ޑިޒައިން އެންޑް ބިލްޑް އުސޫލުން 4 ރަށެއްގައި ފެނާއި ނަރުދަމާ ނިޒާމު ގާއިމް ކުރުމުގެ މަޝްރޫތުތަކުގެ ކޮންޓްރެކްޓުގައި ސޮއިކޮށްފިއެވެ.

މި ކޮންޓްރެކްޓްތަކުގައި މިނިސްޓްރީ އޮފް ނޭޝަނަލް ހައުސިން އެންޑް އިންފްރާސްޓްރަކްޗަރގެ ފަރާތުން ސޮއި ކުރެއްވީ ޕާރމަނަންޓް ސެކެޓްރީ ފާތިމަތު ޒީނިޔާ އަހުމަދު ހަމީދެވެ. އަދި އަލްކެޓް މޯލްޑިވްސް ޕްރައިވެޓް ލިމިޓެޑް އިން ޖޭވީ ވިތް ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑްގެ ފަރާތުން ސޮއި ކުރެއްވީ އަލްކެޓް މޯލްޑިވްސް ޕްރައިވެޓް ލިމިޓެޑްގެ ޖެނެރަލް މެނޭޖަރ ހުސެއިން ތަސްމީނެވެ.

މި މަޝްރޫއުގެ ދަށުން ށ. ފޭދޫ، ހދ. މަކުނުދޫ، ހދ. ނޭކުރެންދޫ އަދި ހދ. ނެއްލައިދޫގައި ފެނާއި ނަރުދަމާ ނިޒާމް ގާއިމް ކުރާނެއެވެ.

ސާވޭ ކުރުން

އީއައިއޭ މަސައްކަތް

ފެނާއި ނަރުދަމާ ނިޒާމް ފަރުމާ ކުރުން

އާރްއޯ ޕްލާންޓާއި ސްޓޯރޭޖް ޓޭންކް ބެހެއްޓުން

ނަރުދަމާގެ ޕަމްޕް ސްޓޭޝަން ގާއިމްކުރުން

ސީ އައުޓް ފޯލް އެޅުން

އިދާރީ އޮފީސް ގާއިމްކުރުން

ގޭގެއަށް ފެނާއި ނަރުދަމާގެ ކަނެކްޝަން ގުޅައިދިނުން

މި މަޝްރޫއުގެ ޖުމްލަ އަގަކީ 195،671،500.02 ރުފިޔާއެވެ. ހައުސިން މިނިސްޓްރީން ބުނީ މި މަޝްރޫގެ 77 އިންސައްތަ ފައިސާއަކީ އޯޕެކް ފަންޑް ފޯރ އިންޓަނޭޝަނަލް ޑިވެލޮޕްމަންޓް (އޮފިޑް) ގެ އެހީގައި ލިބިފައިވާ ފައިސާ ކަމަށާއި ދައުލަތުގެ ބަޖެޓުން 23 އިންސައްތަ ޚަރަދު ކުރުމަށް ނިންމާފައިވާ ކަމަށެވެ. މި މަޝްރޫއުގެ މަސައްކަތް 660 ދުވަހުގެ ތެރޭގައި ނިންމަން ޖެހޭ ކަމަށެވެ.