީ ބަލިން ރަނގަޅުވެފައެވެ. އަދި 83 މީހުން ވަނީ ބަލީގައި ނިޔާވެފައެވެ.

ރާއްޖެއަށް ކުރިމަތިވި ކޮވިޑް-19ގެ ހަތަރުވަނަ ރާޅާއެކު ކޮންމެ ދުވަހަކު ވެސް ދަނީ ގިނަ އަދަދެއްގެ ބަޔަކު ޕޮޒިޓިވްވަމުންނެވެ. އެގޮތުން މިހާރު މާލެސިޓީގެ ހޮސްޕިޓަލް ބެޑް ކެޕޭސިޓީ 70 އިންސައްތަ ފުލް ވެފައިވާ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ން ބުނެފައިވެއެވެ.

ރާއްޖޭގެ ކޭހުގެ އަދަދު މިހާ މައްޗަށް ގޮސްފައިވާއިރު ރާއްޖޭގައި އިންޑިއާގައި ފެތުރެމުންދާ ކޮވިޑް-19 ވޭރިއަންޓް އުޅުން އެކަށީގެންވާ ކަމަށް އެޗްޕީއޭއިން ބުނެފައިވެއެވެ. އޭގެ ސަބަބުން ރާއްޖެ އަންނަ އެންމެންވެސް ވަކި ފިޔަވަޅުތަކެއްގެ ތެރެއިން ރާއްޖެ އެތެރެވެވޭ ގޮތަށް ހަރުކަށި ފިޔަވަޅުތަކެއް އަޅާފައިވެއެވެ. އެއްރަށުން އަނެއް ރަށަށް ދަތުރުކުރުން ވެސް ވަނީ މަނާކޮށްފައެވެ.

މާލެ ސަރަހައްދުގައި ވެސް ފިޔަވަޅުތައް ވަރުގަދަކޮށް ސްކޫލްތަކާއި އޮފީސްތައް ވަނީ ބަންދުކޮށްފައެވެ. ރޭގަނޑު 9ން ފެށިގެން ފަތިހު 4ށް ކާފިއު ވެސް ވަނީ އިއުލާން ކޮށްފައެވެ. ގިނަ ފިޔަވަޅުތައް އެޅިނަމަވެސް އާއްމު ރައްޔިތުން ގައިޑްލައިންތަކާ އެއްގޮތަށް އަމަލުނުކުރާ ކަމަށްވާނަމަ ނަތީޖާ ނުނެރެވޭނެ ކަމަށާއި، ކޭސްތައް އިތުރުވާނަމަ ފުލް ލޮކްޑައުންއަކަށް ދާން ޖެހިދާނެކަމުގެ އިންޒާރު ވެސް ކަމާ ބެހޭ ފަރާތްތަކުން ވަނީ ދީފައެވެ.