ގއ. މާމެންދޫގައި ހިންގި ގްރޫޕް މާރާމާރީއެއްގައި ވަޅިން ހަމަލާދީ އެރަށު ލިލީ އޮފްދަ ވެލީ، އަހްމަދު އުދައްޔު، 17، މަރާލި މައްސަލައިގައި ދައުވާ ރައްދުވާ ތިން މީހުންގެ ބަންދުގެ މުއްދަތު ހަތް ދުވަހަށް އިތުރުކޮށްފިއެވެ.

މި މައްސަލައިގައި ކްރިމިނަލް ކޯޓުގައި ދައުވަ އުފުލާފައިވަނީ، ގއ.މާމެންދޫ ރިހިފަރުދާގެ އަޙްމަދު ޝަމީމާއި، ގއ.މާމެންދޫ ބިލެތްމާގެ ޝަރަފް ރަޝީދާއި، އެރަށު ގުލްފާމުގޭ މުޙައްމަދު މާޒިނެވެ. މި މީހުންގެ މައްޗަށް ދައުވާ އުފުލާފައިވަނީ، ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނުގެ ދަށުންނެވެ. އެއީ ތޫނު އެއްޗެއް ބޭނުންކޮށްގެން ގަސްތުގައި މީހަކު މަރާލުމުގައި ބައިވެރިވުމުގެ ދައުވާއާއި، މީހަކަށް ނުރައްކާތެރި ހާނިއްކައެއްވާގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ކުށުގެ ދައުވާއެވެ.

ކްރިމިނަލް ކޯޓުގައި މީގެ ކުރިން ބޭއްވުނު އަޑުއެހުމުގައި މި މައްސަލަ ބަލާ ސެކްޝަނާއި ވަގުތީ ގޮތުން ހަވާލުވެ ހުންނެވި ގާޒީ ހުސައިން ފާއިޒް ރަޝާދު ނިންމެވީ ދައުވާ ލިބޭ މީހުންގެ ބަންދަށް 30 ދުވަހުގެ މުއްދަތެއް ޖެހުމަށެވެ.

އެހެންކަމުން ބުދަ ދުވަހު ކްރިމިނަލް ކޯޓުން ބާއްވާފައި ވަނީ ބަންދާއި މެދު ގޮތެއް ނިންމުމަށް ބޭއްވުނު އަޑުއެހުމެކެވެ.

ދައުލަތުން އެދިފައިވަނީ ޝަރީއަތް ނިމެންދެން ބަންދުގައި ބޭތިއްބުމަށެވެ. އެއީ މި މައްސަލައިގައި ދައުވާ ރައްދުވާ ތިން މީހުންނަކީ ވެސް ކުށުގެ ރިކޯޑު އޮތް ބައެއްކަމުން، އެމީހުންގެ ފުށުން މުޖުތަމައަށް ނުރައްކާވެދާނެތީ ކަމަށް ދައުލަތުން ފާހަގަކޮށްފައިވެއެވެ. އަދި ދެވަނަ އަސާސަކީ، މި މައްސަލައިގެ ހެކިވެރިންނަކީ، މާމެންދޫ ރައްޔިތުން ކަމުން، އެ ހެކީންނަށް ނުފޫޒު ފޯރުވުމުގެ ފުރުސަތު އޮތުން ކަމަށް ދައުލަތުން ބުނެއެވެ. އެކަމަކު ދިފާއުން ވަނީ މިމީހުން ބަންދަށް ލުޔެއް ހޯދައިދިނުމަށް އެދިފައެވެ.

މި އަޑުއެހުމުގައި ދައުވާ ރައްދުވާ ޝަމީމާއި، މާޒިންގެ ގާނޫނީ ވަކީލު މުހައްމަދު ޝަހީދު ވަނީ، ކޮވިޑް ބަލިމަޑުކަން ފެތުރިފައިވާ މިންވަރަށް ރިއާޔަތްކޮށް ގޭބަންދަށް ބަދަލުކޮށްދިނުމަށް ޝަރީއަތުގައި އެދިވަޑައިގެންފައެވެ. އޭގެ އިތުރުން، މިއަށްވުރެ ބޮޑެތި ދައުވާތައް އުފުލި ކުށް ސާބިތުވެފައިވާ މީހުނަށް ލުއިދީފައިވާކަން ފާހަގަކޮށް، އެންމެންނަށް އެއް އުސޫލަކުން އެ ހައްގު ލިބެން ޖެހޭނެ ކަމަށް ވިދާޅުވެފައެވެ.

ދައުވާ ރައްދުވާ ޝަރަފް ރަޝީދުގެ ފަރާތުން ވަކާލާތުކުރެއްވި ގާނޫނީ ވަކީލު މުހައްމަދު ނިޝާން އިބްރާހީމް ވަނީ، އިންޓެލިޖެންސް ރިޕޯޓުގެ މައްޗަށް ބިނާކޮށް، އެ މީހަކީ ކުށުގެ ރިކޯޑު އޮތް މީހެއްކަމަށް ނުބެލެވޭނެކަމަށް ވިދާޅުވެފައެވެ. އަދި އިންޓެލިޖެންސް ރިޕޯޓަކީ ބަންދާމެދު ގޮތެއް ނިންމުމުގައި ބުރަދަނެއް ހުރި އެއްޗެއް ނޫންކަން ފާރިޝް މައުމޫންގެ މައްސަލައިގައި ހައިކޯޓުން ނިންމާފައިވާ ނިންމުމުން އެނގޭކަމަށް ދިފާއީ ވަކީލު ވިދާޅުވިއެވެ.  

ހެކިންނަށް ނުފޫޒު ފޯރުވުމާ ގުޅޭ ގޮތުން ދައުލަތުން ފަހަގަކުރި ނުކުތާއާ ގުޅޭގޮތުން ދިފާއީ ވަކީލު ނިޝާން ވިދާޅުވީ، މި މައްސަލައިގެ ހެކީންނަކީ ކޮބައިކަން، ވަކީލަށް އަދި މުވައްކިލަށް ވެސް އެނގިފައި ނުވާކަމަށެވެ. ސިއްރު ހެކީންގެ ގޮތުގައި ތަރުތީބު ކުރެވިފައިވާ، ހެކީންނަކީ މާމެންދޫގެ ރައްޔިތުންކަން އެނގުނީވެސް މި އަޑުހުމުގައި ދައުލަތުން އެކަން ފާހަގަ ކުރުމުން ކަމަށް ނިޝާން ވިދާޅުވިއެވެ.

މީގެ އިތުރުން ޝަރީއަތް ނިމެންދެން ބަންދުގައި ބޭތިއްބުމަށް ދައުލަތުގެ ފަރާތުން ހުށަހެޅި ހުށަހެޅުމާއި ގުޅޭގޮތުން ނިޝާން ވިދާޅުވީ، މި މައްސަލައިގެ އަޑުއެހުންތައް މިހާރު ކުރިއަށް ގެންދަނީ، މައްސަލަ ބައްލަވާ ގާޒީ އިސްމާއިލް ރަޝީދު ނޫން ކަމަށެވެ. ޝަރީއަތް ނިމެންދެން ބަންދުގައި ބޭތިއްބުމަށް މައްސަލަ ބައްލަވާ ގާޒީ ފިޔަވާ އެހެން ގާޒީއަކު ހުކުމްކުރުމަކީ ކުރިމިނަލް ކޯޓުގެ އިޖުރާއަތްތަކާއި ޚިލާފުކަމެއް ކަމަށް ނިޝާން ވިދާޅުވިއެވެ. މި ކަމަށް ގާޒީވެސް ތާއީދު ކުރެއްވިއެވެ.

ގާޒީ ވިދާޅުވީ، މި މައްސަލަ ބައްލަވާ ގާޒީ އިސްމާއިލް ރަޝީދު މިހާރު ޗުއްޓީގައި ހުންނެވުމުން ޝަރީއަތް ނިމެންދެން ބަންދުގައި ބެހެއްޓުމަށް ހުކުމް ނުކުރެއްވޭނެ ކަމަށެވެ. އެހެންނަމަވެސް، މި މައްސަލައިގައި ދައުވާ ރައްދުވާ މީހުންގެ ފުށުން މުޖުތަމައަށް ނުރައްކާވެދާނެތީ، މި މީހުން ހަތް ދުވަހުގެ މުއްދަތަށް ރިމާންޑު ޖަލެއްގައި ބޭތިއްބުމަށް ހުކުމް ކުރައްވިއެވެ.  

މި ތިންމީހުންގެ އިތުރުން މި މައްސަލައިގައި 18 އަހަރު ނުފުރޭ ކުއްޖެއްގެ މައްޗަށް ވެސް ދައުވާ އުފުލާފައިވެއެވެ. އޭނާގެ މައްޗަށް ދެ ދައުވާއެއް ކުރުމަށް ޖުވެނައިލް ކޯޓަށް ވަނީ ހުށަހަޅާފައެވެ. އެއީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނުގެ ދަށުން ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާ އާއި ހަމަ އެ ގާނޫނުގެ ދަށުން މީހަކަށް ނުރައްކާތެރި ހާނިއްކައެއްވާ ގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދައުވާއެވެ.

8 ފެބުރުވަރީ 2021 ދުވަހުގެރޭ ގއ. މާމެންދޫގައި، ހިންގި މާރާމާރީގައި، އުދައްޔުއާއި އޭނާގެ ބޭބެ ފިރުޝާން ޒާހިރުއަށް ޖިސްމާނީގޮތުން ބޮޑެތި އަނިޔާތަކެއް ލިބިފައިވެއެވެ. އެ ޒަޚަމްތަކަށް ފަރުވާ ދެމުން ދަނިކޮށް އުދައްޔު މަރުވެފައިވާއިރު، އޭނާ ވަޅުލާފައިވަނީ އިންޑިއާއަށް ފޮނުވައިގެން ޕޯސްޓްމޯޓަމް ހެދުމަށްފަހުއެވެ.