ލެންސް ބަލިކޮށް ލިލް ލީގު ހޯދުމާ ގާތަށް

ފްރެންޗް ލީގުގައި ހުކުރު ދުވަހުގެރޭ ލެންސް ބަލިކޮށް، ލީގު ޗެމްޕިއަންކަން ހޯދުމާ ގާތަށް ލިލް ޖެހިލައިފިއެވެ.

ރަށުން ބޭރުގައި ކުޅުނު މެޗުން ލިލް މޮޅުވީ 3-0 ގެ ނަތީޖާއަކުންނެވެ.

މި މެޗުގައި ލިލްއިން މޮޅު ކުޅުމެއް ދެއްކިއިރު، މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން ހަތަރުވަނަ މިނެޓުގައި ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ބުރަކް ޔިލްމާޒެވެ. މިއީ އޭރިއާ ތެރެއިން ލިލްގެ ޖޮނަތަން ބަމްބާއަށް ލެންސްގެ ސެކޯ ފޮފާނާ ކުރި ފައުލަކަށް ރެފުރީ ދިން ޕެނަލްޓީއެކެވެ. އޭގެ ފަހުން މި މެޗުގައި ލެންސްއަށް އިތުރު މައްސަލަތަކެއް ކުރިމަތިވީ ފުރަތަމަ ހާފުގައި އެ ޓީމުގެ ކްލެމެންޓް މިޝެލިންނަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމާ ގުޅިގެންނެވެ.

އެއާއެކު މެޗުގެ ބޮޑުބައި އެއް ކުޅުންތެރިއަކު މަދުކޮށް ލެންސްއިން ކުޅުނުއިރު، ފުރަތަމަ ހާފު ނިމުމުގެ ކުރިން ލިލްއިން ވަނީ ލީޑު ފުޅާކޮށްފައެވެ. މި ހާފު ނިމެން ފަސް މިނެޓަށް ވެފައި ވަނިކޮށް މި ލަނޑު އެ ޓީމަށް ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި ޔިލްމާޒެވެ. އަދި މެޗުގެ 60 ވަނަ މިނެޓުގައި ޖޮނަތަން ޑޭވިޑް ވަނީ ލިލްގެ ތިންވަނަ ލަނޑު ކާމިޔާބުކޮށްދީފައެވެ.

ލީގުގައި ލިލްއަށް ބާކީ ދެ މެޗު އޮތްއިރު، ލެންސް އަތުން ހޯދި މޮޅާއެކު ތާވަލުގެ އެއްވަނައިގައި ލިލް އޮތީ ހަތަރު ޕޮއިންޓުގެ ލީޑަކާއެކުއެވެ. ކުޅުނު 36 މެޗުން ލިލްއަށް 79 ޕޮއިންޓް ލިބިފައިވާއިރު، އެންމެ ފަހުގެ ޗެމްޕިއަން ޕީއެސްޖީ އޮތީ ތާވަލުގެ ދެވަނައިގައި 35 މެޗުން 75 ޕޮއިންޓާއެކުއެވެ. އަދި ތިންވަނައިގައި އޮތް މޮނާކޯއަށް 35 މެޗުން 71 ޕޮއިންޓް ލިބިފައިވާއިރު، ލިޔޯން އޮތީ ތާވަލުގެ ހަތަރުވަނައިގައި 35 މެޗުން 70 ޕޮއިންޓާއެކުއެވެ. އަދި ލިލް އަތުން ބަލިވި ލެންސް އޮތީ ތާވަލުގެ ހަވަނައިގައި 36 މެޗުން 56 ޕޮއިންޓާއެކުއެވެ.